دیر راهب
 سوال و جواب

 زبانحال امام حسین علیه السلام

خوش گَلوب سالدون عجب وقته منی یاده آنا
باشیمی عرشه اوجاتدون بو کلیساده آنا

اوزون آگاهسن ای غمزده دورِ زَمَن
فرقتونده نه قدر طالبیدیم وصلوه من
بو گئجه حالیمه شامل ایلدون لطفوی سن
قویمادون تک منی بو دیر نصاراده آنا

تاپدون اوّل گئجه مطبخده تنور ایچره منی
پیشواز ایلمدیم من ایله موقعده سنی
ائتدی شرمنده منی خولی بیرحم و دنی
وار یری حشره کیمی گلسم اگر داده آنا

گلمه میشدیم او گئجه کثرت غمدن اوزیمه
محضرونده دل آچوب شرح ویریدیم سوزیمه
گوز آچانمیردیم آنا دولموشیدی کُول گوزیمه
سنی دیندیریدیم عفو ایله او مأواده آنا

ایندی فرصتدی دویونجا گل ایداخ راز و نیاز
دوشه مشکلدی اَلَه بیرده بیله مجلس راز
بو کسوک باشمه مقدورم ائدم پای انداز
واریدیم چوخدان اوزوم من بو تمناده آنا

شرحه گلمز نه قدر واردی بلاسی باشمون
آخره یتمز آنا جور و جفاسی باشمون
ظاهراً وار اون ایکی کاری یاراسی باشمون
گَله معناده محال امردی تعداده آنا

حقّدن ایلمدی زادهٔ مرجانه حیا
آچدی مجلسده شماتت دلین اول کان خطا
وُردی پیغمبر اُپن لبلریمه چوب جفا
گتوروب عترت غم پروریمی داده آنا

آسدیلار گاهی آقاجدان باشمی قوم دنی
سنگسار ایلدیلر کوفه ده ظلمیله منی
آرزو ایلدیم هر لحظه ده هر دمده سنی
بیر گوریدون دوزوب اوغلون نئجه بیداده آنا

وُردیلار نیزه لره تشنه یارالی باشیمی
هر جفایه آناجان ائتدیله حالی باشیمی
یاندروب گون نئجه گور بیر بو بلالی باشیمی
اولمیشام هر غمه هر محنته آماده آنا

یارالی باشما بو قوم ائده هر جور و جفا
منه خوشدور دوزرم باشه یته امر قضا
هر بلایه من اوزوم وئردیم ازل گونده بلا
تا که«صحافه»شفاعت ائدم عقباده آنا

متن جواب در پست قبلی

شاعر : حاج محمد حسین جنتی مقام