گَل جان ویرورم موسم هجراندور عم اوغلی
آثار اجل منده نمایاندور عم اوغلی
مدّتدی دیردیم اُلوم اولسِیدی نصیبیم
آسوده اولوردوم من غمدیده حبیبیم
آخِرده دوا ایلدی بو درده طبیبیم
بو صون نفسیم ایسته دیقیم آندور عم اوغلی
چوخداندی چکردیم بیله بیر ساعته حسرت
اوز محضرینه یاریم ایدِیدی منی دعوت
چوخ شکر ایدرم اولدی مرامیم منه قسمت
منظور دلیم محضر جاناندور عم اوغلی
جان اوسته ایدوب محنت هجران منی غمگین
ای ناطق قرآن، اوزی سرمطلع طاسین
اگلش باشیم اوسته اوخی بیر سوره ی یاسین
تسهیل ممات آیه ی آیه ی قرآندور عم اوغلی
چکدیم هامی اندوه و غم دار فنانی
گوز یاشی کیمی قلبیمون آخدی یوزه قانی
آگهسن اوزون سالدی ایاقدان منی ثانی
ثانی ستمیندن اورگیم قاندور عم اوغلی
قویدی گُل طاهانی عدو خار آراسندا
یخدی منی ثانی یره اشرار آراسندا
سندی قولوم آخِر در و دیوار آراسندا
بو درد مگر قابل درماندور عم اوغلی
یاندوردی او گون که قاپومی قوم بد افعال
بیر سقط جنین ایتدیم اوزیمدن قاباق ارسال
تا مندن آپارسون باباما محسنیم احوال
کشف ایلسون امّتده نه طغیاندور عم اوغلی
دعوت منی ایتمیشدی بابام باغ جنانه
ثانی ستمی اُلماقیما اولدی بهانه
بیر صورت نیلی ولی ایستردی نشانه
سوغات سفر عادت مهماندور عم اوغلی
شاهد دوتارام حشریده خلّاق جلیلی
من اُلمه دیم، اُلدوردی منی ثانی دلیلی
پهلوی شکسته، گُوَرَن قول، رخ نیلی
زهرانی شهید ایتماقا عنواندور عم اوغلی
یاندی اورگیم ملکیمی دشمنلریم آلدی
آج قالدی حسین و حسنیم، سولدی سارالدی
آخِر منی بیر حاله فدک قصّه سی سالدی
جنّتده بابام ایمدیده نالاندور عم اوغلی
گَلسون دیمورم خویش و ایل آخِر نفسیمدور
اطفالیمی گورماق بو گون عمده هوسیمدور
بیر اوغلوم حسین گَلسه اُلن دمده بسیمدور
جسمیمده حسینیم بُلوسن جاندور عم اوغلی
من گیتمه لیم، فکرت اطفالی سن ایله
قویما گَله لر شیونه رفع محن ایله
مخفی منه ویر غسل، گئجِیله کفن ایله
بو سوز سنه مشکل، منه آساندور عم اوغلی
آز قالدی کسه روحیم علاقه بدنیمدن
قطع ایلمه عُلقه سن حسین و حسنیمدن
شیون اوجالار خُلدیده افسرده تنیمدن
گورسم بالامون گوزلری گریاندور عم اوغلی
لازمدی ایدم من سنه بیر نچّه وصیّت
هر قدر اَلوندن گَله قیل زینبه رافت
چون قلبی سنقدور اونا چوخ ایله محبّت
من تک اودا مظلومه ی دوراندور عم اوغلی
باشدا بو قیزون وار نه بلاسی بُلورم من
هر غمده منه نائبه دور، مونسی شیون
گویا گورورم کرب و بلاده بونا دشمن
ایلولّه او که ظلم فراواندور عم اوغلی
قولّارینی باغلالّا، دوزر غصّه دن اُلمز
ارثیّه دی مندن اونا ناله، یوزی گُلمز
من بُلّم اونون حالینی بیر اوزگه سی بُلمز
اوز حالیم اونون حالینه میزاندور عم اوغلی
بیر کس بونا هم درد و شریک محن اولماز
عبّاس و علی اکبر گُل پیرهن اولماز
قارداش چاغوراندا سسینه سس ویرن اولماز
هم ناله سی بیر جمع پریشاندور عم اوغلی
ای جدّه ی مظلومه سنی زینب کبری
«سعدیّ زمان » نطقینه لطف ایت اولا گویا
عرض ایله عمون اوغلونا ای عصمت علیا
جنّتده حسینی منه مهماندور عم اوغلی
مستخدم دربار حسین بِش نفر احرار
بو مطلبین انشائینه ایتدی منی وادار
قیل اوغلون حسینه اولاری هم منی زوّار
قبرینده دیاخ موسم هجراندر عم اوغلی
- چهارشنبه
- 26
- دی
- 1397
- ساعت
- 13:38
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه