دیر راهب

یارالی کیمسن ائدوب دِیریمی نورانی باشون
طور سینادن ائدوب باش بو کلیسانی باشون

دولانوم باشیوه ای باشی سالان عالمه شور
نور حق ایلوری بو رأس منوّرده ظهور
وار یری رشک آپارا بو یره گر وادی طور
بر ملا گورسه سالار حیرته دنیانی باشون

گورمیوب دهریده بیر گوز بئله بیر حُسن و جمال
حُسن یوسف اولا بولمز بو گوزل حُسنه مثال
نیه قانه بلشوبدور بو دل آرا خط و خال
یاندیریر حسرت اوتوندا دل دنیانی باشون

سلب ائدور کیمسن اورکدن محنون صبر و قرار
دوتوب اوت حالیوه هر بیر باخانون قلبی یانار
عارضونده ندی بو خاک مذلّت بو غبار
حشره دین حقلیدی آغلاتسا احبّانی باشون

کیمسن ای عارض چون مهر درخشان دولانان
یارالی باشیله احوالی پریشان دولانان
آردیجا چوللری بیر دسته پریشان دولانان
چکور آخر هارا بو جمع پریشانی باشون؟

بولمورم هاردا اولوب ظلمیله ویران چمنون
یا گئدوب غارته هاردا چمن پر ثمنون
هاردا باشون کسیلوب هاردا قالوبدور بدنون
سلب ائدور دلده اولان صبر و شکیبانی باشون

کیمسن ای نور رخی طعنه ووران مهر و مهه
اوخشادور حالت مظلومیتونبی گنهه
ووروب هانسی شل اولان اَل یارا بو سجده گهه
وئور عالملره شقّ القمر اعلانی باشون

کیمسن ای کان شرف یوخدی مگر دادرسون
مات و مبهوت قویوب عدنیده داوودی سسون
دم وئرور قالب بی روحه مسیحا نفسون
حقبه ارشاد ائدوری گبر و نصارانی باشون

کیمسن ایا نه مرامون باشون آواره سیدی؟
هانسی درد و محنون و درد دلون چاره سیدی؟
بو جبینوندکی یاره آقا نه یاره سیدی؟
غرق بحر غم ائدور عالم امکانی باشون

کیمسن آیا گئدوسن نوک جدالرده هارا؟
بو حقارتله سنی خوش دگول اعدا آپارا
کیم ووروبدور بو لب لعل گهرباره یارا
یارالاردان گُل آچوب چون گُل رضوانی باشون

کیمسن ای خون دلیله قاریشان اشک تری
چرخ اعجاز و کراماتون ایشیقلی قمری
ندی بو عارض گلفامیده کی کول اثری
هانسی بی رحمون اولوبدی گئجه مهمانی باشون

کیمسن ای عارض زیباسی بئله قانه باتان
کوللر اوستونده یاتوب مقصد و مقصوده چاتان
نطقه گَل بیرجه دانیش عالمی ای گوزدن اتان
وار نه علّت دولانور کوه و بیابانی باشون

ائده سن خوشدی «شعاع» راهبی بو یرده خطاب
یاز حسینون دلیجه جمله سوالاته جواب
اجریوی قوخما وئرر بو شه دین یوم حساب
دولانار اوندا که شرمنده بیابانی باشون

شاعر : حاج غلامعلی شعاع