اشعار مذهبی مربوط به مدینه

بیر گونکه امّ سلمه اولوب تنگ حوصله
سس دوشدی یثربه قییدوب غملی قافله

پیغمبر خدا حرمیدی او باوفا
تشریف گوئیا آپاروب درب منزله

گوردی بشیری گورمیه گوزلر نجه بشیر
گرد غم اگلشوب هامی شکل و شمایله

جاریدی قان آتین قولاقیندان اوزی ملول
آغلور دانیشدورولّا ولی گَلموری دله

قاره گیوب سالوبدی آتین بوینونا قرا
بیر پرچم عزا که قرادور آلوب اله

چرپندی قلبی حالی پوزولدی او حالیده
حیرتده دور دیور گوره سن وار نه مسئله

ایستور حسینیمون خبر مرگینی ویره
بیر اوزگه حادثه یتیشوب یوخسا حاصله

ویرسه خبر حسین اُلوموندن بشیر اگر
ناخوشدی اکبرین باجیسی قورخورام اُله

اکبردن اوتری تیتروری قلبی گئجه گونوز
گاهی شکایت ایلوری گاهی ایدور گله

جاروب زلفیله اطاقین اکبرین سیلور
گرد و غبارینی یووور اشک زلالیله

شیرین یوخی گوزینه بو مدّتده گَلمیوب
هجران غمی گئجه گونوزون دوندروب ئیله

وعده ویروب عراقه آپارسون بو مضطری
یارب دیور نه وقت اولاجاق اکبریم گَله

عبّاس آناسی نیلیه جاق بُلسه مطلبی
اونلان نه نوع چرخ ایده جاقدور معامله

دورت اوغلینون گوزتلوری امّ البنین یولون
نیلر او عمری قاره خبر ویرمیه هله

ایوای منه بو غم خبری اُلدورور اونی
ای کاش اوجالمیه بو هیاهو و غلغله

وار بالخصوص علاقه سی آرتوخ حسینینه
دائم سراغ ایدر که سلامت لیقین بُله

سویلر دوشنده سوز که حسیندور امیدیمیز
کشتی عمری دوشمیه ای کاش اونون گِله

بو فکریدِیدی گوردی گَلور سس آنا سلام
سس آشنا گَلوبدی گیدوبدی تامّله

ناگه تانیدی زینبی سسلندی جان قیزیم
من اُلمدیم نیه سنی گوردوم بو حالیله

قولّارین آچدی جان کیمی بیر باسدی باغرینا
شیون اوجالدی حشره کیمی قوپدی غائله

بیر بیر سوروشدی باشلارینون ماجراسینی
ویرموردی اشک ریزشی هرچند فاصله

زهرا عزیزی دردینی بیر بیر بیان ایدور
اوّل سوزی بو اولدی او بانوی کامله

بیر گونده چوخ دونرمیش آنا دور روزگار
مشکل آچانلارین ایشینی سالدی مشکله

مهمان آدیله کوفه لیلر دعوت ایتدیلر
دوندی قوناقلیق اولدی جدال و مقاتله

اوّل سویون کَسوبله یولون اوچ گئجه گونوز
آل علی و آل پیمبر بُله بُله

اوچ گون اوشاق بویوک هامی قالموشدی تشنه لب
باخ گور نولور سو اوچ گون اگر ویرمه سن گُله

گُل غنچه سی کیمی سارالوب سولدی چوخ بالا
اوج ایتدی عرشه ناله و فریاد و هلهله

منجر اولوبدی جنگه ایشین آخِری آنا
نه جنگ من نه عرض ایلیوم نه مقابله

نه شرح ماجرایه سن ایسته نه من دیوم
کشف اولماسون نه ظلم ایلیوب شمر و حرمله

قانه بویاندی پیر و جوان یاد و آشنا
ظلمون یتوردی کوفه نون اهلی تکامله

لشکر داغلدی، خیمه تالاندی، وورولدی اود
زرتار خیمه یاندی مبدّل اولوب کوله

گُل تک وورولدی نیزیه باشلار بویوک کیچیک
تقسیم اولوندی باشلار امیر قبایله

یل قانلی زلفینه توخوناندا جوانلارین
تبدیل ایدردی دللری ریحان و سنبله

اولدوخ فرنگ اسیری کیمی دشمنه اسیر
قولدا طناب ظلم، بویونلاردا سلسله

بیر تازه داغ داغلی دل اوسته چَکیردیلر
غم کاروانی که یتیشوب هر منازله

شام اهلینون الیندن امان ای آنا اولار
پیشوازه کوی و برزنه چخدی گوله گُله

حاضر اذیّته اولار اولدی که اولمادی
حاضر آتا بالالاری ایتسون مباهله

زلفوم حکایت ایلوری باخسان ملالیمی
بسدور اشاره یاخشی دیوبلر که عاقله

اوغلانلی قیزلی نچّه بالا کم گَتورمیشم
یولدا شهید اولوبلا بدون مجادله

بسدور نه فاش ایده بُلوسون نه نهان سوزی
اوخ تک یاخوندی سوز توخونوب قلبیوی دَله

ای (حافظی) او صادقه ویر هی دعای خیر
چون یاخشی فرق قائل اولور حقّ و باطله

• شنبه
• 6
• شهریور
• 1400
• ساعت
• 23:13
• نوشته شده توسط
• یوسف اکبری

زینبون آیریلالی یَثرب و بَطحادَن آنا
اوُلمیوب آیریلا بیر لَحظه بلایادَن آنا

قارداشیم باغلادی بو شهردَه بیر بارِ سفر
روشن اوُلدی منه آینده او مَعنادَن آنا

گجه خائف یِترببدی سفرین باشلاماقی
سَلب اِیدوب تاب و توان عِترت طاهادَن آنا

کربلا دشتی نه دوشدی گُذری قافله نون
بیر اوُزون شرحِ ملالیم وار او صَحرادَن آنا

اوُردا جانانیله بیر بیع و شَری اِیتدی حسین
سُودِ سرشار نَصیب اوُلدی او سُودادَن آنا

وِیردی حقّ اوسته هامی مامَلکَین، جان نقدین
قیمتین آلدی رِضای حقِّ یکتادَن آنا

گوردی دین اِیلوری قان بَذلی نه اِحساس نیاز
گِچدی اَکبر کیمی بیر سَروِ دِل آرادَن آنا

آیریلان وَقتده شُوقیله حَرمدن او جوان
آیریلوب تاب و تَحمل دِلِ لِیلادَن آنا

گتدیلر پیکر مَجروحینی گُوردوم من اوُزوم
قرمزی قان سُوزولور زُلفِ سَمن سادَن آنا

قاسمین جسمنی نه حالده گُوردوم دِیمورم
بوله سن شرحینی سن مُختصر اِیمادَن آنا

یِری وار عُمری جه آغلار قالا بی کس آناسی
چوخ چَتین داغِ جوان آیریلا ثُکلادَن آنا

اِیله بیر حالته دوشموشدی اوُنون گل بدنی
طرح ترکیبینی پوزموشدولا اِیذادَن آنا

عَطشین سُوزشی بیر شدتیله حاکم اوُلوب
دوتدی هر نازلی بالا دامنِ سَقادَن آنا

اَلعَطش ناله سین اَفلاکه اوُجاتدی بالالار
وِیرمدی سُو بیزه دشمن دولی دَریادَن آنا

سُودی، حقّی، آنامون اوُلسون اَبُوالفضله حَلال
آفرین بیر اِیله شیرِ صَفِ هیجادَن آنا

عطشِ عشق حسینیله یانوب اِیچمدی سُو
اوُلدی حیران هامی عالم او تَولّادَن آنا

سُوئی تُوکدی یِره لَب تَشنه چخوب دَریادن
اوُد یاغاردی او هوای شَرر اَفزادن آنا

آبروئیله مَعارضدی گُوروب آبِ فرات
آب روئیله سالوب آبی تَجلّادَن آنا

بو سفرده نه دِیوم من، بیزه یوز وِیردی نه لَر
منطقیم عاجز اوُلار حَلِ مُعمادَن آنا

قیزلاریندان اِیله آیریلدی حسینیم، من اوُزوم
آرزو اِیلدیم آیریلماقی دُنیادن آنا

قلبی مه قویدی مُحبتله یَدالله اَلینی
اِیتدی آماده منی هِمّت والادَن آنا

کاروانیم یتیشن وَقتده قربان گَهه من
قصدیم اوُلدی یِتیشم کامه او ماءوادَن آنا

ساربانی اِیکی دنیاده گُوروم خوار اوُلسون
تار اِیدوب گوندوزومی لِیله یَلدادَن آنا

اِیستدیم بیرده قویام قلبی مه قارداش اَلینی
حِیف یاس اوُلدی اُمیدیم او تَمنادَن آنا

سرگذشتیم اَسَف اَنگیزیدی عرض اِیتسم اَگر
خاطرون دَرده گَلر شَرحِ غم اَفزادَن آنا

کُوفه ده قارداشیمون دیدی نه گلمشدی مَسیح
بازدید اِیتدی اوُدور دِیرده عیسادَن آنا

قانلی باش مَعبدِ ترسایه قویان وَقته قَدم
گلدی الله سسی ناقوسِ کَلیسادَن آنا

چکدی بیر بَزمِ شَرابه بیزی جَبریله یزید
گُوردوم اوُردا مِی و میخواره و مینادَن آنا

اوُجِ قدرتده اوزین گُوردی او جَبارِ زمان
اِنتقام آلدی سرِ وارِث یَحیادَن آنا

خیزران اَلده اِیچوب باده اوُلوب مَست و خَراب
دِئدی هزیان اَثرِ ساغَرِ صَهبادَن آنا

شامِ ویرانه سی آخر بیزه سر مَنزل اوُلوب
اوُلمیوب قورتارا زینب باش او غُوغادَن آنا

مین خَدنگِ غمه بیر دِل اولا عالمده هَدف
اوُندا مشکل قالار آثارِ ، شَکیبادَن آنا

اوُچ یاشندا بالا گُل غُنچه سی ویرانه نِشین
سنه بَنزَردی او قیز سیرت و سیمادَن آنا

گتدی سن تک اوُدا جسمی یارالی قَبر اِیوینه
نسگلیم چوخدی او نیلوفَرِ زیبادَن آنا

حیف اوُلا اوُلمادی اوز شانی نه لایق کَفنی
سالدی بو غُصه منی قدرت و یارادَن آنا

هر قَدَر دیده خونباریله باخدیم یوزینه
دویمادیم لَذّتِ دیدار و تماشادَن آنا

آخرین مَرحلهء وِصلده اوُپدوم یوزونی
سیلدی اَشکیم توزونی زُلفِ مُطرادَن آنا

کُوفه و شامی دولانماق منه آرتردی شَرف
راضیم بو قدمِ بادیه پیمادَن آنا

یوخدی (خوندل) دَه لَیاقت بو مُسلمدی ولی
وار عِنایت گُوزی بو دَرگه والادَن آنا

نَقطهء ضَعفی بویوکلر گُوزی گُورمزله، بلی
غمضِ عِین عِیب دِگل دِیده بینادَن آنا

هر نه اوُلسا گِنه اوُستونده حسینون آدی وار
خوشدی گر اوُلسا کَرَم نوکره مُولادَن آنا

• دوشنبه
• 29
• شهریور
• 1400
• ساعت
• 14:54
• نوشته شده توسط
• یوسف اکبری

خبر دوشوب شهرِ یَثربه کاروانِ دشتِ بلا گلور
حسین ئولوب آلِ مُصطفا کِعبه تک گینمش قَرا گلور

توکُولدی عورت کیشی چوله مُنتشر اوُلان دَم دَه بو خبر
اَیاق یالین باش آچوخ هامی پیشواز قصدیله خون جگر
وورا وورا باشه سینیه دِلده واحسین ذِکری دِیده تَر
بیری دِیور وامُحمدا شیونه بیری بَرمَلا گلور

بشیری ناگه نه گوردیله وار اَلینده بیر پرچمِ عَزا
آتین قولاقلار یارالی دور قان آخور سالوب بوینونا قَرا
توکُور عذاره سرشگنی دَمبدَم دِیور وامُصیبتا
دوشوب دالین جه بیوک کیچیک دِلده داد و آه و نوا گلور

گلوب گلوب تا پیمبرین قَبرینه یتوردی بشیر اوُزون
اولوب پیاده سلام اِیدوب دولدوروب گنه اَشگیله گوزون
مَعاینه قویمور آغلاماق دوتموری دِلی یا دیسون سوزون
و یا خبر ناگوار دور اَکتشافه مانع حَیا گلور

تاپانمادی چارہ چارہ سیز عرض قیلدی که یارَسول الله
حسینیوین ماجراسندان خاطرون اوُلوب موبمو آگاه
وِئرم سنه سر سلامتی اَهلِ بیتونله گلمیشم همراه
اوُلوب گوزیندن اِیراق هامی دَرد و مُحته مُبتلا گلور

بوسوزده گویا گلوب دِله واحسین دِیدی قَبرِ پیغمبر
پیمبرین اوز وَفاتی تک دوشدی شَهریده شُورشِ مَحشر
سُؤُوردی تپراق باشا بوتون گلدی نالیه مرد و زن یک سر
معاینه گوز یاشین توکور داد خاتمِ اَنبیاء گلور

او حین دَه قوپدی هم همه گوردیلر گلور کاروانِ غم
کجاوه لردن اَنوب یِره خون جگر حَرم خسته دِل حَرم
اوجالدی اَهلِ مدینه دَن اَهل بیتیدن ناله دَمبدَم
کانَّهُ روزِ مَحشر دور شیونه زمین و سَماء گلور

خانملار عُلیا مُخدره زینبین او دَم دوتدی دوره سین
بیری اِیاقین بیری اَلین بُوس اِیدر بیری زرد گُونه سین
بیری دِیور دِینمیون بیر آز صُحبت اِیلسون دَرک اِیداخ سسین
بیری دِیور یورمیون گُورون یول نه وقتی بُو مَه لَقا گلور

خانم بیر آز وقتتدن صُورا قوزادی بلایه دوشن باشین
چکوبدی بیر آه آتشین واحسین دِیوب توکَدی گوز یاشین
یاواش یاواش سرگذشتنی باشلادی دِیسون قوم و قارداشین
دِیدوق جه بیر بیر گوروردیله رِقته او زَهرا نَما گلور

دِیوردی بیر بیر ئولنلرین حقّ یولوندا ناحقّ شَهادتین
اِیدیردی تعریف غیرتین هُمتین کمالِ شَهامتین
سایوردی بعضیلرین آدین نقل اِیدیردی سان سیز جَراحتین
شمارش اِیتدوق جه گوزیاشی گوزدن عارضه چشمه سا گلور

بوگفتگودِیدی ناگهان گوردی اوزگه داد و اَنین گلور
باخوب گوروب گورمه سین گوزلر وای اوغول سوز اُمّ اَلبنین گلور
آچوب قولون سالدی بوینونا سسلدی آنا اِیللّرین گلور
سوروش مالی حالون اوُلماسین بیر بُویوک غمه مُبتلا گلور

اؤپوپ اَبُوالفضل آناسنون یوز گوزون دیدی من فَدا سنه
گوروم خداوند ذُوالجَلال اِیلسُون اوزی صَبر عَطا سنه
قیزوندان اوغلان لارون آنا گوندروب سلام و دعا سنه
سوروشما اَمّا دِینمرم گلمور اوزلری یا آنا گلور

بوقدر وار انتظاریله تیکمه گوزلرون روز و شب یولا
قبیله نون گوزلمه یولون حسرتیله چوخ باخما صاق صُولا
یولا باخان گوزلره آنا زینب ستم کِش فَدا اولا
رِجالدن یوخ گلنلری بیر قالور بوزین الِعبا گلور

• دوشنبه
• 29
• شهریور
• 1400
• ساعت
• 14:55
• نوشته شده توسط
• یوسف اکبری

آنا اوغلون حسین اولدی سوسوز قربان اوزوم گوردوم
کنارنهریده عطشان ویرنده جان اوزوم گوردوم

اونی سن بسلدون گرچه آنا دنیاده عزتله
همیشه چکدون آغوشه دانشدردون محبتله
اونی کرب و بلا ایچره شهید ایلوبله ذلتله
وجودین قانیله رنگین ایدوب عدوان اوزوم گوردوم

آنا سندن سورا دشمن اونی دنیاده خوار ایتدی
جفاسین شمر بد فطرت حسینه آشکار ایتدی
آنا سن گورمدین اعدا وجودین سنگ بار ایتدی
ولی نعشین او حالیله من نالان اوزوم گوردوم

ازل اعوان و انصارین الیندن آلدی دشمنلر
حسین یالقوز قالوب طبل بشارت چالدی دشمنلر
قالوب تنها هجوم ایلوب آت اوستن سالدی دشمنلر
سویوبلار نعشینی یکسر قالوب عریان اوزوم گوردوم

آنا بو قبردن دور بیر اورکده واردی چوخ سوزلر
بلالر گورموشم هرآن جهاندا گورمسین گوزلر
زبس غم یوز ویروب دائم منه شام اولدی گوندوزلر
بو مدت اولمادیم راحت بلا هر آن اوزوم گوردوم

شهادت شهدینی ایچدی او چولده یار و انصاریم
توکولدی خیمیه دشمن گوربله یوخ هواداریم
نه قارداش نه اوغول حسرت باخوب بو چشم خونباریم
جلال و عزتیم یکسر اولوب تالان اوزوم گوردوم

سو یولدی نازنین قیزلار آنا باخدوقجا یاندوم من
الیمده اولمادی چارم باخوب یاندوم دایاندوم من
توکولدی باشیمه کوللر خم غمده بویاندوم من
دوشوب صحرایه اطفالون هامی گریان اوزوم گوردوم

آنا شمر شرور ایتدی اسیر اولاد طاهانی
دولاندردی قولی باغلی بیزی هر گونده بیر یانی
ویروب گه کوفه نی منزل گهی دیر نسارانی
حسینون باشینی راهب ایدوب مهمان اوزوم گوردوم

آنا سن راضی اولمازدون او باشه توز قونا بیر آن
سنان نوک سنانینده دولاندیردی اونی هرآن
قیزیل قانه بلشمیشدی اوخوردی نیزه ده قران
او وقته وردیلار بیر داش توکولدی قان اوزوم گوردوم

اولاندا قیزلارون داخل دیار شامه شام اولدی
آنا جان شام شهرینده او گون بیر ازدحام اولدی
بنات پاک زهرایه غریبه احترام اولدی
او گون بیز آغلادوخ دشمن اولوب خندان اوزوم گوردوم

قوروبلار شامیده بی حد مجالسلر ضیافتلر
بیزه شام اهلی ایلوبلر او یرده چوخ شمادتلر
امامین باشینه گه کول گهی داش توکدی عورتلر
یانوب عمامه سی باشدا باخوب حیران اوزوم گوردم

او قدری اولمدیم اولدوم گینه من قبریوه زائر
اولونجه بو مصیبتده اولام گر من سنه ذاکر
نه غم دلدن اولور زایل نه محنتلر اولور آخر
بو دنیاده غم بی حد من نالان اوزوم گوردوم

• شنبه
• 3
• مهر
• 1400
• ساعت
• 14:51
• نوشته شده توسط
• یوسف اکبری

بو زینبون آنا یا فاطمه نه مدّتیدی
زیارت ایلماقا قبریوی چوخ حسرتیدی

قسم بو قبریوه سندن من آیرلان گوندن
تمام فکر و خیالیم همین زیارتیدی

گورنده سن منی زلفوم آغارمامشدی هله
قیزون نه قاره لچک نه خمیده قامتیدی

دور ایمدی گور بو بلاکش دوشوبدی بیر نه گونه
ایدن گون عزم سفر بولمورم نه ساعتیدی

نه بیر بو قلبیم آچلدی نه بیر یوزوم گولدی
او عرض مدت انیسیم ملال و محنیدی

بیله خیال ایلمه کوفه ده ازل کی کیمین
قیزوه عزیزیدی مشغول استراحتیدی

وفاسینه آنا جان اهل کوفه نین لعنت
او حرمتی که منه ایتدیلر شماتتیدی

قوناق آدیلا بیزی کربلاده ساخلادلار
یرین بوش اولدی قوناقه اوئیکه حرمتیدی

عیالیوین یوزونه سو یولینی باغلا دلار
همان او سو سنه مهریه دن عبارتیدی

بنای جنگ آنا جان قویدولار حسینیویله
حسین کمکسیز اولار بیر آغیر جماعتیدی

او چولده دوغرادلارنو جوانلاریمی سوسوز
آچوب باشیمی یولیدیم نه بیر فراغتیدی

ایشیم او دشتیده اولموشدی بیر کفن بیچماخ
ولی حسینیدن آنا جان زینبون خجالتیدی

کفن تاپانمادوم اوغلون حسین جنازه سینه
نجه جنازه سرا پا بدن جراحتیدی

اوزومده ساتره محتاجیدیم بولورسن آنا
او گونده چادر و معجر تمام غارتیدی

تالاندی جاه و جلالیم یاناندا خیمه لریم
گلوب گوریدون آنا اوزگه بیر قیامتیدی

تمام . باشلار آچوخ بانوان پرده نشین
اسیر و بستهء قید طناب ذلتیدی

آپاردلار بیزی ابن زیاد مجلسینه
سنون گوزوندن ایراق مجلس ضیافتیدی

نجه دیوم نجه مجلس اجامر و اوباش
او بزم شربیده مشغول عیش و عشرتیدی

قیاس اولونماز او مجلس یزید مجلسینه
یزید مجلسی چون مجلس خلافتیدی

او بزمه بی سر و پانون آنا یولی یوخیدی
امیریدی امرا ائلچیان دولتیدی

ولیک ابن زیاد ایلمیشدی مجلس عام
بیری بیره قارشوب اهل کوفه کثرتیدی

او مجلسین آنا بیر حالینی تصور ایله
اسیر قیزلاریوین حالی گور نه حالتیدی

حسینیوین یارالی باشینی زیاد اوغلی
برابرینده قویوب مقصدی اهانتیدی

ایچوب شرابی قویوب ساغری گوتوردی قمار
گوزوم باخاباخا ایتدی او کی جسارتیدی

همین بو ظلمون آنا مثلینی یزید ایلدی
او گون کی شامیده مست می بشارتیدی

امام عصر قباقینده اوینیوب شطرنج
حریفی قالب اولان دم ایش عداوتیدی

بسان تیر (شهاب) اود توکر قلم (ناهید)
بو اودلی سوز نئیدی باشلادون نه صحبتیدی

• شنبه
• 3
• مهر
• 1400
• ساعت
• 15:06
• نوشته شده توسط
• یوسف اکبری