قلمله وصف اولا بیلمز کمالی زهرانین
دوغولمیوبدی دوغولماز مثالی زهرانین
گوروب جمالینی چخمازدی آی خجالتدن
ائدیب ملک لری حیران جمالی زهرانین
اونون قباله سینه ثبت اولوب یرین سولاری
غم ائتمه اولمادی مال و منالی زهرانین
آلاردی حقینی ناباب غصب ایدنلردن
اگر اجلدن اولیدی مجالی زهرانین
او گون که شیر خدا اولدی ائوده خانه نشین
جهاندا اولمادی قالماق خیالی زهرانین
یازان زمان قلم آغلار اورک فغانه گلر
کدرلی دیر او قدر شرح حالی زهرانین
وئرردی آجلارا اوز رزقینی ، سخاوتده
دگولدی حاتم طائی مثالی زهرانین
یتیم اوشاقلاری گورجک نوازش ایلردی
اولاردی تازه یتیملک ملالی زهرانین
باشی نه چوخلی بلالر چکیب آز عمرونده
دگولدی خوش یاشاماقلیق مآلی زهرانین
زمان اوته نه قدر ، قدری گون به گون آرتار
داغیلسا عالم اگر یوخ زوالی زهرانین
نجه قان آغلاماسین چکمه سین قلم فریاد ؟
دوتوب عزاسی بو گون هر محالی زهرانین
شهید زنده دی ئولمز بو حکم قرآندیر
دوشونده واردی شهادت مدالی زهرانین
اولوب اورکلره حاکم همیشه لیک قالاجاق
زمانلا آرتاجاق « آذر » جلالی زهرانین
مرحوم آذر زنجانی
- چهارشنبه
- 26
- دی
- 1397
- ساعت
- 13:53
- نوشته شده توسط
- ابوالفضل عابدی پور
ارسال دیدگاه