اشعار ترکی دیر راهب

ای نصارا اولوب اقبالین عجب یار سنه
لطف ایدبدور بو گجه حضرت دادار سنه
گلمیش عیسی اولا بو دیرده دلدار سنه
ایستیورسن گوره سن حضرت عیسانی اگر
باخ کسوک باشیمه آل گوزلریوه نور بصر

ذبح اولان باشیمی عیسی نجه گور دوره لیور
کربلادن بورا آغلور یوزه اشکین الیور
ایله بول که بالاسی اوخلانان آهو ملیور
همصدا اولموش اونیلن هامی حورای جنان
دقت ایله نجه گور داده گلوب مریم آنان

بوشلیوب جنت اعلانی بهشت اهلی تمام
من کسوک باشیله سرینده دوتان وقته مقام
اشک ریزان دیلار اولموش هامی سی راهی شام
سن که بو دیره گتیردون گوزل احساندی منه
خوش سنون حالیوه جدون اوزی مهماندی سنه

راهبین بینشین آرتیردی ایدوب دور نما
گستروب قلبینین آئینه سی هر شکلی اونا
گوردی عیسی بلشبدور توزا تپراقه قانا
اللرین هی چالور اوز باشینه هی ناله چکور
هی دانشدیقجا سوزی سوز باشی گوداله چکور

دوشدی تز سجدیه قوزاندی دوباره ایاقا
قیلدی حیرتله نظر بیر عظمتلی قوناقا
خوش گلوبسن دیدی بو منزله ای مظلوم آقا
مقدمینلن دل ناشادیمی سن شاد ایلدون
ایوین آباد اولا بو منزلی آباد ایلدون

ایندی لطف ایله اوزون فاش ایله بو سری منه
کیم سن آغلور ملکوت اهلی بو اندازه سنه
الدوروبلر نیه لعنت بو گروه فِتَنه
یاننام الله اولارین دردرینی افزون ایلسین
تز گوروم شاهلارین تختنی وارون ایلسین

هانسی پیغمبره وار نسبتین ای کان کرم
ای منیم منزلیمین رونقی وی تاج سرم
منده بوندان بیله اوز باشیمه تپراق الرم
عمروم عالم بویی اولسا سنه یاس ساخلیارام
منده عیسی کیمی هی باشه چالوب آغلیارام

گلدی پیغمبر اوپن لبلره بیردن هیجان
اولدی مرجان کیمی رخسارینه گوز یاشی عیان
فوری جدین آتاسین هم آناسین وردی نشان
بیرده زیبا گوزیلن باخدی امام حسنه
قارداشیم دوریدی آغلور هامی دان یاخشی منه

گر سوروشسان منی من پنجم بو پنج تنم
عرشه قونداقیده معراج ایلین فرد منم
عشق سر مستیم عشق اوسته جلای وطنم
عشق سر گشته سی لازم دی قزل قانه باتا
باشی سر نیزه گزه جسمی قوم اوستونده یاتا

انبیا که آلیب اطرافین اودور ختم نبی
اولیا که دولانور باشینه چوخدور سببی
ذبح اولان باشیمین اول شخص دور اصل و نسبی
من امام زمنم حامی قرآن مبین
حجت اللهم و حق آیتی آدیمدی حسین

گوگلین ایستور منه هم جدیمه مهمان اولاسان
شأن و عزت تاپاسان وارد رضوان اولاسان
مدرک اصلی بودور شرطی مسلمان اولاسان
اوندا من تک دولانار دائمی حورا باشیوا
بول که سایه سالاجاق حضرت زهرا باشیوا

گوز تیکبدور نظر لطفیمه مخلوق جهان
باب امیدیمه امیدیله با اشک فشان
بو "امینی" ایله ذکر ایلور آدیم آعلوری قان
گوندوز آخشام یانور آغلور اورگی قان دولانور
خامه الده یازا ایستور دیلی دیوان دولانور

• شنبه
• 23
• مرداد
• 1400
• ساعت
• 19:50
• نوشته شده توسط
• یوسف اکبری

اِعجاب و تحیّرده قالوب پیرِ کلیسا
رأس شهِ عطشانه خطاب ایلدی گویا

ای شاهدِ غیبیدن اولان جلوهٔ مشهود
ای کنزِ خفیدن گورونن گوهرِ موجود

ای خامهء ابداعه نگارین خطِ روشن
ای مبدأ کونه ازلی غایتِ مقصود

آئینهٔ امکان، وجوبِ ازلیّت
روشنگرِ سّر ابدی وحدتِ معبود

کیمسن، کیمه منسوب سن ای سّر الهی
ذاتونده تحیّرده دی اندیشهء محدود

گون تک شَفق آلوده دی بو چهرهٔ گلرنگ
یاقوت کیمی قانه باتوب لؤلؤ منضود

ایلور لب خاموش وضوح یله حکایت
عطشان سنی مقتول ایلیوب فرقهٔ مردود

تشریفون ایدوب دِیری مسیحایه مُصلّی
ای قبلهٔ مقصود، هامی عالمه مسجود

بو کلبه ده باش ویردی سعادت گونی باللّه
توفیق رفیق اولدی زهی طالعِ مسعود

ای فیض ازل جلوه سی نه لطف دی سالدون
فرخنده هما تک باشیما سایهء ممدود

انجیل دیمم قانه باتوب دور، بلکه اولوب دور
تذهیب اولونان مُصحَفِ احمد منه مشهود

کیمسن سنه مین جان اولا قربان، ندی علّت
بو حاله سالوب دور سنی بو فرقهء مطرود

بولمم ندی بو طایغه نین عذری او گون کی
تحقیقه یتر خالق ایدن وعدهء موعود

بو خانهء متروک سزا دور اولا سنله
رفعت ده رواقِ فلکِ اطلسه محسود

مریم یری وار فرشِ قدومون ایده زلفین
هم عقدِ عُبودیّته عیسی اولا معقود

یوخ خیلِ رُسلده بو جلالت بو فضیلت
نه صالح و نه یونس و نه یوسف و نه هود

بو شوکت و اعزازیله سن روحه مَثَل سن
اِبن و اَبه وابسته اولان واسطهء جود

بیر طایفه که آچدی سنه ظلم الی بی شک
ایتدی اوزونه رحمتِ حقّ بابینی مَسدود

تنها نه فغان ایلدی ناقوسیله عیسی
آغلور سنه معناده مزامیریله داود

پیغمبره اکرام ایدوب آئینِ نصارای
بولمم ندی اسلام ده بو باره ده معهود

ای گوهرِ یکدانهء گنجینهء خلقت
بیقدر اولی گنجینه بو گوهر اولا مفقود

سن ماهی دریای عطای ازلی سن
رُخسارده بو قان اثرِ ناوکِ نمرود

وار گوهرِ ذاتونده نشان لطفِ ازلدن
درک اولماز اولا سعیله بو پایهٔ محمود

بو صفحهٔ حسنونده کی خونین خطِ ابهام
حاکیدی غمون نامتناهی دی نه معدود

بو عطرِ نبوّت دی فضانی ایدوب اشباع
نه لخلخهٔ عنبر و نه رایحهٔ عود

عیسی منه معبود دی وار لیک یقینیم
محتاج دی محشرده سنه (عابد) و معبود

عجزیله زِ بس راهب ایدوب اشک روانه
اِعجازیله راس شه دین گلدی بیانه

من گوهر گنجینهء تسلیم و رضایم
من شَمع دل افروزِ شبستانِ وفایم

من صدر نشینِ حرمِ قدسِ تَجَرُد
من سَدره مکان طایر فردوسِ ولایم

من سوخته دل تشنهء سرچشمهء وصلم
من باخته جان عاشقِ سودای لِقایم

من کشور امکانه خداوند و امیرم
هر چند که دللّرده شهِ کرب و بلایم

من فاطمه دلبندی علی اوغلی حُسینم
آرام دلِ ختم رسل خیرِ ورایم

من قائد غم، عاشق دین، کشتهء توحید
من حِل و حرم صاحبی من میر هُدایم

من راه دفاده ایکی دریا آراسیندا
لب تشنه شَهیدم اودی شاه شُهدایم

شوقیله آتوب ملکِ جهان فکرینی باشدان
قانلی باشیله زینتِ اورنگِ جدایم

توحید منه مذهب و اسلام طریقت
دین کاخ مَشیّد، من اونا اَصل بَنایم

بیر قافله عشق اهلینه یولاردا باشیله
مهتاب کیمی پیش رُوم راهنمایم

مین عقدهء غم باخما واریم دور اورگیمده
هر کیم قالا مشکل ده اونا عقده گشایم

من میرِ حجازم، شه بطحا، مَه یَثرب
من دِیر نَصاراده غَریب الَغُرَبایم

وار دور عطش آثاری بلی خشک لبیم ده
فیض ازلی منبع یم، آبِ بقایم

من زندهء جاویدم اگر کشتهء عشقم
دین اهلی فدا دور منه، من دینه فدایم

تا غنچهء توحید، شکوفا اولا جاوید
من فیضِ نسیمِ سَحرم لطف صبایم

تا قافلهء نوعِ بشر آزمیه یولدان
اِنسان لارا حقّ ویردی ندا، من او ندایم

دین آینه سین شائبهء کفر توتان ماز
قانی له بو آئینیه من نُور و جَلایم

راهب دیمه تثلی ثدن ایت صحبت توحید
من مظهر توحید خدای دو سرایم

اقطاری دوتار مشعل اسلام فروغی
من بارقهء حقّم اونا نُور و ضیایم

تا واردی جهان سُول میه جاق گلشن توحید
بو گلشنه من قانی میله لطف و صفایم

عیسی دگولم وارثِ عیسای مَسیحم
او رُوح خداونددی، من عینِ خدایم

من مُفترض الَطاعه اِمامم ثقلینه
هر چند که بو اُمته مَقتول جفایم

مرآت دلون شائبهء شرکیدن ایت پاک
توحیدیله من دادرسِ روزِ جزایم

ای لطفی نصارایه ویرن عِزّت اسلام
لطف ایله شها بندهء مُحتاج عَطایم

گر اولمیه سن داد رسیم روزِ جَزاده
ایوای منیم حالیمه چون غرقِ خطایم

گویا اولالی اسمیوه فیروزی دی بختیم
مستغ نیم اَر چند فقیر الَشُعرایم

سندن صورا یوخ کیمسه دن انعام امیدیم
من (عابدم) ای شاه بو درگاهه گدایم

شادم که (علی) خادم و مداح یویله من
هر محفلِ ماتمده سَنه نُوحه سَرایم

• یکشنبه
• 14
• شهریور
• 1400
• ساعت
• 13:54
• نوشته شده توسط
• یوسف اکبری

گوردی که گلور خود بخود آوازهء ناقوس
حیرتدن او دَم راهب اولوب دِیرده مأیوس

عرض ایلدی یارَب ندی بلمم بو علامت
یوخسا که بو گون ظاهر اولوب شورِ قیامت
یا گویده مَسیحایه یتوب دور غم و محنت
نه حادثه وار بلمورم ای سامع و قُدوس

چیخدی او زمان سرعتی له قیلدی نظاره
گوردی اُسرانی گتورولّه او دیاره
بیر دسته حرم ناقهء عریانه سواره
باشین ده نه وار مَقنعه اگنین ده نه مَلبوس

خیل اُسرا جمله پریشان و مُشوّش
افلاکه سالوب هر بیری بیر آهیله آتش
بوینی هامی چگننده یتیمانِ بلاکش
آغلالّا هامی خسته و افسرده و مأیوس

بیماری گوروب هر غم و هر درده مسلم
عریان دوه ده اگلشوب اوُل سیّد عالم
زنجیرِ ستم له هر ایکی قولاری مُحکم
زندانِ مقیّده گورونموب ایله مَحبوس

لیلانی گوروب ناقه ده قان یاش توکور الحقّ
بیر باشه باخار شِبه پیمبردی او مُطلق
بیر نوعی له اولموش اوباشون نوری مُعلّق
گویا که آچوب چَتر گلوب جِلویه طاووس

اما او باشی ضربت یله منشق ایدوب سِیف
رنگ رُخینه باخدی دِئدی بی کم و بی کِیف
بو تازه جوانی سوسوز ئلدوردوله صد حِیف
بو هاشمی خالی بویانوب قانی نه افسوس

بیر یاندا باخاندا نظری دوشدی سِنانه
بیر یاره لی باش گوردی ووروب نوک سِنانه
آغشته اولوب بس که او باش قرمزی قانه
قان لخته سی اولموش او رُخ روی نه فانوس

گوردی او کسوک باشدا عجب سرّ و علامت
بیر نحو ایدر آیهء قرآنی تَلاوت
ظاهردی جبینی ندن اونون نورِ اِمانت
هم سرِّ وِلایت اولور اوُل جَبهه ده محسوس

بو باش دیدی کیم دور که بیله نوری جَلی دور
سویلوب له که بو مظهر نور اَزَلی دور
یعنی شه لب تشنه حسین اِبن علی دور
زَهرایه انیس و دلِ پیغمبره مأنوس

بیعت له یزیده بو حسین یازمادی نامه
حُکم اولدی گرک باشی گیده مجلس عامه
چون قتل حسین اِبن علی یتدی تمامه
تاراج خیام اولماقا اَمر اولدی چالون کُوس

بو سوزدن اولوب راهبه بیر واهمه غالب
جان نقدئی له اولدی حسین باشی نه طالب
تا شمردن آلدی او حسین باشینی راهب
گتدی اونی دِیر ایچره تاپوب عزّت و ناموس

ائتدی او باشون زینتنی مُشکله کافور
بیر طرفه سرا پرده ده قیلدی اونی مستور
ناگه نه گوروب جلوه لنوب شَعشَهء نور
اسرار الهی اولور اوُل دِیرده مَحسوس

گلموش او یِره آسیه و مریم و سارا
بیر تخت مُکَلَّل ده دوروب حضرت زَهرا
حیران دولانولّار او باشون دوری نه امّا
گه شوقی له ایلولَّه زیارت اونی گه بُوس

پیر اولدی بو اِعجازه او دَم ناظر و حاضر
اوز طایفه سین ایلیوب اوُل دِیرده حاضر
بو معجزه یه اولدی نَصارا هامی ناظر
اوُل لشگرین افعالی نه چوخ ایتدیله افسوس

(لعلی) نقدر اولسا سنه مُهلت اَجل دن
قویما بو حسین دامنی بیر دَم چیخا اَل دن
آل فیض او دریای فیوضات ازَل دن
تا اینکه سعادت تاپا بو طالع مَنحوس

• شنبه
• 20
• شهریور
• 1400
• ساعت
• 15:54
• نوشته شده توسط
• یوسف اکبری

گینه بو طوطی طبع روان بیانه گلور
شکسته نی کیمی گوگلوم او دور فغانه گلور

دوتوب شراره شرارِ غم و ملالی له
او آتشِ غمه یانماقدان الّامانه گلور

گیدور گزور دولانور بلکه شاد اولا بیر آن
اولور بیر اوزگه نشانِ غمه نشانه گلور

سالور او فکریله یول هانسی گلشنه چمنه
جفای خاره اولور توش یانه یانه گلور

قضا سالوب یولونی ناگهان رَه شامه
گوروب بلا بولوطی هانسی گلستانه گلور

گوروب اسیریدی بیر دسته خاره بلبلر
که غم لری نه خیاله و نه گمانه گلور

سولوب چمن لری باد مخالفی له تمام
یتوبدی غم کدری قلب باغبانه گلور

نه باغبان که جدایه گیچوب یارالی باشی
دونور او باشی گورن چشمین اشگی قانه گلور

گوروب او باشی جدا اوُسته بیر نفر راهب
که گوزدن اشکی اولور عارضه روانه گلور

هارا او قانلی کسیک باش گیدور جدا اوسته
قیامت عالمی نین شورشی عیانه گلور

تلاوت ایلوری قرآن او ناطق قرآن
اولوبدی رهبر او غم دیده کاروانه گلور

ایشیقلی گون کیمی نورین سالوبدی آفاقه
مسیح وار دَمین دن دَم انس و جانه گلور

اونون دالین جا نظام یله قانلی بیر نچه باش
جفا الیله وّرولموش سرِ سنانه گلور

او باشلارین دالی سن جا بیر عدّه عورت اوشاق
ولیک باغلو دولار جمله ریسمانه گلور

یتنده دِیرِ نصارایه لشکر ایتدی نزول
مرامه چاتماقا راهب تاپوب بهانه گلور

گلوب او قوم یله چوخ ایلدی سئوال و جواب
اورکده سرّینی فاش ایتدی شامیانه گلور

دیدی بو باشی ویرون بیر گیجه منه مهمان
گوروم بو کیمدی بهاری دونوب خزانه گلور

آلوب خلاصه او باشی خوشا سعادتی نه
جهاندا بیله قوناق هانسی میزبانه گلور

یودی گلابی له کافور و مُشگ سَپدی اونا
گوروب که عطر بهشتی مشامِ جانه گلور

برابری نده قویوب جانمازی اوسته یِره
سالور جمالی (شعاع) گوردی آسمانه گلور

یوزین قویوب یوزینه عرض قیلدی سن کیم سن
بو قدر معجزه سندن بیله عیانه گلور

• شنبه
• 20
• شهریور
• 1400
• ساعت
• 15:57
• نوشته شده توسط
• یوسف اکبری

نه حالیله یتوشوب دیره دختران رسول
نزول ایلوب او یرده تمام قوم جهول

صدای با نگ جرس دوتدی کوه و صحرانی
چیخوبدی دیریدن اول دمده پیر نورانی

گوروب امام حسین باشینی جداده او پیر
ازل اورکدن ایدوب آه و ناله شبگیر

بویاندا باخدی نگوردی که سید سجاد
توکور عذارینه گوزیاشینی دیور ای داد

اسیر قید ستم بند بانوان حجاز
اویاندا عشرته مشغول جمله اهل مجاز

سئوال ایلدی راهب ایا گروه شریر
بوگون بو دشتیده کیمدور سیزه رئیس و امیر

نشان ویروبله اونا شمر شوم و بی عاری
ایدبدی عارضه راهب سرشک تر جاری

گلوب سئوال ایلدی ای امیر لشکر شام
بو باش کیمین باشیدور نیزده آلور آرام

امامه خارجی نسبت و یروبدور اول گمراه
ایشیتدی بو سوزی راهب چکوب جگردن آه

دیدی بو باشی ویرون بیر گیجه منه مهمان
دوباره رد ایدرم ایسته سوز اگر هر آن

امام باشینی ویردیله پیر ترسایه
یتو شدی درد و الم چرخیده مسیحایه

او نازنین باشی گتدی او پیر خوش سیما
پیمبر اوغلی گیدوب دیره -آه و واویلا

او پیر اوتوردی ازل بیر طرفده چوخ نگران
نگوردی عرشه چیخوب آه و ناله و افغان

تمام نازل اولوب دیره انبیای عظام
ایدوبدی دیریده گویا که شور حشر قیام

پیمبران او باشی بیر به بیر زیارت ایدوب
مقربان اونی سرمایه سعادت ایدوب

علاوه جدی حسین وای دیردی آغلاردی
فغان و نا له سی کروبیانی داغلاردی

دوباره بیر نچه خاتون ایدوبدی دیره نزول
اولار تمامی سیه پوش اشگبار و ملول

یقین ایتدی اولار هاجریله سارادور
بیریسی مریم کبری بیریسی زهرادور

او نازنین باشی بیر بیر باسوبلا آغوشه
شمیم یتدی مشامه گیدوبدولر هوشه

آناسی فاطمه آلدی او باشی عزتیله
باخاندا عارضه گوز یاشی آخدی سرعتیله

بویوردی یاولدی کیم سنی بو حاله سالوب
حرملرین نه اولوب زینبین هایاندا قالوب

مگر اوغول دیمدون من عزیز زهرایم
اولارا سویلمدون سبط شاه بطحایم

گلوب تکلمه اول قانلی باش دیدی آنا جان
ترحم ایتمدیلر ویردیم اوز اوزیمی نشان

ستمله گلشنیمه صرصر خزان اسدی
اون ایکی ضربتیله شمر باشیمی کسدی

قویوب یره او باشی گیتدی بانوان کرام
گوروبدی راهب او احوالی اولدی بی آرام

دیدی قسم سنی ویرم خدای یکتایه
جناب مریم و هم حضرت مسیحایه

منه نشان ویر اوزون کشف قیل بو اسراری
غمین ملاله سالوبدور تمام ابراری

گلوب تکلمه اول راس سید مظلوم
بویوردی راهبه گویا او شه انا المظلوم

دیدی شها بو عیاندور که اولموسان مظلوم
و لیک ایله اوزون بیر منه بو دم معلوم

بویوردی سبط شهنشاه عالمینم من
سوسوز باشی کسیلن تشنه لب حسینم من

آنامدی زهره زهرا بابامدی شیر خدا
منی شهید ایلیوب ظلمیله گروه دغا

دیدی که ایله منی دین حقیدن آگاه
بویوردی سویله گلن لا ا له الا الله

او قانلی باش او گیجه دیریده یاتوب راحت

اولاندا صبح آلوبلار اونی ایدوب حرکت
چالندی طبل _ایدوب لشکر جفا حرکت

حسین حرملرینه یوز ویروب غم و محنت

یتوردولر اسرانی چو قلعه شامه
دونوبدی صبح بنات حریم حق شامه

یتوشدی سوز او یره (رمزیا) تمام ایله
سوزیوه خاتمه ویر آخر کلام ایله

• سه شنبه
• 27
• تیر
• 1402
• ساعت
• 16:32
• نوشته شده توسط
• یوسف اکبری