بله‌شیب قانه عجب زۆلف-ی-پریشانین اوْغۇل
اوْلا کۆل باشینه سنده‌ن سوْرا دونیانین اوْغۇل

سنیدین زینب‌یمین مطلب-وْ-منظوری علی
قوْیدۇن آغلار گؤزیله یاخشێ اوْ رنجوری علی
دۇر گئده‌ک خئیمه‌یه ای گؤزلریمین نوری علی
گؤزۆ یوْللاردا قالێب خئیمه‌ده لئیلانین اوْغۇل

سنی لب‌تئشنه شهید ائیله‌دی بۇ قوم-ی-عدو
گۆلشن-ی-جیسمیوه وئردی دم-ی-پئکانیله سۇ
منده ایندی ائده‌ره‌م قانیله تجدید-ی-وضو
قارێشێر قانیمه بۇ چؤلده قێزێل قانێن اوْغۇل

مرحبا عئشقیوه ای شبه-ی-رسول-ی-مدنی
ائتمه‌دین محضر-ی-جانانیده شرمنده منی
یاخشێ الوان ائله‌دین قانیله بۇ گۆل بدنی
سرو تک دۆشدۆ یئره سرو-ی-خرامانین اوْغۇل

محفل-ی-قُربیده اؤز جیسمیم اوْلۇب غیر منه
کوفه دن شامه وئریر جذبه‌ی-ی-حقّ سئیر منه
بۇ کئشا-کئشده علی منزل اوْلۇر دِیر منه
اوج ائده‌ر ناله‌سی افلاکه مسیحانین اوْغۇل

سینه‌می ناوک-ی-درد-ی-غمه آماج ائده‌ره‌م
زینبین طاقت-وْ-آرامینی تاراج ائده‌ره‌م
منده بۇ چؤلده کسیک باشیله مئعراج ائده‌ره‌م
قاب-ی-قوسینیم اوْلۇر طاقی کلیسانین اوْغۇل

سن وفا گۆلشنی‌نین بیر گۆل-ی-نورسته‌سی‌سن
شُهدا دسته‌سی‌نین عئشقیده سردسته‌سی‌سن
اوْلمۇیا من کیمی بیر سئلسله پابسته‌سی‌سن
نیگران‌دیر گؤرۆره‌م دیده‌ی-ی-گیریانین اوْغۇل

نوش قێلدێن ره-ی-جاناندا بلا جامی علی
چکه‌جکدیر بۇ ایشین شامه سرانجامی علی
بیرجه آچ گؤزلرین ای قلبیمین آرامی علی
گؤر نه احواله سالێب‌دێر منی هیجرانین اوْغۇل

نور-ی-دیده بۇ کمان قدّیمه بیر ائیله نظر
تیر-ی-آهه یارالێ سینه‌می چوْخ ائتمه سئپه‌ر
تؤکمه‌سه زینب-ی-مظلومه اگر اشک-ی-بصر
یاندێرار عالمی آه-ی-دل-ی-سوزانین اوْغۇل

ای اوْلان سرو-ی-قدی زینت-ی-مئیدان-ی-بلا
کعبه‌ی-ی-وصلیده قێلدێن نه گؤزل سعی-وْ-صفا
ائیله‌دین جانیوی مین شوقیله جانانه فدا
درگه-ی-حقّیده مقبول اوْلا قۇربانێن اوْغۇل

آغلا صرّافیله بۇ مجلئس-ی-ماته‌مده ریضا
گؤز یاشێن خرج اوْلۇ گؤهر یئرینه روز-ی-جزا
آه اوْ دمده‌ن بۇیۇرۇب اوْغلۇنا شاه-ی-شُهدا
بله‌شیب قانه عجب زۆلف-ی-پریشانین اوْغۇل

شاعر: صراف