نطقیدن قالدی ندن اول لب گویا زهرا
بو سکوت ایلوری آرامیمی یغما زهرا
صحبتون هر غمی دلدن آپاراردی بُلوسن
هر کدردن دلی ایلردی مصفّا زهرا
نیه گفتاریدن اول لعل گهربار قالوب
نیه ایتمور منه درد دلین افشا زهرا
سنیدون ذوق حیاتیم، سنیدون جلوه ی عمر
منه غم خانه دی سندن صورا دنیا زهرا
نولدی صبرون، هامی عمرونده مگر ایلمدون
هر غم و درد و مصیبتله مدارا زهرا
آچ گوزون یوخسا علی دامنینی ایسته میسن
گوره سن اشک بلا خیزیله دریا زهرا
اشک تقطیری بو شدّتله عذاریمده ایدر
دلده کی محنت و اندوهیمی احصا زهرا
سنله تدوین اولونوب دفتر تقوا و عفاف
اولوب اسمونله بو مجموعه محشّی زهرا
جلوه ی نور هدایتسن، او نوری که اولوب
جوهر آب و گِل آدم و حوّا زهرا
چون افق قوس و قزح نقشی اوزونده گورونور
انکساروندن اولوب چرخ معزّا زهرا
سوز دلدن بو عرقدور دوزولوب عارضیوه
یا مه اوسته سَپیلوب عِقد ثرّیا زهرا
نجه بو حال اسفناکه اورک تاب ایله سون
یری وار داده گَله صخره ی صمّا زهرا
هم نوادور منه ذرّات جهان هجرونده
عرش و فرش آغلوری سسلور هامی زهرا زهرا
بو بهاری نیه پائیز ایلدی دور زمان
فصل گُل سختیدی سولسون گُل رعنا زهرا
انتظارونده دی تسبیح و مناجات و رکوع
آختارور جذبه وی محراب و مصلّی زهرا
سنه بیر منزلی زندان ایلدی غم که سیلوب
گردینی مروحه ی طرّه ی حورا زهرا
آچ گوزون، بارقه ی لطف الهی اثرین
گوزلریم بلکه ایده بیرده تماشا زهرا
بیر نفس هم نفس اول منله بُلورسن که علی
اولماسان سن قالاجاق بی کس و تنها زهرا
نوکرون (عابد) اگر چنگ ووروب دامنیوه
دردی وار، دردینه سندندی مداوا زهرا
اودی اخلاصیله سویلر گئجه گوندوز آدیوی
هر نفسده اوزینه ورد ایلیوب یا زهرا
- چهارشنبه
- 19
- دی
- 1397
- ساعت
- 13:15
- نوشته شده توسط
- ابوالفضل عابدی پور
- شاعر:
-
محمد عابد
ارسال دیدگاه