ای گئدن قبره گجیلن
سینه سینده یاره زهرا
نیلیوم عالمده سنسیز
قالمیشام آواره زهرا
دور عم اوغلون باغریقاندی
حیدره سس وئر اماندی
ای گل یاس کبودیم
غصه دن دل داغلیام من
گلمیشم ظلمیله پرپر
یاسیمه یاس ساخلیام من
نصف شب گلدیم بقیعه
قبرون اوسته آغلیام من
بو مزارون اوسته هر شب
دلخوشام دیداره زهرا
سیل تک اشکیم رواندی
حیدره سس وئر اماندی
فاطمه مدیونووم من
یاور و دلداریم اولدون
سن منیم دوتدون الیمدن
غم گونی غمخواریم اولدون
دوقوز ایل گنج ولاده
محرم اسراریم اولدون
قویمادون آخر دییَم من
دردیمی اغیاره زهرا
احترامین بی کراندی
حیدره سس وئر اماندی
ای بلالر آشناسی
خوش گونه حسرت قالان وای
گلشن زیبای عمری
باد محنتدن سولان وای
حامیِ شاه ولایت
حیدری الدن آلان وای
مرتضانین جانی قربان
بیر بئله ایثاره زهرا
اوج ایثارون عیاندی
حیدره سس وئر اماندی
گوز دولار اشک تریلن
من نهان اسراری گورسم
آه چکوب جان جان یارالی
سسلرم مسماری گورسم
یوز قویوب دیواره یانّام
هر زمان دیواری گورسم
اُفّ اولا دیواره زهرا
عار اولا مسماره زهرا
مرتضانین قلبی قاندی
حیدره سس وئر اماندی
بوش اتاقینده پریشان
آغلیار مه رو حسینیم
بیر پارا گوشواره الده
درده ائتمیش خو حسینیم
نیلیوم من نصف شبده
ایستسه گر سو حسینیم
تا سحر یوخ خواب راحت
دیدۀ بیداره زهرا
گوللره فصل خزاندی
حیدره سس وئر اماندی
- شنبه
- 29
- دی
- 1397
- ساعت
- 20:31
- نوشته شده توسط
- ابوالفضل عابدی پور
- شاعر:
-
ابوالفضل عباسی معروفان
ارسال دیدگاه