کیم حسینین درگهینده شهرت خدمت تاپار

هم بو دنیا هم او دنیاده گوزل عزّت تاپار

بو مقدّس آستاندا صدقیله خدمت ایدن

آند اولا بو آستانه گون به گون قیمت تاپار

آستانیندا حسینون سیندیران شخصیّتین

سانما شانی آزا لار سیندیقجا شخصیّت تاپار

خادم اولماق هر کسه ممکن دگل بو درگهه

سالنما بو توفیقی هر کس ایتمسه همّت تاپار

شرطی وار بو منصب پر افتخاره یتماقین

بیله بولمه بو مقامی هر بشر  صورت تاپار

اولین شرطی بو عالی منصبین اخلاصیدور

منزلت تاپماز ریائیله گلن نکبت تاپار

اولمیوب بیر کس صفائیله گله نومید اولا

هاردا بیله بیر قاپی عالمده بیر ملّت تاپار

هیچ درگاهه قیاس اولماز حسینون درگهی

خوش اونون احوالینه بو حضرته نسبت تاپار

بیرده لازیمدور حسینون خادمی یکرنگ اولا

کیم بیر اوزلی گلمسه بو درگهه خفّت تاپار

منصب دنیایه توولانماز حسینون خادمی

خیر گورمز کیم بو شهدن چکسه ال خسرت تاپار

بیر ائله شان و جلالت حق بو درگاهه ویروب

کیم اوزون بو درگهه ییخسا بویوک رفعت تاپار

قونمیوب ذلّت توزی قونماز بو عالی درگهه

بیله فکر ائتمه حسینون خادمی ذلّت تاپار

چون حسینیلندی هر  آزادی و آزادگی

عبد اولان آزادمرد انسان«حریّت» تاپار

بیر نچه یرده حسین اوز خادمین یاده سالار

بیر بو دنیاده او دم که چوخ غم و محنت تاپار

بریده لطفیله گلر جان تاپشوران ساعاتیده

چون بولر انسان ائله ساعتده چوخ زحمت تاپار

قابض روحه دیر رحم اتیت بیزه خادمی بو

گوندن آیدین دور که عزرائیل او دم رقّت تاپار

بیرده اونا که اونی ائل لر قویا قبره گیدر

تک قالارکن قبر اویی ظلمت گورر وحشت تاپار

وار عقیدم بیر ائله وحشتلی ساعتده حسین

خادمین غمدن قوتارسون حقّدن رخصت تاپار

اونا کی گوردی ایشیقلاندیردی قبرین نور حق

قلبده وحشت گیدر اوز قبرینه الفت تاپار

بیرده محشرده شفاعت ایتماقا اوز خادمین

لطف اوزیله آختارار بی شبهه اول حضرت تاپار

اونا کی هر کس قالار اوز قیدینه فریاد ایدر

او حقیقی خامین اول شافع امّت تاپار

هر آدین خادم قویان خادم اولانماز بو سوزون

حکمتین دنیاده اهل منطق وحکمت تاپار

عمده شرطی بیرده تقوادور بئله بیر منصبین

اولماسا تقوی چتین بیر کس بئله رتبت تاپار

بوردا خوشدور «شانی» مرحومدن خوش یاد اولا

چونکه دوز خادمدی دوز خدمت این رحمت تاپار

مطلبین حقّین گوزل بیر طرزیله ایلوب ادا

حالینه طوبی ، گوزل خدمت گوزل  اجرت تاپار