سوال ؛ زبانحال حضرت علی (ع)
گور نجه گلشنیمیز زیر و زبر اولدی حسن
چوخ صفالیدی بو کاشانه نظر اولدی حسن
گل اوتور تا کی آچاق با هم ئورک سفره سینی
بو شب سرد و سیه بلکه سحر اولدی حسن
نچه گوندور کی گئدوب فاطمه گلمور ائوینه
بو سفر گور نجه طولانی سفر اولدی حسن
منی اللهه گوره عفو ائله چاره یوخودی
حق دانیشدیم سیزه اسباب خطر اولدی حسن
سایه می ایلیه بیلموردی تحمل دشمن
نخل عشقیم اودی محکوم تبر اولدی حسن
تا کی فریاد ائلدون آی بابا گل ئولدی ننم
یاندیران قلبیمی اول غملی خبر اولدی حسن
دوقوز ائل قویمادیم عالمده بیله غصه نه دی
زحمتیم بیر گونون عرضینده هدر اولدی حسن
منی گلمیشدیله ئولدورمگه مقصد منیدیم
برگ گل توطئه خاره سپر اولدی حسن
ساخلا یاددا آنوی ثانی جوان مرگ ائلدی
رد ائله کیم دئسه تقصیر قدر اولدی حسن
آسمانی ائویمی طعمه نار ایلدیلر
سوزدی اولدوزلاریم ، آشفته قمر اولدی حسن
روحیوی سیخماسا اندوه دانیش سنده بیر آز
بلکه بو صحبتیلن رفع کدر اولدی حسن
او گونی کی سند و مدرکین آلدوز فدکین
گوئیا حاصلی پر سود و ثمر اولدی حسن
سیز کی خوشحال اورانی ترک ائلیوبسوز بیلورم
قییدن وقته ائوه یولدا نلر اولدی حسن
مرتضی مطلبی دوز گتدی مُعمّالی یره
گوزلرین سیلدی حسن قویدی قرا شالی یره
جواب ؛ زبانحال امام حسن (ع)
دئدی بو امتی من اهل جفا گوردوم آتا
اولارین فکر و خیالینده خطا گوردوم آتا
قونشولار بیلمدی اما اولارین حقینده
لبلرینده آنامین ذکر و دعا گوردوم آتا
چوخی فخر ائتدی مسلمانلیقا یثربده ، ولی
هاموسین فاقد وجدان و حیا گوردوم آتا
یارامی تازه لدی کاش آچیلمیدی بو سوز
چون بو درده نه علاج و نه دوا گوردوم آتا
ای یدالله یاپیش اللریمی تیتریورم
اللرونده نفس گرم خدا گوردوم آتا
چوخودی حادثه تلخی او بحرانی گونون
لحظاتین دولی اندوه و نوا گوردوم آتا
داستانین بیلورم آختاروسان هانسی یرین
عمق چشمونده سوالاتی بجا گوردوم آتا
سنی دنیای کلام و سخن و منطیقده
بیر ابر قدرت بی چون و چرا گوردوم آتا
پس بو بیر جمله نی تفسیر ائله جریانی ئوزون
اوستی باغلی سوزی پر ارج و بها گوردوم آتا
یازهرا ...
من گورن محنتی دنیاده حسین گورمیجک
تنگ بیر کوچه ده مین کرب و بلا گوردوم آتا
قالخیزاندا گویه ثانی او آغیر پنجه سینی
پیکریمدن او زمان روحی جدا گوردوم آتا
گوزومی یومدوم، آچاندان صورا ای وای منه
توزا تپراقه بلنمیش بیر عبا گوردوم آتا
- جمعه
- 14
- دی
- 1397
- ساعت
- 21:9
- نوشته شده توسط
- ابوالفضل عابدی پور
- شاعر:
-
وفا منافی اردبیلی
ارسال دیدگاه