ای حقی باتان همسریم آواره دایانما
سن بیل حسنون جانی علی مندن اوتانما
بو ائوده وداع مجلسی بر پادی عم اوغلی
چوخ آغلاما آلله ئوزی قادردی عم اوغلی
زهرا حلال ائله مسافردی عم اوغلی
هر لحظه سی رنگینیدی بو زندگی والله
آز السادا شیرینیدی بو زندگی والله
بیر کاه گلی منزلی رضوان ائلمیشدون
هر گوشه سین صحن گلستان ائلمیشدون
نوریله بو گلزاری چراغان ائلمیشدون
عشق و شعف و رحمتیدی خشت به خشتی
کیم راضی اولار ترک ائده با پاک بهشتی
گئتمزدیم عم اوغلی منه مسمار دئور گئت
گوگلوم چاغیرور قال ؛ در و دیوار دئور گئت
محسن منی گوزلور ، دل بیمار دئور گئت
سن دورد گولومون یاوری اول فصل خزاندا
من غنچه مه لایلای دئرم باغ جناندا
دشمن قاپومی اوتلادی بیر شازشه خاطر
خورشید مثالی اریدون تابشه خاطر
چوخ زحمته دوشدون بیزیم آسایشه خاطر
تقدیر و تشکر ائدورم سندن عم اوغلی
زینب جانی راضی گئدورم سندن عم اوغلی
مجروح ئورگیم دیده گریانووه قربان
عمریم ، نفسیم ، حال پریشانوه قربان
احساسوه ، ایثاروه ، ایمانوه قربان
سینَمدَن آخوب قان ، یره بو جمله نی یازدی
مین دفعه ئولم پاک یولوندا گئنه آزدی
تصویر اولوب اعجاز مسیحا باخیشوندا
قویما یارانا موجلی دریا باخیشوندا
من ایلمیشم زندگی زیبا باخیشوندا
ای حضرت باران ائله احسان حسناتی
باخ گوزلریمه نوش ائلیم آب حیاتی
گوزله بویوک اوغلومدان اونون یاره دی قلبی
مولود غم و محنته گهواره دی قلبی
بیر صحنه گوروب کوچه ده صد پاره دی قلبی
قویما حسنه بیر کس آجیخلانسون علی جان
ئوز حالینه بوشلا آلیشوب یانسون علی جان
ثابتدی بوتون عالمه رفتار و مرامون
بیر گون گزر آفاقیده پژواک پیامون
چوخ غم یئمه گر آلماسا بیر کیمسه سلامون
حورا سنون اسراروی تشریح ائلیورلر
هر صبح و مسا آدووی تسبیح ائلیورلر
- پنج شنبه
- 20
- دی
- 1397
- ساعت
- 11:46
- نوشته شده توسط
- ابوالفضل عابدی پور
- شاعر:
-
وفا منافی اردبیلی
ارسال دیدگاه