گلن خاطری درده
                       رقیه بالام ایوای
ویرن جان قوری یرده
                       رقیه بالام ایوای


قیزیم رنج و مصیبت سنی ایلدی خسته
گهی یولدا پیاده گه عریان دوه اوسته
گتوردی سنی دشمن بوشامه قولی بسته
ویرن جان قوری یرده رقیه بالام ایوای


بو یولّاردا دگوبدی ز بسکه سنه سیلی
یوزوندن هله گئتموب قیزیم نقشۀ نیلی
ئولونجه یاناجاقدور بو نسگللره لیلی
ویرن جان قوری یرده رقیه بالام ایوای


گلوبدور سنه مهمان بابان شاه لب عطشان
دور اگلش ایله صحبت او شیرین دیله قربان
بیله نازیله یاتما اورکلر اولی آلقان
ویرن جان قوری یرده رقیه بالام ایوای


قوناقه اولی حرمت بو مرسوم جهاندی
دو بیر ایله نوازش قیزیم یاتما اماندی
همین بو یارالی باش سنون بیکس آتاندی
ویرن جان قوری یرده رقیه بالام ایوای


دیردون گجه گوندوز هانی اکبریم عمه
منی یادینه سالمور او مه پیکریم عمه
خرابه قاپوسوندا قالوب گوزلریم عمه
ویرن جان قوری یرده رقیه بالام ایوای


بو نسگللرین ائتدی منیم قلبیمی یاره
ولی اولمادی ممکن ائدم دردیوه چاره
همین دردیله گئتدون قیزیم محضریاره
ویرن جان قوری یرده رقیه بالام ایوای


سنین تک بو جهاندا مصیبت چکن اولماز
دلینده غم غربت قولوندا رسن اولماز
شهنشاه حجازین قزی بیکفن اولماز
ویرن جان قوری یرده رقیه بالام ایوای


بو نسگل من زاره ئولونجه محن اولدی
شهنشه قیزی ئولدی کفن پیرهن اولدی
نه قبرین قازان اولدی نه دردین بیلن اولدی
ویرن جان قوری یرده رقیه بالام ایوای


وطن قسمتیم اولسا سنی یادیمه سالام
بالا قیزلاری گورسم سنون عطروی آلام
چکر شامه علاقون گلوب شامیده قالام
ویرن جان قوری یرده رقیه بالام ایوای


وطن فکرینی باشدان بو یرده آتارام من
گیدوب بیرده قیتسم مرامه چاتارام من
بو شام ایچره رقیه  سنیله یاتارام من
ویرن جان قوری یرده رقیه بالام ایوای


قیزیم #تابع دینون قاپوندا گوزی واردور
اودور بیله اثرلی یانیقلی سوزی واردور
ایله دردینه درمان حیالی یوزی واردی
وئرن جان قوری یرده رقیه بالام ایوای