زینبین آی ئورک ائوین،قانیله غرق ائدن ننه
روحی گئجِیله پر آچوب،قبر ائوینه گئدن ننه
ای شرف آشیانه‌سین،هجریله یاندیروب گئدن
غیرت اهل یثربی،جمله اوتاندیروب گئدن
غسلینی گون باتان چاغی،اَلده یوباندیروب گئدن
همسرینه او لحظه ده،غملری پای وئرن ننه
هر گئجه یوخ یئرونله من،غصّه لری قوجاخلارام
دستِ مصیبتیله بو ، تئللریمی داراخلارام
گاهی حسنله آغلیوب گاهی حسینله آغلارام
ای منه قاره بختیمون سرّینی سویلویَن ننه
ای کی تک اَللی قبله ده،خالقینه نیاز ائدن
ئولمَقیله بو محفله،باب فراقی باز ائدن
گئلمیر او آغلاماق سسین،یوخدی بیر اعتراض ائدن
آی اونا بسدی آغلاما،قونشولاری دئین ننه
هردَن آتام دییر سنه،ای سارالان جوانه میز
خوش گونه امّید اولمیون،سؤندی چراغ خانه میز
خاطره ی حزین دور،اود توتان آستانه میز
بعضی دییر یانان ننه ،بعضی دییر ئولن ننه
گؤردوم حَسن دن آشکار،آلدی آتام خبر گلوب
صحنه چیخیبدی خانه دن،سمتیمه دیده تر گلوب
ایندی بیلیبدی کوچه ده،صورتیوه نَلَر گلوب
هی دیور آغلیور سنه،سیلی دن اینجیَن ننه
باخجاغین هامّی آغلاشور،سن سیز اطاقِ خالیه
یوخدی ترحّم اِیلین،قلبِ منِ عزالیه
اهل مدینه گئلمدی،بیزلره هئچ تسلّیه
ای اونی اؤز سراسینون،غربتی ئولدورن ننه
درد و دِل اِیلییر آتام،بولبولِ نغمه خوان کیمی
گئتدی قیزیم دییر آنان،گویلره گون باتان کیمی
یوردی منی بو زندگی،فاطمه نی یوران کیمی
دائما آغلیان گؤزی بختینه گولمویَن ننه
- چهارشنبه
- 4
- فروردین
- 1400
- ساعت
- 22:9
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه