• پنج شنبه 9 فروردین 03


زبانحال حضرت سکینه (س) در راه شام -( تأثیر ائدر از بسکه فراقون دله قارداش )

1701

زبانحال حضرت سکینه (س) در راه شام

تأثیر ائدر از بسکه فراقون دله قارداش
مشگلدی که دردیم گله دلدن دیله قارداش


هر چند تسلّی وئررم من دل زاره
صبر اولموری حاصل بو دل زار و نزاره
اولماز مرضی عشق اولانا صبریله چاره
وار صبریدن عشقه نقدر فاصله قارداش


شمرین ستمی هجر غمی جور زمانه
تیر غم و اندوهه اولوب سینه نشانه
مین درد و مصیبت یتیشه بیر قوری جانه
آیا نقدر اوندا اولور حوصله قارداش


صبریم توکنوب تاب و توانیم گئدوب الدن
چارم کسیلوب سالدی فراقون منی دلدن
ال چکمرم ئولسمده بودور رسم ازلدن
معشوق یولوندا گرک عاشق ئوله قارداش


ظاهردی نه لازم من ائدوم دردیمی اظهار
باخ حلقه ی زنجیریمه گور شمر جفا کار
ازبس منِ زاره او دل آزار ائدوب آزار
تیترور بدنیم قورخارام ایمدی گله قارداش


بیر نکته وار آرتوق ائدر اما منه تأثیر
هر کیمسه فرار ائتسه وورالّار اونا زنجیر
زنجیر نه لازم منه اول زلف گره گیر
هر حلقه سیدور بوینوما بیر سلسله قارداش


هر وقت باشون نیزه ده جولانه گلنده
قلبیم دوتولور ناله و افغانه گلنده
شمری گورورم رعشه دوشر جانه گلنده
رنگیم سارالور قمچی آلاندا اله قارداش


قارداش نچه مدتده دوشوب بیر بئله فرصت
اغیار یاتوب خالی اولوب مجلس صحت
قارداش باجی درد دل ائداق بیر نچه ساعت
اما نه سن ائت ناز نه منده گِله قارداش


دیندیر منی بیر کلمه اگر سن ائده سن ناز
منده ائدرم هجرون الیندن گَله آغاز
شایسته دی سن ناز ائده سن لیک نه چوخ آز
فی الجمله گُلین نازی اولار بلبله قارداش


گلرنگ جمالون اولوب القانیله الوان
بلبل کیمی شور اوسته گلوب ایلرم افغان
جور ستم خاریله گوزیاشیم اولور قان
باخدوقجا گوزوم قانه باتان کاکله قارداش


نه سنده جوابه دل اولور منده سؤاله
سن باخ منه منده باخوم اول ماه جماله
شوریله ائداق هر ایکیمیز ناله بو حاله
آسان ایشیمیز دوشدی عجب مشگله قارداش


سرمایه«حقیره»وئریلوب خامه ی دفتر
درسی غلط اولسا ائدرم بیر به بیر ازبر
عالمده تاپولموش اونا بیر شغل مقرّر
دوشمز اله عمریله بئله مشغله قارداش

شاعر : میرزا عبدالوهاب حقیر خویی

  • پنج شنبه
  • 20
  • مهر
  • 1396
  • ساعت
  • 2:54
  • نوشته شده توسط
  • علی ببیرپور

برای بارگذاری فایل در سایت اکانت مداحی بسازید



ارسال دیدگاه



ورود با حساب گوگل

ورود کاربران