مرتضی ایستدی دفن ایلیه زهرانی گجه
چاغروب خدمتینه فضّه و اسمانی گجه
احتیاجی کمگه چوخ چوخودی مولانون
اودی احضار ائلدی بوذر و سلمانی گجه
بیلمسین تا کی بیری فاطمه تشییع اولونور
یوخویا وئردی علی سنگدل اعدانی گجه
غسل ائدنده گوزی دوشدی گویرن گل یوزونه
مرتضانون گویه اوج ایلدی افغانی گجه
دئمیوبسن دئدی حتی منه ده سیلی سوزون
آشکار ائتدی آیین نوری بو جریانی گجه
شل اولیدی او الی که یوزووه دگدی سنون
گوندوزون ثانیِ دون ایلدی ظلمانی گجه
مجمر غصّه و آلامیده یاندی اورگیم
گورمییدی علی کاش یاره لی اعضانی گجه
باغلیوب اللریمی امر رسول ثقلین
قویمازیدیم بئله راحت یاتا اعدانی گجه
کیمده جرئت واریدی صورتیوه سیلی ویرا
ائلیردی گونوزون جنگلر اصلانی گجه
الغرض یدّی نفر همدم اولوب مولایه
قبره حمل ایلدیلر هیکل تقوانی گجه
یولّادی بوذر و سلمانیده حتی ائوینه
بیر نفر اولمادی یاری ائده مولانی گجه
محرم حتی یوخودی وارد اولا قبر ائوینه
مرتضادن آلا تا پیکر بی جانی گجه
ناگهان قبریدن اولدی ایکی ال ظاهر او دم
آلا تا قبره قویا دختر طاهانی گجه
مصطفانون الینه گوردی او اللر اوخشور
قلبی تسکین بیر آز تاپدی او بحرانی گجه
آلدی پیغمبر اوزی چون یارالیدی سینه سی
قبره آهسته قویوب امّ ابیهانی گجه
مصطفائیله غرض ائتدیله توپراقدا نهان
پر بها گنج کیمی نور دو چشمانی گجه
دفنیدن فارغ اولوب قوردی عزا بزمی امام
نالیه گتدی دل آدم و حوانی گجه
خرمن صبره شرر توکدی علینون آهی
داغدار ائتدی دل عالم امکانی گجه
الی قوینوندا دئدی اوخشاما طاها قیزینا
زار و نالان ائلدی مریم و سارانی گجه
مرتضانون او گجه آه دل سوزانی
آغلادوب طشت طلاده سر یحیانی گجه
بیر حزین صوتیله بیردن دئدی ای وای زهرا
سالدی بحر غمه نوحیله سلیمانی گجه
قوینونا تاکی الین فاتح خیبر قویدی
اشکبار ایلدی ایوب شکیبانی گجه
اولدی ظاهرده اوزی سینه زن و باطنده
گتدی نوحه دیه داوود خوش الحانی گجه
دیه بیلّم او گجه دوتدی مسیحاده عزا
راهبه ائتدی عزا خانه کلیسانی گجه
غمی تاثیر ائلدی قلب کَلیمُ اللّهَه
گوردیله عدنیده گوز یاشلیدی موسانی گجه
سو سپوپدی نچه قبر اوخشادیلار بیر بیرینه
تا کی نبش ائتمیَه لَه مَرقد اخفانی گجه
نه تسلّی وئره نی اولدی نه الدن دوتانی
آز قالوردی چیخا تندن یورولان جانی گجه
دئدی سندن صورا دای دردیمی چاهه دیرم
حالیمه آغلادارام وادی بطحانی گجه
دئدی زهرا کمگیم بیر سنیدون عالمده
سنده تک قویدون عزیزیم بو پریشانی گجه
گوزلریمدن توکولن یاش نه فقط گوز یاشیدی
قارشیب گوز یاشیما قلبیمون القانی گجه
صبر عطا ائتمسه الله سحره چیخماز علی
وار یری دست اجل دوتسا گریبانی گجه
عم قیزی بیر گوزون آچ گورنجه حالیم پوزولوب
غصّه لر سالدی ایاقدان شه مردانی گجه
نقدر عمروم اولا آغلیارام بو مُحَنه
بس ندن دفن ائلدیم من سنی پنهانی گجه
یاندی نار غمه پیغمبر ئولنده اورگیم
سن رضا اولما دوباره اولا بریانی گجه
عمروم ای کاش یته باشه بو گجه راحت اولام
سن کیمی دفن ائدله ناطق قرآنی گجه
سیندیروبدی بلیمی فاطمه بار مُحنون
خم ائدوب آیریلیقون قامت رعنانی گجه
غم منی بوشلاسادا دای غمی من بوشلامارام
بیت الاحزان ائدرم بو دل سوزانی گجه
بو گجه من یوخونی گوزلریمه ائتدیم حرام
یومّارام صبحه کیمی دیده ی گریانی گجه
صبحه جاق گوزیاشیمی قبروون اوسته الرم
مرتضانون یری وار ایسلانا دامانی گجه
- پنج شنبه
- 27
- دی
- 1397
- ساعت
- 12:52
- نوشته شده توسط
- ابوالفضل عابدی پور
- شاعر:
-
حاج روح الله رمضانی
ارسال دیدگاه