بانگ محنت زمانه دن گلوری
نکهت یأس خانه دن گلوری
گینه آواسی مهربان آنامین
ضبط اولوب قلب خانه دن گلوری
طفل قلبیملَه بیله اویناماقا
هوس کودکانه دن گلوری
گوش جانه صدای لالاسی
یاخشیراق هر ترانه دن گلوری
گینه ده عطر زلف مشگینی
او قالان کهنه شانه دن گلوری
آنامین جانمازینون عطری
گینه محراب خانه دن گلوری
جانمازی اونون نشانه سیدور
نکهتی اول نشانه دن گلوری
هم صدای دعاسی یرده قالان
سَبحۀ دانه دانه دن گلوری
باشدا چادر شبی نماز اوسته
سسی محراب خانه دن گلوری
یادیمه صحبتی گوزل آنامین
گئجه لر هر کرانه دن گلوری
گینه ده عطر بوی پُخت و پَزی
ائوده بزم شبانه دن گلوری
طایر روح بخش ایدوب پرواز
نغمه سی آشیانه دن گلوری
دمبدم داغلی قلبیمه حسرت
یاد یار یگانه دن گلوری
یاد عشقی آنالارین (تائب)
نفس عاشقانه دن گلوری
- شنبه
- 29
- دی
- 1397
- ساعت
- 20:34
- نوشته شده توسط
- ابوالفضل عابدی پور
- شاعر:
-
صادق تائب
ارسال دیدگاه