گل ای اولان منه نائب غم آشناسی قیزیم
او آغلیان گوزون فاطمه فداسی قیزیم
داریخما زینبیم اولما بئله پریشانحال
دعا ائله اَله گلسون خدا رضاسی قیزیم
اولار مریض و مریضه داریخما هر ائیوده
گرک مدام ائده سن سنده حق ثناسی قیزیم
کیمین اوینده اولا گر مریضه بیر عورت
خصوصاً اولسا او عورت ائوین آناسی قیزیم
داریخدیرار ائوین اهلین اوزی ده چوخ داریخار
ائوین ده هم پوزولار نقشه و نماسی قیزیم
ائدر که سعی دورا ساغلیقی کیمین ایاقا
مریضه وئرمز اجازه ولی قواسی قیزیم
دوروب اوکس دولانار عادی بیر مریض اولسون
نه من کیمی که اولا سینده یاراسی قیزیم
بو رسمیدور که مریضون ائوی دولوب بوشلار
گلر عیادتینه خویش و اقرباسی قیزیم
ولی منیم ائویمون یوخدی بیر گلیب گئدنی
بو شهریده آناوون یوخدی آشناسی قیزیم
اگرچه من کیمی سیزده غریبسوز زینب
غم ایتمه واردی غریبون بویوک خداسی قیزیم
دعا ائدیم گل قیزیم سنده آمینون سویله
اجابته یتوشر فاطمه دعاسی قیزیم
ائله اذیت ائدور هر نفس چکنده سینم
ئولومدی فاطمه نون دردینون دواسی قیزیم
توکولدولر ائویمه یاندریبدیلار قاپیمی
قوتولمامیش بابامون ماتم و عزاسی قیزیم
او حمله ده بالام ئولدی سینم ده اولدی یارا
اوجالدی نه فلکه فاطمه نواسی قیزیم
آخیبدی بس یارامین قانی ضعف ائدیب دوشدوم
چکیلدی اوستومه فوراً علی عباسی قیزیم
او حال ضعفده گویا آتام دئدی یاتما
اویاتدی فاطمه نی دست حق نداسی قیزیم
گلنده هوشه نه گوردوم عمو اوغلومی جبراً
چکوردی مسجده چرخ ستم قضاسی قیزیم
چکوردیلر قولی باغلی کشان کشان او شهی
او شه که عالم آدم اولوب گداسی قیزیم
او با وفادن اوتور هر مصیبته دوزدوم
که چوخ اولوبدی منه لطفیله عطاسی قیزیم
گرک سنون ده اولا هر غمه قیزیم صبرون
یتنده قارداشوون غملی کربلاسی قیزیم
آتاندا منده اوگون کربلایه یول سالّوخ
او دم که عرشه چیخار قیزلارون نواسی قیزیم
دوشنده مقتله اوغلوم وئرنده جان یارالی
شروع اولار هله اوندا باشون بلاسی قیزیم
وورالار اود یانار اود دا تمام خیمه لروز
سویالا خیمدن هر زیور و اساسی قیزیم
وصیّت عالمینون عالمون یازیب #خوندل
او «خوندلی» که اونون اولمیوب ریاسی قیزیم
گوزل طریقیله یازمیش آنا بالا سوزونی
رضا اولا گوروم اوندان اونون خداسی قیزیم
اگرچه یازدی *جوانمرد ده اورک سوزونی
اونوندا سن دوت الیندن اول آشناسی قیزیم
مقام شعریده اصلا دئمز کی شاعردی
بیر عاصی دور که اولوب عشقوون گداسی قیزیم
- جمعه
- 14
- دی
- 1397
- ساعت
- 16:20
- نوشته شده توسط
- ابوالفضل عابدی پور
- شاعر:
-
امین جوانمرد
ارسال دیدگاه