سوال : زبانحال حضرت زینب (س)
منی آگه ایت بو رازه
باباجان آنام نجولدی
نیه گَلموری نمازه
باباجان آنام نجولدی
بابا قبره کیم منیم تک
آناسین روانه قیلدی
ایوی یاتمادیم دولاندیم
گئجه گیچدی صبح آچلدی
سوله شب نمازین آخِر
آنامیز هایاندا قیلدی
باخ او خالی جانمازه
باباجان آنام نجولدی
دوشه گر یولوم بقیعه
تاپارام او درّی هاردان
آتاسی ئولندن اول گُل
ایله طعنه گوردی خاردان
نه شکایت ایتدی غمدن
نه گلایه قونشولاردان
نه دل آچدی سوز و سازه
باباجان آنام نجولدی
بو جماعته دین یوخ
ندن اهل نفرت اولدوز
آنام آغلیاندا گولدوز
بیله بی محبّت اولدوز
داخی ایتمیون گلایه
آنام ئولدی راحت اولدوز
وار ئورکده درد تازه
باباجان آنام نجولدی
آنا فکرینی باشمدان
باباجان آتانمارام من
اورگیم دولار، مراده
بُلوسن چاتانمارام من
آنام اولماسا یانمدا
گئجه لر یاتانمارام من
نجه گیتدی خواب نازه
باباجان آنام نجولدی
او همای بیت الاحزان
داریخوب چولی گَزردی
ایشیدردی طعنه لی سوز
ولی صبر ایدوب دوزردی
پر و بالی سینماسِیدی
نجه مندن ال اوزردی
نه گَلوب او شاهبازه
باباجان آنام نجولدی
بابا وار رموز هجران
قطرات گوزیاشندا
آنامون غمی قویوبدی
الیوی اورک باشندا
او جوان ئولن آنانین
قیزی قالدی بِش یاشندا
سالارام نوا حجازه
باباجان آنام نجولدی
گَلر آه و زاره کلثوم
قره کوینگین گینده
یانارام سیزیلدارام من
حسن اوخشاما دینده
دوتارام دیله حسینی
گئجه لر سو ایستینده
باجیام او دلنوازه
باباجان آنام نجولدی
قاپومیز بیزیم یانان گون
آنامون سسین ایشیتدیم
قولونی دوتاندا فضّه
باشی اوسته منده گیتدیم
او سنون دالونجا گَلدی
ولی من ایوه قِییتدیم
منه ویرمدی اجازه
باباجان آنام نجولدی
منی بیر گئجه چاغوردی
یاننا او دل شکسته
دیدی باشیم آل دیز اوسته
دیدیم ای آنا گوز اوسته
دیدی سن بویوک قیزیمسان
غم الیندن اولما خسته
وای او سرو سرفرازه
باباجان آنام نجولدی
نولی اول وفالی بیر گون
آلا محسنی قوجاقه
سالا یاده دورت بالاسین
گَله مجلس فراقه
دیه خوش صفا حسینیم
او شکسته دل قوناقه
چخا فضّه پیشوازه
باباجان آنام نجولدی
اورگیم دولوبدی اوخشار
گوزیمه بهارین ابری
ندی چاره سیل اشکیم
یخا گر بنای صبری
بویور ای بابا آنامین
نیه گیزلین اولدی قبری
گئجه حمل اولوب جنازه
باباجان آنام نجولدی
جواب : زبانحال حضرت علی (ع)
داخی دور ایاقه زینب
آناوین یرین یغشدور
ایله منزلی مرتّب
آناوین یرین یغشدور
بُلوسن قاپی یاناندان
آناوین حالی نجِیدی
مرضی بدون درمان
غمی بی معالجِیدی
بو گیچن گئجه عزیزیم
منه چوخ چتین گئجِیدی
دوشه جاق خیاله هرشب
آناوین یرین یغشدور
گوزلیم بقیعه گیتمه
که او چول بلالی چولدی
دل مرتضانی اوردا
محنین خدنگی بولدی
خبر آلسا قونشولار گر
نیه فاطمه تیز اُلدی
دی نهانیدور بو مطلب
آناوین یرین یغشدور
آناوی قیزیم بو امّت
غم و ابتلایه سالدی
نه اونا سلام ویردی
نه منیم سلامیم آلدی
تالان اولدی گلشنیم، گور
نجه باغبان قوجالدی
ای عزیزه ی مودّب
آناوین یرین یغشدور
یادا سال او روزگاری
که وصالینه چاتاردون
سنه لایلای دینده
گوزیوی یوموب یاتاردون
او اویاق قالاندا سنده
دوروب ال باشا آتاردون
قوتاروب او تابیلن تب
آناوین یرین یغشدور
دیمه اول همای قدسین
قانادی قیزیم سنوبدی
داخی صبریمون نهالین
غمی ریشه دن یونوبدی
پر و بال آچوب بیر آیری
چمنه گیدوب قونوبدی
واری دلده ذکر یارب
آناوین یرین یغشدور
وار اگرچه بش یاشون، سن
ایویمه بویوک خانمسان
باباجان دی، دمبدم قوی
یوزیوی اُپوم جانمسان
آدی زِینِ اَب، رگیمده
جریان تاپان قانمسان
بالام ای ستوده منصب
آناوین یرین یغشدور
قیزیم آز سیزیلدا، ناله ن
حالیمی دگرگون ایلر
اولی شرمسار ایشیتسه
سسیوی شکسته نیلر
حسن و حسین و کلثوم
بیله حالی گورسه نیلر
اوزون ایلمه معذّب
آناوین یرین یغشدور
آتاوی او گونکه دشمن
بالا بیعته آپاردی
آنان اولماسِیدی اوردا
منه قاتل ال تاپاردی
توکولردی مسجده قان
گینه ولوله دوشردی
آرادان گیدردی مکتب
آناوین یرین یغشدور
گئجه لر آنان بُلردیم
سنه دردینی دیردی
باشوا ووراندا شانه
سارالان یوزون اُپردی
داخی قالدی توپراق آتدا
اوزی هم اورکده دردی
که قِییتمز اول محجّب
آناوین یرین یغشدور
دیمم آغلاما عزیزیم
ولی آغلاسان آز آغلا
اورگون بقیعه دوندر
آنا قبرینی قاز آغلا
قلمون مژه، یوزون لوح
گِله نامه سین یاز آغلا
ایله اشکیوی مرکّب
آناوین یرین یغشدور
بو دلیله قبره قویدوم
گئجه فاطمه عذارین
که قاپومی یاندورانلار
تاپا بُلمیه مزارین
یری امنیدور داریخما
داخی چکمه انتظارین
یومولوب او حق دیَن لب
آناوین یرین یغشدور
- یکشنبه
- 7
- بهمن
- 1397
- ساعت
- 8:56
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه