عمه جان غم شاهدین آغوشه چکدیم جان کیمی
غنچه وقتیمده پوزولدوم بیر گل خندان کیمی
.
.
پر شکسته بلبلم من گلستانی نیلورم
بوردا قالسام خوشدی یانمیش آشیانی نیلورم
.
.
بُلمورم نه سرّی واردور بو خرابه منزله
گون بگون آرتور علاقم دیلده کی گلمز دله
بو قدر وار خوش گلور خلوتسرا اهل دله
گوئیا من بوردا قالام کربلایه گیتمرم
اولموشام مأنوس بو خلوتسرایه گیتمرم
.
.
اونداکی بیداد الیندن اولدوز آزاد عمه جان
گلدیقی یولاری طی ایتدی بو یورقون کاروان
کربلایه چون یتوشدوز نامه یاز ایله روان
بی خبر قویما منی اول قامتی شمشادیدن
اکبر آدلی قارداشیم مظلوم اولان ناشادیدن
.
.
بو آز عمریله هجوم ایتدی منه غم رنگ رنگ
ساقی محنت توکوب پیمانۀ جانه شرنگ
ظلم الیله شیشۀ قلبیم اولوب آماج سنگ
ایسترم بو تنگنای دهریدن آزاد اولام
گوشه ویرانه ده ناشاد اُلم تا شاد اولام
.
.
احتضاریمدور خبر ویر عمه آل هاشمه
هر نه زلفیم تک پریشان وار یغیشسین باشیمه
ممکن اولسا گر – صبا گیتسون دیسین قارداشیمه
گل باجین ویرانه ده تُپراقلار اُسته جان ویرور
آخرین ساعاته چاتموش عمرینه پایان ویرور
.
.
عمه قبریم اُسته یاز بودور حسین دردانه سی
مونس زینب رقیه شمع حق پروانه سی
گوشه ویرانه اولدی عاقبت کاشانه سی
گنجی مدفون ایلدیم ویردیم امانت سیز لره
شامیان بو قبر اولور نور هدایت سیز لره
.
.
یر ایشقلی کوکبم باش ویرمیشم بو شامیده
نوریم آرتار گون بگون سؤنمز گلن ایامیده
شهرتیم باقی قالار خلق ایچره خاص و عامیده
سیر سیز بیر اولدوزام چیخدیم داخی من باتمارام
من هدایت نوریم دین اهلینی من آتمارام
.
.
شامیده آزغین قالانلار نوریمیله یول تاپار
پرچم حق قوزانیبدور بیرق باطل یاتار
باش ویرن اسلامه باشدان کفر سوداسین آتار
قبریمه زوار اولالّار دسته دسته فوج فوج
آختارالّار ساحلی طوفان الیندن موج موج
.
.
عمه جان بو نچه گونده گرچه رنجور اولموشام
نوش جا نیمدور بو محنت چونکه ماجور اولموشام
گو شه ویرانه ده بو امره مامور اولموشام
ظلم و ظلمت کاخینی آخرده ویران ایلرم
کوکب حقم جهانی نور باران ایلرم
.
.
سر سپرده اول «کلامی» بوینوا سال سلسله
عالمه سر خیل اولوب روز ازل بو سلسله
عمه سیندن پای بوس قبرینی ایسته صله
ایلسه حقدن شفاعت مطلقا ایلر قبول
زینبین شان و مقاماتینده حیراندور عقول
.
- سه شنبه
- 23
- مهر
- 1398
- ساعت
- 14:28
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه