شعراربعین - تُرکی
زبانحال حضرت زینب
غمگینترین مرثیه
اربعین – مرثیه ادبیاتی
عاشورا حماسه سین دیری ساخلایان ، قادینلار قادینی ، زینب حضرتلری (س) باره سینده دانیشماق بیزیم اوچون چوخ چتیندیر. ایسلام دینی نین بایراغینا دایاق زینب حضرتلری نین آجیلیقلاری هئچ تدقیقاتچییا گیزلین اولمایاراق، ایمکانی یوخدور کی « اربعین » کلمه سی گؤزه دَه یَه ، « زینب حضرتلری » یادا دوشمه یه . بو گونلرین مناسبتینده ، آغیر غم یوکو داشییان خانیم ، کربلا شهیدلری نین زیارتینه گئتمیشدیر.
حضرت زینبین(س) دیلیجه – مرثیه
داغدار ائتدی حسین(ع)! پوزغون مزارون زینبی
آتش عشقه سالیب ، صبر و قرارون زینبی
غم قوجالدیبدیر منی ائیلیبدی گیریان قارداشیم!
گؤز یاشیملا بیر آخیر گؤزلرده کی قان قارداشیم!
چوخ مصیبتله یئتیشدیم قبریوه، جان قارداشیم!
ائیله دی نیسگیل داغی محزون غبارون زینبی
سؤیله ییم آخیر سنه من هانسی بیر فرجامدن؟!
کوفه دن یا دیر راهیب دن یا راه شام دن؟!
گل دئییم بیر قورخولی ویرانه قالمیش دام دن
گؤر نئجه سوزان ائدیبدیر طفل زارون زینبی!
باغریما اود سالدی هیجران،قانه دولدی شامده
غصّه دن بیر نوگولون آج یاتدی سولدی شامده
هئچ سوروشمورسان رقیّه ن پس نه اولدی شامده
جان وئریب یاندیردی نازلی یادگارون زینبی
محبس اولدی روحیمه او مُلک شامی قارداشیم!
شرمسارم کی دییه م من چوخ کلامی قارداشیم!
اکتفا ائت بو سؤزه آل بو سلامی قارداشیم
یاندیریب یاخدی خلاصه روزگارون زینبی
قالمادبق ساکت ولی پوزغونلو بیر آمالده
عرصه نی دار ائیله دیک ظولمه خروشان حالده
فرصتی دشمن دن آلدیق، وقت قیل و قالده
صبره تسلیم اولدو چون دوتدی وقارون زینبی
ائیله دیک رسوا یزیدی شامده سجّاد ایله (ع)
ناگران اولما کی جنگیم وار گئنه بیداد ایله
هاشمی بولبوللری قویمام گزه صیّاد ایله
عارف فاضل ائدیب عطر بهارون زینبی
خطبه میز یارمیشدی دشمن باغرینی شمشیر تک
گؤز یاشی آنجاق سلاح اولموشدو کسکین تیر تک
روبهان کوفه و شامی ووروردوق شیر تک
ائیله دی سؤزلر دَنیزی اقتدارون زینبی
باخما معناده بئله نیسگیللی محزون هیئته
دولموشام آللهه آند اولسون سراسر حیرته
یئندیریب جانون تکان وئر قلب شاه امته
گؤرنه حاله سالدی قانلی لاله زارون زینبی!
اولموشام افسرده هیجرانیندان ای دریای داد
گل دعا ائیله بو تئزلیکله آچیم وصله قاناد
قالماییم دونیاده گؤرموم بیر بئله جور و فساد
ائیله دی مفتون او راز آشکارون زینبی
دونیانین باغرین گرک بو کربلاده داغلییام
نیسگیلین چوخدور یئری وار هرنه قدری آغلییام
قالمادی فرصت منه قارداش! یاراوی باغلییام
غرق ماتم ائتدی حزن بیشمارون زینبی
قوی غریبلیکلرده یانسین قوربانون اولسون باجون
چیرپینان قلبی دایانسین قوربانون اولسون باجون
باشیوه پیدر دولانسون قوربانون اولسون باجون
اودلادی دونیاده چشم اشکبارون زینبی
روحیوی قایتارماغا بیر یول چالیش منله حسین! (ع)
آیریلیقلار آتشینده دور آلیش منله حسین!
دلشکسته قالمیشام گل بیر دانیش منله حسین!
الامان ائیلیبدی حال انتظارون زینبی
اَللری قوینوندا باخ گؤر نه نوا ائیلیر رباب!
سینه داغین غملی حالدا برملا ائیلیر رباب
ایسته ییر دردین دئسین اما حیا ائیلیر رباب
اودلادی بو همسر بی اختیارین زینبی
ناز بالاسین وئر آنا بیر آرزییا چاتسین حسین!(ع)
باغرینا باسدیقجا بیر بیر غملرین آتسین حسین!
اصغرین راحتدی راحتتر ولی یاتسین حسین!
یاندیریب یاخدی عجب دیلسیز هزارون زینبی
من دئییم یالقیز بالاندا ، سنده اکبردن (ع) بویور!
من دئییم نازلی رقیّه ندن، سن اصغردن بویور
من دئییم یاسدان ، سن عباس دلاوردن بویور!
قارداشیم! چوخ یاندیریبدی روزگارون زینبی!
اؤلمه ییبسن آمما سن ای عارف عالی مرام
حق یولوندا اؤلمز هئچ بیر شخص مخصوصاً امام
بو آخان گؤز یاشی اولموش آیریلیقدان، وَالسلام
عزّته مالیک ائدیب پروردگارون زینبی
شاعر: ابواالفضل عظیمی بیلوردی
(دادا دادگر )
- جمعه
- 16
- دی
- 1390
- ساعت
- 17:43
- نوشته شده توسط
- ابوالفضل دادا
ارسال دیدگاه