دیر راهب

کربلا هنگامه سی اولموش بری نسیانیدن
چخسا گر یاددان یقین چخمیش بشر وجدانیدن
سرخ رو اولموش عدالت اوردا آخمیش قانیدن
بیر بیله نهضت نه اولموشدی نه فمر ایله اولار
رهبریندن آد گلنده گوزلر اشکیلن دولار

واژه هیهات من الذله و تکبیریدن
تتریوب دشمن ایشیتدی شاه عالم گیریدن
چوخ کسرلیدی شعاری ،سوزلری شمشیریدن
آبرو، حریت، احراره ویریبدور بو قیام
روح انسان ساز مولایه اولا بیزدن سلام

هر ایل عاشورا دیرسن تازه طوفاندان گچور
آز قالور مین دورت یوز ایل اولسون او بحراندان گچور
باور ایت بیر عده عاشقلر اوگون جاندان گچور
بیر بهانه آختارور دینون یولوندا جان ویره
آرمان شاه دینه عشق اوزیله قان ویره

خواب غفلتده یاتانلار بس دگول بیدار اولون
ایلیون وجدانیزی قاضی داخی هوشیار اولون
ال چکون شیطان سوزوندن طالب دیدار اولون
سن خیال ایتمه بهشتدن اوتری جان ویردی حسین
گور نه اندازه بو دین اعلادی قان ویردی حسین

اون ایکی ،ایرمی ایکی منزل یازان واردور یولی
اگلشوب محملده زینب ،لشگر آلمیش صاق صولی
چوخ کرامتلر اوباشدان گورسنوب تاریخ دولی
جمله سیندن عرض ایدوم دیر نصارا قصه سین
ایندیده یاددان چخاتماز شیعه زینب غصه سین

بو سعید شامیدن تاریخیده مکتوب اولوب
نقل ایدر بیر گون سنان و شمر چوخ مرعوب اولوب
چونکی بیر منزل او منزلدن قاباق مغضوب اولوب
دیره بیر قدری یاخینلاشمیشدی دوردی کاروان
ایستیوبلر استراحت ایلسونلر شامیان

اولدولار نصرانیلر نیروی منطقدن خبیر
ویردیلر شمره خبر واردی شبیخون ای امیر
قورخوسوندان گوردولر شمری، علف تک تتریور
مشورت فرماندهان ارتشیلن ایلدی
وارد دیر نصارا اولماقا ظن ایلدی

شمر یارانیله یوز قویدی گلوب دیره طرف
گلدی دیوار اوسته دوردی بیر کشیش با شرف
سسلدی بو سمته گلماقدان ندور سیزده هدف
شمر ویردی صاحب دیره بونوعیله جواب
جنگیدن لشگر گلور یئر ویر بیزه ای مستطاب

قلبیدن محزون اولوب شیخ نصارا بی درنگ
سسلدی هاردا ایدوب بو لشگر انبوه جنگ
ارتش ایرانیله ، یا ملت روم و فرنگ
سویلدی ،کشور گشاییدن دگول بو جنگیمیز
خارجی اولدورموشوخ ابن زیاد امریله بیز

ایتمدی بیعت یزیده کسمیشوق باشین سوسوز
هم اوزون اولدورموشوق ،هم یار و یولداشین سوسوز
صاحب پرچم ،ابوالفضل آدلی قارداشین سوسوز
مملکتده سالدی آشوب،انقلاب داخلی
باشلارین شامه روان ایلور جداده قاتلی

بو گیجه دیرونده یر ویر بیزلره اول میزبان
باشلاری نصرانی سویلوب ویر منه ایندی نشان
گتدیلر نزدیک دیواره رئوسی شامیان
ناگهان دوشدی حسین باشینه راهب گوزلری
گون کیمی گوردی ایشیق سالمیش جمال انوری

قلب شیخه دوشدی نورانی باشین اُبهتی
سرّ قتلین بیلماقا اولدی اورکده نیتی
گوردی ،آشوبگر باشینا بنزمیر شخصیتی
خولیه ، شمره ، بویوردی راهب شب زنده دار
دیریده ساکن اولا افراد لشگر تنگ اولار

لیک اسیران و یارالی باشلارا ویررم مکان
تاپماسین ال بونلارا ایسته شبیخون رهزنان
ویرسین الان خیمه و خرگاهی چولده شامیان
چونکه دشمن لشگری گوردوقجا ایلر اضطراب
ایلدی فرماندهان ارتشی بو سوز مجاب

نیزه دن لشگر او یورقون باشلاری اندیردیلر
قویدولار صندوقه قفل ایلوب گروه حیله گر
قوللاری باغلاری اسیرانیله تحویل ویردیلر
یاتدی بیر مخصوص صندوق ایچره تا راس الحسین
لنگر کونین علی المرتضایه نور عین

بیر مناسب یر اسیرانه ویروب پیر کنشت
باشلاری عالی اطاقدا اندیروب ، نیکو سرشت
بخته باخ راهب ایوی اولدی گیجه مثل بهشت
قالدی لشگر چولده محکم قفل ویردی قاپلارا
باشلارا باخدی دیدی دیریم هارا ؟بونلار هارا؟

ناگهان گوردی حسین باشی ایدوب دنیانی طور
سیندیروبدور سقفی عرشه قوزانور ، شوریله نور
نور آراسیندان ، گوروب نورانی بیر هودج انور
تخت نور ایچره اوتورموش بیر خانمدا وای دیور
سسلنوللر طرقوا لا تنظروا ، ایوای دیور

اوپدولر نوبتله نورانی خانملار باشلاری
آغلیوبلار ،آغلادوبلار ،شوریلن داغ داشلاری
قویدولار صندوقه ،آخدی یوزلره قان یاشلاری
محشر اولدی ،اول زمان کی دوشدی بیر سس منزله
سسلنوبلر یول ویرون ایستور خانم زهرا گله

لرزیه دوشدی او سسدن تارو پودیم برملا
دخت پیغمبر هارا نصرانیلر دیری هارا
بیهوش اولدوم عالم دیگرده گوردوم ای خدا
اوغلونون باشین گوتوردی سیل ایدوب گوزیاشینی
اشک چشمیلن یودی اوپدی حسینون باشینی

سسلنردی ای ویرن لب تشنه جان مظلوم بالا
پیکری گودالیده عریان قالان مظلوم بالا
دور بالا خوش گلدون ائت گلدی آنان مظلوم بالا
ای سرور سینم ای مادر فدایت یا حسین
نیلمیشدون باشیوی کسدی بو امت یا حسین

هوشه گلدیم گورمدیم آثار اولاردان مطلقا
آسیه ، حوا و مریم گیتدی عرشه گوییا
بولدوم اول باش ، آیری باشدی ،اوندا وار سرّ خدا
آرام آرام آتدوم اول صندوقه ساری من قدم
فاطمه سینه گلی اوسته سالام اشکیله نم

ایلدیم اوّل اوزومی پاک و خوشبو عطریله
منزله گچدوم او دم صندوقه باخدیم بیرده من
قفل صندوقی الیم تتریردی آچدیم اوندا من
ایلدیم حیرت نجه صندوقدا یاتموش آفتاب
عشقی دوشدی قلبیمه اوپدوم اونی بی صبر و تاب

سسلدیم اوّلده ای یورقون قوناقیم السلام
بو گیجه دیریم بهشت اولدی ایا شاه انام
به ابی انت و امی روز و شب قان آغلارام
آغلادی ساراییلن مریم سنه کیمسن آقا
نطقه گل آدون بیان ایله منه کیمسن آقا

بولمورم کیمسن یارالی اشرف انسانیسن
بولمورم کیمسن یارالی مفخر قرآنیسن
بولمورم کیمسن یارالی عالمه سلطانیسن
اقتدارون بولدوم ای باش کیمسن اما بیلمدیم؟؟
حقدی یارون بیلدیم ای باش کیمسن اما بیلمدیم؟؟

بهترین بهترین سن بولمورم آدون  ندور؟؟
ئولدوروب بیهوده دشمن بولمورم آدون ندور؟
اهل جنت ایتدی شیون بولمورم آدون ندور؟
مریم و عیسا و سارایه گوره منن دانیش
آدم و نوحیله موسایه گوره منن دانیش

قلبیوین بندین قیریبلار آخ  نه علت بولمورم؟؟
باشیوه خنجر ویریبلار آخ  نه علت بیلمیرم؟؟
مه جبینون سیندیریبلار آخ  نه علت بیلمیرم؟؟
ذات پاک حق یکتایه گوره منن دانیش
انبیانون تاجی طاهایه گوره منن دانیش

یالواریب از بسکی راهب آغلادی بی فاصله
گوردی ترپندی دوداقلار ناگهان گلدی دله
قال انا المظلوم انا المغموم سویلوب سائله
عرض ایدوب مظلوم ئولوبسن آدیوی بیلدیر منه
بی کس و مغموم ئولوبسن آدیوی بیلدیر منه

سن خانم زهرا ،دی زهرا کیمدی ایلوردی فغان
کیمدی جدون یا آتان ، کیمدور آنان ایله بیان
گوزلرون آچدی بویوردی راهبه شاه جهان
مصطفی جدیمدی راهب مرتضی فرزندیم
اکبریمجه عمر ایدن زهرا ننم دلبندیم

شاعر : حاج غلامرضا عینی فرد زنجانی