بیله یوزه توکمه گوز یاشون
صبر قیل دایان زینب
حلال ایله سال منی یولا
باغریم اولدی قان زینب

تاپاندا باشسیز جنازه می
اوندا آغلا یان زنیب

باغریم اولدی قان زینب ( ۲ )






سنه دئمم آغلاما باجی
آغلا سینووی داغلا
نقدر ساغدی بو قارداشون
آغلاسن یواش آغلا
او دم که گوردون من ئولموشم
باشیوه قرا باغلا
تحمل ائت آچما باشیوی
ائتمه چوخ فغان زینب

باغریم اولدی قان زینب ( ۲ )






منی حلال ایلیون باجی
من سیزی حلال ائتدیم
گورون بو جانان یولوندا من
بو یولی نجه گئتدیم
وئرنده جان نوجوانلاریم
عین مقصده یئتدیم
وئرون هاموز من کیمی بو گون
سیزده امتحان زینب

باغریم اولدی قان زینب ( ۲ )






سیزی بولون راحت ای باجی
اهل کین یقین قویماز
نه قَدَر ائتسه جفا سیزه
لشگر جفا دویماز
سویان منیم گول جنازه می
گور باجی سیزی سویماز
یانار سیزون حالوزه ئوزی
سیزلرون سویان زینب

باغریم اولدی قان زینب ( ۲ )






ئوزون بو خوردا بالالاری
قویما ایلسون افغان
آنالیق ائت ای آنام باجی
غفلت ایلمه بیر آن
ووراندا قویما مواظب اول
قمچی زمرۀ عدوان
قالوللار آتلار دوشونده بو
دختران زنان زینب

باغریم اولدی قان زینب ( ۲ )






بو اهل بیتیمدن ای باجی
ظلمیله آرالاندیم
وئرنده جان گر چه اکبریم
من ئورکدن اودلاندیم
بو آیرلوق چوخ یامان اولور
گور نه اود دوتوب یاندیم
منه او نازلی رقیه می
باری وئر نشان زینب

باغریم اولدی قان زینب ( ۲ )






واریمدی بیر سوز دئسم باجی
ائتمه ناله و شیون
گتور بو بی کس حسینیوه
بیرجه کهنه پیراهن
اگر چه گول جسمیمی منیم
عور ائدر باجی دشمن
قویالار عریان جنازه می
ای عزیز جان زینب

باغریم اولدی قان زینب ( ۲ )






نه نوعیلن مهربان باجی
آیریلور حسین سندن
نجه دیوم من خدا بولور
دویمادیم سکینمدن
بونی بیلورم بالالاریم
دویمیوبدیلار مندن
بو آیریلوق دردینه بیزی
سالدی کوفیان زینب

باغریم اولدی قان زینب ( ۲ )






حسینه #شوری صباح و شام
آغلا صدقیلن یالوار
علاج ائدر دردیوه همی
کربلایه اول زوار
حرمده آغلا سیزیلدا یان
اوخشاسونلا بو حضار
حسین دلینجه بو وردی دِئ
باغریم اولدی قان زینب

باغریم اولدی قان زینب ( ۲ )



#سبک_خداحافظ_ای_آنام_باجی
#سبک_شیرین_سوزوم_آیدین_اولدوزوم
#سبک_عم_اوغلی_چوخ_گل_سارالار


#وداع    #حسینیه_وداع
#بیله_یوزه_توکمه_گوز_یاشون
#شوری_‌تبریزی
#ترکی