اشعار مخصوص امام محمد باقر

عاشقلر اولوب مبتهج هنگام طربدی

قورتولدی جمادی آیی اثنای رجبدی

خاصان سما خرم و تکبیر به لبدی

شادان و مصفا هم عجمدی هم عربدی

اوز نورینی گوستردی جهانه ید سرمد

قویدی قدمین یر یوزونه ثانی محمد

یاران شجر باغ نبی پر ثمر اولدی

کاشانه خورشید ولاده قمر اولدی

اسپهر ولایت بو گیجه پر گهر اولدی

مولودی مسببدی جنان بحر و بر اولدی

زیبا آدی خوبان صفینه اولدی سرآمد

قویدی قدمین یر یوزونه ثانی محمد

دریای ذکاوتدی قویوب مات عقولی

دین مکتبینه رونق اولوب اصل و اصولی

تا حشر درخشان دی یقین اولماز افولی

هیهات که بوش قیتره حیران و ملولی

ای شیعه مبارکدی بو مولود موید

قویدی قدمین یر یوزونه ثانی محمد

باقر لقبی حکمته یم محور دین دور

دانایی و بینش فری دور اهل یقین دور

طاها مثلی چهره گشا ماه جبین دور

مولودینه گلزار یساریله یمین دور

عنوانی ابو جعفر اوزی تالی احمد

قویدی قدمین یر یوزونه ثانی محمد

سرمشق خرد منزلت و رتبه سی عالی

عالملر ایدر مدح او دریای کمالی

حیران قویار علم اهلینی توصیف جلالی

الگو دی هامی خلقه سجایا و خصالی

رونق سالوب آفاقه بو دردانه امجد

قویدی قدمین یر یوزونه ثانی محمد

• شنبه
• 17
• تیر
• 1402
• ساعت
• 20:55
• نوشته شده توسط
• یوسف اکبری

عِزّت وروبدور حَضرتِ یَزدان اِمامِ باقرَه
اوُلسُون هامی عَلامه لَر قُربان اِمامِ باقرَه

باقر نَه باقر مَکتبِ قرآن و دِینه اِفتخار
باقر نَه باقر عِلم اوُنین حُکمیلَه اوُلمُوش اِنفجار
باقر نَه باقر حُسنینَه مَبهوت قالمش رُوزگار
چاتمازدی جِداً یُوسفِ کنعان اِمامِ باقرَه

باقر نَه باقر شُهرهء آفاق مِهر و مَعرفَت
باقر نَه باقر اوُندا وار مین لَر پَسندیدَه صِفَت
باقر نَه باقر واقعاً خَلاقِ حُسن و عاطِفَت
بی جا دَگُول مَدیُون اوُلور اِنسان اِمامِ باقرَه

باقر نَه باقر اِنتخاب اِیُلوب پِیمبَر آدینی
باقر نَه باقر باغلیُوب اوُز آدینه اَجدادینی
باقر نَه باقر حِفظ اِیدوب پِیغمبَرین اوُلادینی
گَلدی سَمادَن بیر خََفا فَرمان اِمامِ باقرَه

باقر نَه باقر شام دَه بیر گُون اَسیرِ جَنگدی
مانَندِ زِین العابِدین یا عَمّه سی دِل تَنگدی
گُوردی یَزیدِ بی حَیا بی شَرم و بی فَرهنگدی
اوُلمُوشدی گر چه شام او گُون زِندان اِمامِ باقرَه

دُوران دُولاندی اَلغَرض گِیتدی اِمامِ ساجِدین
اَمر اوُلدی حَقدَن چِیگنینه آلسین وِلایَت بِیرَقین
آلمیش دیلار اَطرافینی اَهلِ کَمال اَهلِ یَقین
قالمش اِمُورِ مَکتبِ قرآن اِمامِ باقرَه

آخر هُشّام اِبِنِ وَلید اِیلوب جَفا اوُل حَضرتَه
اَهلِ مَدینَه اِیتمدی حَتی وَفا اوُل حَضرتَه
والیّ شَهر اِیلوبدی چُوخ ظُلم جَفا اوُل حَضرتَه
تَزریق اِیدوب لَر زَهری چون پِنهان اِمامِ باقرَه

هر کیم سَنین درگاهیوَه نُوکر و یا مَداح اوُلور
شأنین اوُجالدّیر حَقّ اوُنین اَفلاکه مِثلِ شاه اوُلور
اَمّا #امینی نُوکرُون بیر ذَرَه خاکِ راه اوُلور
هر کیم اوّلا زائر سَنَه مِهمان اِمامِ باقرَه

• یکشنبه
• 15
• مرداد
• 1402
• ساعت
• 13:34
• نوشته شده توسط
• یوسف اکبری

باقرِ آلِعبایَم غَملی دوران گُورمُوشَم
کَربَلا دَشتیندَه بیر دِهشَتلی طُوفان گُورمُوشَم

بیر اُوشاقیدیم کی گُوردُوم حقّ و باطل جَنگینی
نیزه لَر، شَمشیرلَر، سَسلیردی قان قان گُورمُوشَم

بیر طرف اَهریمنیدی ،حَقّی اِیستَیردی ییخا
بیر طرفدَه جِلوِهء حَقّی نَمایان گُورمُوشَم

پَردَه پَردَه سان وِئیریر ذِهنیمدَه عاشُورا گُونی
هِی دُوشَر یادَه نَقَدری ظُلمَه، عُنوان گُورمُوشَم

بِیعت اُوستَه سُو یُولی باغلاندی یاندی سینه لَر
یکسَرَه اَهلِ حَرم قالمیشدی عَطشان گُورمُوشَم

سُو یوخیدی صُود اَمر یاندیردی قَلبِ عالمی
بو مُصیبَتدَه آناسین زار و نالان گُورمُوشَم

دینِ حَقّ اُوستَه بیر عدَه عاشیق عاشُورا گُونی
اِئیلَه دی اُوز عشقینی دونیایَه اِعلان گُورمُوشَم

بیر به بیر رَزمه گِئدوردی ذاتِ حَقّ عاشقلَری
شُور وشُوقیلَه اِئدیردی خَصمی حِیران گُورمُوشَم

قانلی میدانَه گِئدنلَردَن سَلامَت گَلمَه دی
خیمه لَر بُوش قالدی دِیلدَه داغِ هِجران گُورمُوشَم

بیر جَنازَه خیمیَه گَلدی عَبادَن خَلعتی
حقّ مِناسیندَه کَسیلدی تَشنَه قُربان گُورمُوشَم

بیر بیابان قان تُوکَن لَشگر اِئدوردی هَلهلَه
روبرو اُولمُوشدی حِزبِ کُفر و اِیمان گُورمُوشَم

بیر غَریبین دوره سین آلمیشدی قانلی نیزه لَر
بیر یارالی سینه اُولموشدی گُلِستان گُورمُوشُم

ذُوالجناحین شِیحَه سی وِئردی شَهاتدَن خَبر
گَلدی بی صاحِب خیامَه دیدَه گَریان گُورمُوشَم

اُولمادی اِذنیم گِئدیم گُودالَه عاشورا گُونی
خیمه لردَن اُوج اِئدوری عَرشَه اَفغان گُورمُوشَم

زِینب عمّم گَه قاچُوردی مَقتلَه گَه خیمیَه
گُون دوتولمُوشدی اَسیردی قارَه طُوفان گُورمُوشَم

خیمه نی غارَت اِئدیردی باش کَسَنلَر یکسَره
خیمَه لَر تَک عمّه مین قَلبیندَه سُوزان گُورمُوشَم

صَفحه صَفحه پِیکرِ قرآن داغیلمیشدی چُولَه
بیر بیابان قانیلَه اُولمُوشدی اَلوان گُورمُوشَم

قَتگَاهین جِلوه سی چیخماز یادیمدان هِیچ زَمان
بیر طَبق گُول ظُلمیلَه اُولمُوشدی خَندان گُورمُوشَم

نِیزَه اُوسته یاره لی باشلار بیزه هَمراهیدی
بیر یارالی باش اُوخوردی یُولدا قران گُورمُوشَم

جانَه دُویدوم شامَه جَک آلچاق اُوجا یُوللاردا من
ناقَه اُوستَه ظُلم و اَندوهِ فَراوان گُورمُوشَم

تا نَفس وار خاطیرمدَه سِیر اِئدیر شامین یُولی
باشیمَه قَمچی دَگیب خارِ مُغیلان گُورمُوشَم

بیر اُوشاقیدیم وَلی دِیلدَه غَمیم مُوج اِئیلور
یادیمَه دوشدوقجا هر قَدری غمِ جان گُورمُوشَم

#مدهوش

• یکشنبه
• 15
• مرداد
• 1402
• ساعت
• 13:37
• نوشته شده توسط
• یوسف اکبری