شهادت امام علی (ع) ( به زبان ترکی )

بو آتش هجرانیوه اودلاندی عالم یا علی(ع)!
آغلار غمینده حضرت زهرا(س) و خاتم (ص) یاعلی(ع)!
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
بو اود نه اوددور سر به سر  داغلوب جهانی یاندیریر؟!
شعله سالیب  محفللره ، پیر و جوانی یاندیریر!
سرگشته چؤللرده گزن صاحبزمانی یاندیریر
هئچ مرد دوران گؤرمه ییب بو نحو ماتم یا علی (ع)!
 
ای آفتاب لم یزل،دنیای عشقین مهتری!
رحمتسرای حقّده عدل و شرافت مظهری!
ای عارف شیرین سخن، اهل حقیقت یاوری!
گردش ائدیر شمس و قمر،عشقینله توأم یاعلی(ع)!

سن سیز بو ماتم ،حضرت زینب(س) دن آیریلماز داها
آسایش دورانیده ، مظلوم بالان قالماز داها
حقّی اذیّت ائتمه دن ، شرمه عدو دالماز داها
سنسیز عدالت امن دن دوشدی مسلّم یا علی(ع)!
 
بیر عؤمر اولموش خونجگر ، درد دلین چاهه دئدین!
غیرت سرودین  دال با دال  زهرا(س) تکی ماهه دئدین!
معناده یعنی سؤزلرین هر لحظه آللاهه دئدین!
نامردلردن گلمه دی اسراره محرم یاعلی(ع)!

اولدی قارانلیق بیر بولوت کوفه،حقیقت ماهینه
بی حرمتی ائتدی ریا قومی خدا درگاهینه
مذهب یولیله ووردولار ضربه عدالت شاهینه
جان یاندیران نیسگیلدی بو سوز دمادم یاعلی(ع)!

آیا مگر حق مشعلین دونیاده سؤندورمک اولار؟!
بخت اولدوزون هر توزلو بیر آیینه ده گؤرمک اولار؟!
ائتدی خیال اهل ستم انواری اؤلدورمک اولار
اؤز بختینه ووردی عدو شمشیری محکم یا علی(ع)!

 
سن اؤلمه ییبسن! آغلادان خلقی بو غم دریاسی دیر
هر درددن  کسگین اولان ، بیر دونیا هیجران یاسی دیر
داغلار ووران عاشقلره ، آنجاق زمان سوداسی دیر
هاردا وار آخر سن تکی مظلوم اعلم یا علی(ع)؟!

بولبول یئرینده اوتدو چون بایقوش،قانادی باغلادار
شعریله  شیر عالمی هم اؤلدوره ر  هم آغلادار
اول قدر تکرار ائیلییه ر ، صاحب زمانی داغلادار
تلقین ائده ر اؤلمک سؤزون شیطانلا باهم یا علی(ع)!


حُرمت بو گون محفوظ دور  بیزدن سنین تک سروره
دونیا اولا قوربان گئنه آزدیر  مقام حیدره
آنجاق خیالیمدا گزیز  باخ گؤر نه عالی منظره!
خالیقله مئهمانلیقلارین اولموش مجسّم یا علی(ع)!

هیجران غمین احساس هئچ نامرد عالم ائیلمز
بو دردی هر عاشق اولان آدم دویوب فهم ائیلمز
باغلار اُمیدین یوللارین، آینده یه رحم ائیلمز
تعظیم ائده ر  امّا سنه، عیسای مریم(ع) یاعلی(ع)!

مین ابن ملجم بیر نفر جیلدینده قالدیردی خطر
ائتدین بو فانی دونیادان البتّه نیسگیللی سفر
اودلاندی امّت سر به سر  داغلاندی قلب دادگر
چوخ سیررلر قالدی گئنه مجهول و مبهم یا علی(ع)!
!!!!!!!!!!!!!!!!!!
اوخشاما – در عزای امام علی (ع)
( به زبان ترکی )
 شیعه لر  قلبی جوشلاندی آلله!
گؤزلرین جامی داشلاندی آلله!
دَیدی تیغ جفا فرق یاره
آیریلیق یاسی باشلاندی آلله!
یاندی جان، غربت مرتضایه
یا امام زمان(عج) گل عزایه!
اُف اولا بئیله بیر روزگاره
آیریلیقلا ووروب جانه یاره
یئتدی صبر علی (ع) انتهایه
اولدو غمدن اورک پاره پاره
یاندی جان، غربت مرتضایه
یا امام زمان(عج) گل عزایه!

گر چه حقّیله یار باغلی گئتدی
وقت دیداریدی چاغلی گئتدی
آمما عالم بیلیر کی آقامیز
قهر ائدیب کوفه دن داغلی گئتدی
یاندی جان، غربت مرتضایه
یا امام زمان(عج) گل عزایه!

 نئیلیرم عدل سیز بو جهانی
ای اورک سسله صاحبزمانی
ایسته آلسین اله ذوالفقاری
سؤیله دولدی غمه شیعیانی
یاندی جان، غربت مرتضایه
یا امام زمان(عج) گل عزایه!
لطف قیل بیرده بو محفله گل
لایق اولماساق ائتمه گله گل
ای کی بو یئرده صاحب عزاسن!
دؤندو گؤز یاشلاریمیز سئله گل
یاندی جان، غربت مرتضایه
یا امام زمان(عج) گل عزایه!

 آیریلیق گؤر نئجه قلبی داغلار
گؤز یاشی عاقبت یاره باغلار
تاریخی چوخ ورق ووردوم آخر
یازدی دادا بو  اشعاری آغلار
یاندی جان، غربت مرتضایه
یا امام زمان(عج) گل عزایه!

شاعر: دادا بیلوردی