ای رسالت نخلینه مثمر ثمر یا فاطمه
وی ولایت گنجینه والا گهر یا فاطمه
ای جمالون عفت و حجب و حیا آئینه سی
گوهرحریته گنجینه، عرش سینه سی
تاپدی رونق دولتندن معرفت گنجینه سی
عصمتندن اولدی عفت جلوه گر یا فاطمه
سایه سالدی عالم امكانه نور رحمتون
شامل اولدی انفس و آفاقه فیض دولتون
علت ایجاد سن سن، اولماسیدی خلقتون
عالم خلقتدن اولمازدی اثر یا فاطمه
عالم امكاندا سن محبوبه خلاق سن
مجمع الاوصاف سن مجموعه اخلاق سن
آیه تطهیره عنوان كوثره مصداق سن
خلقتوندور حقه خلقتدن نظریا فاطمه
سن او بانوی مجلل سن جهاندا بی بدیل
مثلوه حاشا اولا دنیاده بیر بانو عدیل
درگه لطفونده حاجب دور شرفدن جبرئیل
وئرموسن، سن جبرئیله بال و پر یا فاطمه
ای وجودون زهد و تقوا و عبادت هیكلی
نور حسنوندن اولوب مرآت عرفان منجلی
كفوون اولمازدی جهاندا اولماسیدی گر علی
اولدی كفوون تك ولی دادگر یا فاطمه
سن گلستان تولانون گل رعناسی سن
گنج عرفان و ولانون گوهر والاسی سن
اهل عرفان قطره دور سن معرفت دریاسی سن
بیر ائله دریا كه سرشار گهر یا فاطمه
جلوه سین خورشید آلوب نور جمالوندان سنون
مهر و مه اخذ كمال ایلوب كمالوندان سنون
سوره كوثر اشارت دو جلالوندان سنون
شرح ائدوب قرآن منزل مختصر یا فاطمه
دولتوندن محكم و قائم دی عر شین پایه سی
كون و امكانه سالوب سایه جلالون سایه سی
خلقتون خلقتده اولدی خلقتون پیرایه سی
عالم اولدی سنله شانه مفتخریافاطمه
مدح اوصافندا عاجزدور لسان و خامه لر
غرق اولوب دریای مدحینده هامی علامه لر
اهل عالم دولت شاننده یازسا چامه لر
لایق اولماز شا نیوه اول شعریلر یافاطمه
خلقتوندور شعر ناب خلقته بیت الغزل
طلعتون دیباچه دیوان حی لم یزل
من كیمم حسان ائدنمز مدحت حسن ازل
سن اوزون هم مبتدا سن هم خبر یافاطمه
ای كتاب عفت و عصمتده مضمون حجاب
وئردون اهل عالمه درس عفاف و احتجاب
گوردون اعمانی و لی رخساریوه چكدون نقاب
ائتمدون اعمایه عصمتدن نظر یا فاطمه
گوردی پیغمبر خانم بو پایه ده كرداریوی
سویلدی زهرا ندن ائتدون نهان رخساریوی
بوكی نابینادی گورمور صورت گلناریوی
نه سبب ائتدون بو اعمادن حذریا فاطمه
سویلدون پیغمبره ای خسرو ملك حجاز
دوزدی نابینادی گورمور شرحینه یوخدور نیاز
من كه بینایم منه شرعاً دگول باخماق مجاز
سویلدی احسن قیزیم پیغامبر یا فاطمه
گون اوگون اولدی كه ترك ائتدی پیمبر عالمی
باشیوین باشلاندی باشه یتمین درد و غمی
مرتضی دفن ائتمه میش جسم رسول اكرمی
چكدیلر شورا ده طرح شور و شر یا فاطمه
دفن و كفن حضرته مشغول اولوب تا بوتراب
ائتدیلر شورا بیر عده ظالم كافرماب
مسلمینه اولدی شوراده خلیفه انتخاب
نه خلیفه ، بیر جهول فتنه گریا فاطمه
تا خلافت مسندین غصب ائتدی اول كافر شعار
باشلادی طغیانین، اولدی مركب ظلمه سوار
ائتدی ظلمون خاندان مصطفایه آشكار
وئردی آل اللهه اعلان خطر یا فاطمه
مكریله ائتدی تصاحب معدلت دیوانینی
جیفه دنیایه ساتدی چوخ اوجوز ایمانینی
ایلدی خانه نشین ملك ولا سلطانینی
كامه چاتسون تا اوشوم بد سیر یا فاطمه
تا گرفتار قفس گوردی همای رحمتی
باشلادی گلشنده خفاش جفا جو، صحبتی
جغد و كركسلر او دم بیلدی غنیمت فرصتی
آچدیلار اوج جفاده بال و پر یا فاطمه
بیعته گل یا علی، كافرلر عنوریان ائتدیلر
چكدیلر عقبادن ال دنیاده طغیان ائتدیلر
بیر ائله ایش گوردیلر كی باغریوی قان ائتدیلر
اولدولار مهد ولایه حمله ور یا فاطمه
صحن گلزاره نجه زاغ و زغن ایلر هجوم
گتدیلر حمله ولا درگا هینه اشرار شوم
گلشن عشق و ولا اولدی مكان جغد و بوم
غنچه اولدی اولمامیش گل، خونجگر یا فاطمه
گوردون ایلوب اهل كین باب ولاده اجتماع
بیعته گل یا علی، نجواسین ائتدون استماع
بو كشاكش لرده چكدون نقشه طرح دفاع
باغلادون دفع ائتماقا محكم كمر یا فاطمه
شرم ائدور شرح ایلسون دیل قصه حالاتیوی
نظمه چكسون یوخدی قدرت، خامه احوالاتیوی
كیمده وار اظهار جرعت غصه لی اوقاتیوی
شرح قیلسون، شرحه شرحه سر به سر یا فاطمه
رشته عهدی وفا سیزلار جفادن قیردیلار
مست اولوب پیمانه دن پیمانلارون سندیردیلار
دوتدی ظلمت گوزلرین ،كین مشعلین یاندیردیلار
ووردیلار باب تولایه شرر یا فاطمه
جد و جهد ائتدی ستمگرلر آچیلسون تا قاپی
سن تلاش ائتدون كه قالسون باغلی اول والا قاپی
عاقبت سیندی آچیلدی قهریله اما قاپی
سینه وی ائتدون بلیاته سپر یافاطمه
پیكرون اولدی یئره بو ماجرادن نقش بند
باب رحمت تا آچیلدی ناله وی ائتدون بلند
سسلدون گل فضه گل اولدوم دچار و دردمند
رمزیله ائتدون علی نی با خبر یا فاطمه
سن توكل ایلدون بو ماجراده ذوالمنه
باغلادون محكم كمردفع هجوم دشمنه
بیر جدالنا برابرده خانم سن یكتنه
خصم بی ایمان ولی اوچ یوز نفر یا فاطمه
بیلمورم جور عدودن یا فلكدن شرح ائدیم
دشنه دن،مسماردن،اوتدان، فدكدن شرح ائدیم
یا علی بوینونندا كی تحت الحنكدن شرح ائدیم
یا ائدیم تشریح شمشیر و تبر یا فاطمه
نه روا دور درگهون نار شقاوتدن یانا
حقینی شیر خدانون كینه دن دشمن دانا
هرجفا لر بیر یانا غصب خلافت بیر یانا
كاش اولیدی عالمی زیر وزبر یا فاطمه
مسجده قهرچكنده مرتضانی اهل كین
اولدی بو غمدن ملك لر عرش اعلاده غمین
ایله بیرحاله قالا ندا شهریار ملك دین
وه نلرچكدی شبیر یله شبر یا فاطمه
بو جلال و عز و شان و بو مقام و طمطراق
شانوی درك ائتمدی بولمم ندن اهل نفاق
طاقتون جورو جفانون كثرتندن اولدی طاق
بیر علی بیلدی اودم چكدون نلر یا فاطمه
عفو قیل اولسا جسارت بو عبارتدن خانم
نا امید ائتمه قاپوندا فیض رحمتدن خانم
بهره مند ائت هر ایكی دنیا عنایتدن خانم
گر گناهیم اولسا قیل صرف نظر یا فاطمه
شعرینه شب خیز ایستور پیشگاهندان صله
لطف قیلسان شكر ائدر گر ائتمه سن ائتمز گله
گر چه یوخ اظهاره حاجت،ؤ اركی وار گلمیش دیله
باب رحمت ناامید ایلر مگر یا فاطمه
«عبدی»دن بو چامه نی «شبخیز» استقبال ائدوب(۱)
لطف شعری قلبیمی عشقیله مالا مال ائدوب
فضل حق دور بو كه خالق نایل آمال ائدوب
درگهونده اولموشوق شاعر اگر یا فاطمه
اولین قائل بو شعره «سائل» مرحوم دور (۲)
آستان رحمتونده خدمتی معلوم دور
بارگاه شعرده من خادم او مخدوم دور
گر جسارت اولسا مندن عفو ائدر یا فاطمه
ـــــــــــــــ
(۱) مرحوم علی اکبر عبدی قراملکی
(۲) شعر مرحوم #ذهنی_زاده که ذیلاً ارسال میگردد.
شاعر: مرحوم شب خیز
- پنج شنبه
- 20
- دی
- 1397
- ساعت
- 11:5
- نوشته شده توسط
- ابوالفضل عابدی پور
ارسال دیدگاه