گل فضّه قاپوم یاندی شرار غمه یاندیم
سقط اولدی بالام محسن اوزیمده یارالاندیم
اوج ایلدی آهیم فلک اطلسه چخدی
ثانی ستمی سالدی ایاقدان منی یخدی
دشمن در و دیوار آراسیندا ایله سیخدی
دوشدی نفسیم تنگه حیاتیمدن اوساندیم
آهیم یِری وار نُه فلکه سالسا شراره
ثانی یارالی قلبیمه ووردی گنه یاره
گَل باشیمی آغوشیوه آل گیتمه کناره
ویر حیدر کرّاره خبر قانه بویاندیم
اخطار ایله گَلسون یانیما نور دو عینیم
گورسون آناسین گوزلریمون نوری حسینیم
ظلمیله یقین قالدی آناسیز حَسَنِینیم
جبراً ایکی نورَسته بالامدان آرالاندوم
قالموب داخی منده اَیاقا دورماقا طاقت
یوخ بیر نفر ایتسون من مظلومه حمایت
ایستوردوم ازل سسلیم ای شاه ولایت
امّا واریدی دشمن، عم اوغلومدان اوتاندیم
اود ووردی بو بی شرم جماعت قاپی یاندی
قویموردوم آچلسون، او یِره اَمر دایاندی
مسمار باتوب سینمه، سینم یارالاندی
اوز اُلماقیمی من بو جراحتدن ایناندیم
زهرا سَسینی تا ایشیدوب فضّه ی نالان
سسلندی گل ای شیر خدا حجّت یزدان
ثانی خانمیم فاطمه نی سالدی ایاقدان
غَشّ ایلدی، باخدوقجا بونون حالینه یاندیم
سرعتله چخوب شیر خدا صحنه او ساعت
ثانی یَخاسیندان یاپشوب شاه ولایت
سویلوب ایده بُلمزدی جسارت بو جماعت
فرمایش پیغمبر اکرمدی دایاندیم
تا گوردی یخوبلار حرمِ ماه لقاسین
دولدوردی گوزین اشکیله، آرتوردی نواسین
اول عصمت کبری باشینا سالدی عباسین
سسلندی دیمه دادیوه گَلماقدا یوباندیم
یارب نیه بس شیر خدا گَلمدی داده
زینب یخلاندا باش آچوخ کرب و بلاده
کلثوم دیدی یوخ بیر عبا، آل عباده
بیر ساتِر اَله گَلمدی هر قدر دولاندیم
انصافدی یا فاطمه سن تک آنام اولسون
امّا اورگیم شام و سحر دردیله دولسون
ظلّام «حسینی» پرینی ظلمیله یولسون
عدلیّه ده قانون جفائیله تالاندیم
- جمعه
- 14
- دی
- 1397
- ساعت
- 19:17
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه