غفلتدن ای گوزوم بیر اویان نوبهاره باخ
گول فصلی گلدیی آچو گوزووی لاله زاره باخ
هر بیر گول اوسته شوریله بیر عندلیبی گور
گلمیش مقال شورشه باخ آه و زاره باخ
گور بیر ائدر نه طرزیله شکوه فراقیدن
گول شاخه سینده بلبل ائدن انکساره باخ
بلبل هنوز وصلیده کام دل آلمیوب
دوشموش جفا خیالینه بی رحم خاره باخ
عکش خیال عاشقی معشوقه دور ائدن
مقصود چرخ کج روش کجمداره باخ
ای دل بلاسی چوخدی نه کارون وار عشقیلن
غوغایه سالما باشیوی گئت اوزگه کاره باخ
هر بوالهوس دوام ائده بُلمز مشقَّته
بو دوره لرده گزمه چکیل بیر کناره باخ
قوی من سنه محبتین اهلین نشان وئروم
گور زینب بلا کشی صبر وقراره باخ
شامین یولوندا ناقه نین اوستونده باش آچوق
نه معجر و نه مقنعه ناقه سواره باخ
گُرگان شام ائدوب حرم آهولرین شکار
گرگان شامه باخ اولونان بیر شکاره باخ
وورموش سنان سنانه حسینون کسیک باشین
باشدان او باشه نیزیه هم نیزه داره باخ
قرآن اوخور کسیک باشی لحن حجازیله
دلده کلام حضرت پروردگاره باخ
قانلی باشیندا تاج شرف قانلی یاره سی
نوک جداده رأس شه تاجداره باخ
اهل حرم یاننجا چخوب شهر سیرینه
گور بیر جلال و دبدبه سین شهریاره باخ
باشین کسوبله گوزلرینی یومّیوب هنوز
صحرایه منتظر باخوری انتظاره باخ
معلوم اولان سکینه سینی ساربان ییخوب
بیر غم کش انتظاریدی بیر غمگساره باخ
باشی جداده گتمز ایدوب کاروانی لنگ
مقتوله باخ کسوک باشا باخ اقتداره باخ
سعداوغلی گوردی قافله رفتاریدن قالوب
غیظه گلوب او کین لعین کین شعاره باخ
زجربن قیسه امر ایلدی تاپ سکینه نی
مأموره باخ مقصره باخ کامکاره باخ
راوی دیر بولوردوم اونون من شقاوتین
تاپسا چون اینجیدر خبر ناگواره باخ
گیتدوق اونیله منده یتیشدوق سکینیه
گورجک بیزی آغاردی یوزی دلفکاره باخ
زجربن قیس ایستدی وورسون او بیکسی
وورما دیدیم یتیمیدی بیر کردگاره باخ
مندن گوروب بو رحمی سخلدی رکابیمه
خوار و لعیمی حامی بولن گول عذاره باخ
رحم ایلدیم دئدیم گل ائدیم ترکیمه سوار
باخدی او قیز منه دیدی پروردگاره باخ
من خاندان عصمتم آل پیمبرم
پرهیز قیل پیمبر پیرهیزگاره باخ
گلم دیدی دالوزجا گئدون سیز یواش یواش
بیر روزگار عزیزینه باخ روزگاره باخ
بیر قدر یول گلوب دایانوب اگلشوب یره
باشدان گوتوردی معجرینی خوار وزاره باخ
گوردوم دیور ایاقلارینا باغلیوب باخوب
فرمایش ایلدی ایاقیمدا قاباره باخ
چوخ زحمتیله قافلیه یتدی آغلادی
آغلاتدی اهل قافله نی اشگباره باخ
گلدی آتا باشی وورولان نیزیه باخوب
عرض ایلدی بابا قیزیوا قیل نظاره باخ
گور بیر سالوب نه حالته بو ساربان منی
جور و جفایه باخ ستم بیشماره باخ
از بس پیاده گلمیشم آغرور ایاقلاریم
چوخ خسته اولموشام من ائوی تاروماره باخ
سیلی دگوب یوزوم گویروبدور بنفشه تک
دشمنلریمده جرأته باخ اقتداره باخ
من آغلیاندا شمر دیور خارجی قیزی
دنیایه باخ زمانیه باخ اعتباره باخ
باخما شرار خامیه باک ایلمه شهاب
دفتر چتین یانا سخن آبداره باخ
- دوشنبه
- 25
- شهریور
- 1398
- ساعت
- 9:54
- نوشته شده توسط
- علیرضا گودرزی
ارسال دیدگاه