دفن ایدنده جسم زهرانی ولی کردگار
قبردن بیر جفت ال اولدی او ساعت آشکار
بولدی پیغمبر دی اللر صاحبی تعظیم ایدوب
احترامیله او جسم اطهری تقدیم ایدوب
پوزدی حال مرتضانی بو اسفلی ماجرا
وار یری گلسیدی شاه لافتایه بو صدا
ساخلادون مندن سورا یاخشی امانت یا علی
وئر قیزیم زهرانی سن چکمه خجالت یا علی
استراحت گورمیوب اون سگّیز ایل عمرون ده بو
تاپمیوب بیر آن مصیبت دن فراغت یا علی
آج قالوب اوچ گونلریله کیمسه دردین بولمیوب
خوش گونه دائم قالوب عالم ده حسرت یا علی
سالم اعضائیله تاپشوردوم گیدنده من سنه
برگ گل تک نازنین جسمی سلامت یا علی
نه یارالیدی نه دوشموشدی وجودی صدمیه
نه واریدی پیکرینده بیر علامت یا علی
اللری سالم، یوزی سالم گوزی سالم سنه،
ایلدیم تسلیم ایدن ساعتده رحلت یا علی
زلف مشگینی واریدی سرو تک بیر قامتی
موبه مو احوالین ایلردی حکایت یا علی
نه قولی سینمیشدی نه غمدن آغارمیشدی ساچی
نه واریدی گل وجودینده جراحت یا علی
سولدی رنگی قولّاری سیندی بالاسی سقط اولوب
سالدی بو حاله بو نه بیشرم امت یا علی
قلبی داغلاندی گوگردی ضرب سیلی دن یوزی
غصه مرگ اولدی ایاقدان سالدی محنت یا علی
آغلا #صحاف ایلمه هول قیامتدن هراس
یا او گون ایلر سنه زهرا شفاعت یا علی
- جمعه
- 14
- دی
- 1397
- ساعت
- 19:18
- نوشته شده توسط
- ابوالفضل عابدی پور
- شاعر:
-
حاج محمد حسین جنتی مقام
ارسال دیدگاه