آخار قانێن کیمی آغلار، گؤزۆمده‌ن یاش علی قارداش
بۇ گۆنده‌ن بیرجه گۆن اوّل، اؤلئیدیم کاش علی قارداش
علی قارداش علی قارداش، اؤلئیدیم کاش علی قارداش

باجۇن قارداش علی سالدێن، نه تئز گؤزیاشێ تک گؤزده‌ن
دئییرلر دوْغرۇ سؤزدۆر بۇ، دؤزه‌رمیش آخر اۆز-اۆزده‌ن
علی قارداش علی قارداش، اؤلئیدیم کاش علی قارداش

غلط سؤزدۆر دئیه هر کیم، سنه گر یوسف-ی-ثانی
بۇ حُسن-وْ-بۇ ملاحت حضرت یوسف ده وار هانێ؟
سراسر جیسمین اوْلمۇش رشک-ی-صورتخانه‌ی-ی-مانی
ائدیبدیر سنده ظاهر قدرتین نقّاش علی قارداش
علی قارداش علی قارداش، اؤلئیدیم کاش علی قارداش

وجودین سربه سر باشدان آیاغا نئیزه-وْ-اوْخدۇر
....
صغیره‌م ظاهیره‌ن صورتده امما گؤز یاشێم چوْخدۇر
ایجازه وئر ائدیم تا باشیوه شاباش علی قارداش
علی قارداش علی قارداش، اؤلئیدیم کاش علی قارداش

بۆتۆن نازین چکه‌ن وار هر قده‌ر عاله‌مده ناز ائتسه‌ن
هلاک اوْلدۇم ولی آچ گؤزلرین بیر دادیمه یئتسه‌ن
سر-ی-زولفونده بئیله پای-ی-بنده‌م هر یانا گئتسه‌ن
باشێن آردێنجا گللــه‌م باش آچێق بیرباش علی قارداش
علی قارداش علی قارداش، اؤلئیدیم کاش علی قارداش

گئدیب گؤزده‌ن کؤنۆل مُلکینده مسکن ائیلئیوب قالدۇن
نئجه آرام اوْلۇم قارداش علی آرامیمی آلدۇن
غریبه دربه در قێلدێن منی صحرالره سالدۇن
اوْلۇب بیگانییه راز-ی-نهانیم فاش علی قارداش
علی قارداش علی قارداش، اؤلئیدیم کاش علی قارداش

گئجه گۆندۆز گره‌ک بۇندان سوْرا قان آغلێیام سن‌سیز
اؤزۆم بی‌پرده نالم پرده ده قالسێن دگیل جاییز
علاوه آت دؤشۆنده گئتمه‌گه اینجیمه‌ره‌م هرگیز
کسیک باشێن اگر اوْلسا منه یوْلداش علی قارداش
علی قارداش علی قارداش، اؤلئیدیم کاش علی قارداش

آلێشدێ شُعله‌ی-ی-نار-ی-محبّتله‌ن دل-ی-زاریم
بۇ سوز-ی-عئشقیله‌ن پروانه‌لر اوْلمۇش خریداریم
مؤثّردیر زبس کیم آتش-ی-آه-ی-شَررباریم
دۇتۇب اوْد وار یئری اوْدلانسا داغ داش، علی قارداش
علی قارداش علی قارداش، اؤلئیدیم کاش علی قارداش

منی ساخلا یانێندا آیرێلام قوْیما بۇ تُربتده‌ن
حقیقت عاله‌مینده اؤلمه‌ک آسان‌دیر شماتت‌ده‌ن
اجل گلمه‌ز اؤلۆب تا قۇرتۇلام درد-ی-مصیبتده‌ن
قوْیام ایندی سنیله بیر مزاره باش علی قارداش
علی قارداش علی قارداش، اؤلئیدیم کاش علی قارداش


دَم-ی-صرّافه چون اوْلمۇش دَم-ی-روح‌القُدس مُلحق
اوْدۇر صورسیز وئریر بزم-ی-عزایه نظملیله‌ن رُونق
باجێ قارداشێنێ اؤلمۆش گؤره بئیله دییه‌ر مُطلق
بۇ گۆنده‌ن بیرجه گۆن اوّل اؤلئیدیم کاش علی قارداش
علی قارداش علی قارداش، اؤلئیدیم کاش علی قارداش

شاعر: صراف