ورود به شام
غم قافله سی یتدی چو دروازۀ شامه
دوندی اسرانون گونی بیر لیل ظلامه
حکم اولدی منادیلر ائده جار او گونده
شام اهیلینی ائتسونله خبردار او گونده
زینت وئریله کوچه و بازاره او گونده
چخسونلا تماشادن اؤتؤر غرفه و بامه
شام اهلینه یوز وئردی او گون آیری بیر حالت
هر کوچه ده بر پا اولونوب مجلس عشرت
سازنده و بازنده ائدوب زیور و زینت
گیمیشدیله عشرتدن اؤتؤر قرمزی جامه
باغلانمشیدی بیر ایپه اولاد پیمبر
سر سلسله ده عابد دلخسته و مضطر
یوز وئردی او گون زینبه چوخ محنت و غملر
گوردی که سالوب شمر اولاری طرفه نظامه
یارا هانی شرح ائتمگه دروازۀ ساعت
تعطیل اولونوب قافله اوردا نچه ساعت
یوز وئردی نلر سید سجّاده او ساعت
قول باغلی اؤرک داغلی بدنده غل و جامه
شام اهلی تماشایه چخوب دسته به دسته
رأس شه دین نیزه ده زینب دوه اوسته
محنت کش و ماتم زده و قلبی شکسته
بنزردی او گون زینبیچون روز قیامه
بیر غرفه ده اگلشمیشیدی بیر نفر عورت
گوردی او زمان بیر باش ائدر آیه تلاوت
خوف ایلمیوب حقدن او ملعونه او ساعت
بیر داش گوتوروب وئردی او دم فرق امامه
داش دگدی شه دین باشینا جاری اولوب قان
بو حالی گوروب زینب اولوب حالی پریشان
باشینی ووروب محمله با ناله و افغان
قان جاری اولوب عارض خاتون گرامه
عورتلر ائدوب طعن شماتت اُسَرایه
بعضیسی گولوب عترت شاه شهدایه
ناگه بیری اود توکدی سر زین العبایه
بیر وقت گوروبلر آلشوب یاندی عمامه
القصّه ائدوب حکم او زمان زادۀ سفیان
ترتیبیله ائتسونله یریش لشگر عدوان
باشلار دالیسینجا گئده لر فوج اسیران
اولاد علی وارد اولا مجلس عامه
صدقیله یاپوش «کاتب» حسینون اتگینه
آغلا نقدر عمرون اولا اوُل شه دینه
قیل توشه سرشک بصری روز پسینه
دنیاده گورونموب ائده بیر کیمسه اقامه
شاعر : مرحوم میرزا محمد صادق کاتب اردبیلی
- شنبه
- 29
- مهر
- 1396
- ساعت
- 8:52
- نوشته شده توسط
- علی ببیرپور
ارسال دیدگاه