روح سبز آفرینش ، روح پرور فاطمه
فعل ده فانی عرض دن عاری ، جوهر فاطمه
آیه تطهیردن آیت ، مطهر فاطمه
ارتزاق ایلر هامی سر سفرسیندن کائنات
عقل لر درکینده حیران ، خامه لر وصفینده مات
فاطمیه گلدی ای شیعه گئیین غم جامه سین
قویما قالسین یرده زهرانین عزا برنامه سین
ایستیور تحریف ائده دشمن زیارتنامه سین
عصمت اللهی دئور دیوار و در ئولدورمیوب
درد پیغمبر سالوب دیلدن عمر ئولدورمیوب
خلق آرا تبلیغ ائدور اول قیز که زهرا نامیدی
هجر طاهادن اسیر غصه و آلامیدی
بیر ضعیفه قامته صاحب ، نحیف اندامیدی
سینه سین مسمار ، درگاهی یاناندا بولمه دی
جسمینه بیر جزئی صدمه دگدی اما ئولمدی
هئچ دیمور ناکس عمر ظلمون پدیدار ایلدی
زندگینی دختر طاهایه دشوار ایلدی
سالمیدی ، ثانی ویردی یخدی بیمار ایلدی
رشته عمر بتولی قیردیلار ئولدوردولر
فاطمه ئولمزدی والله ویردیلار ئولدوردولر
حضرت صادق بویورمش درده الفت باغلیون
فاطمیه ماتمینده کائناتی داغلیون
ئوز ننوز ئولسه نئجه آغلارسوز ائله آغلیون
ئوز ننوزدی فرض ائدون زهرا ننم ای وای دئیون
اوخشامازدا زینب عمم تک ننم لایلای دئیون
هئچ شرافتلی کیشی وجدان سوزون رد ائلمز
چیخماز انصافین یولوندان ظلم بی حد ایلمز
بیر یارالی عورتین قهرا یولون سد ایلمز
بیلدی که پیغمبر امری باغلیوب حیدر قولون
فوری جرات تاپدی ثانی کسدی زهرانون یولون
باخما بعضی غافله ، نا اهله بیعت باغلیوب
یخماقا دین رسولی شال همت باغلیوب
دشمن زهرائیلن عهد اخوت باغلیوب
بیز ولی نامحرمان حقه یولداش اولماروق
سُنّییه مین ایلده بوندان صورا قارداش اولماروق
اویماروق اندیشمند و کاتب قلابیه
بعضی لر مزدور اولوب یک لاقبا اعرابیه
جان و دلدن خدمت ایلور فرقه وهابیه
سینه زهرانی جبرا سیندیرانلاردور بولار
فاطمه رخسارینه سیلی ویرانلاردور بولار
سائل اولماق باب زهراده شرافتدور بیزه
بیز بهشتی نئیلوروک زهرا کفایتدور بیزه
قاره پرچم هر یره نصب اولسا جنتدور بیزه
شیعیه هر یئردن آرتیق محفل غم یاخشیدی
اولماسا زهراسی ، جنتدن جهنم یاخشیدی
جنگه اقدام ایلینده شاه ملک ارتضا
صولتیندن هم قدر حیران قالاردی هم قضا
دمبدم سسلردی یا زهرا علی المرتضا
حیدری زهرا آدی قویمازدی قالسین تنگیده
بو دلیله فاتحیدی مرتضی هر جنگیده
حیف اولا خوش گونلری گچدی خزانه دوندی یاز
امر واضحدی گلون عمری اولار دنیاده آز
فاطمه ئولدی غریب اولدی علی تک یکه تاز
محنت زهرا علینی بیر گونه پیر ایلدی
سالدی دیلدن غزوه لر شیرین زمینگیر ایلدی
غسل زهرای بتولی قویمادی قالسین گئجه
باشلادی طبق وصیت کفن و دفنه اول گئجه
بیلمورم ئوز یارینه غسل ایلدی آخر نئجه
ای فلک صبر علینی گور نئجه ویردون محک
نعشی تابوته قویاندا آلدی اسمادن کمک
کوچدی شادلیق اول گئجه کاشانه اربابیدن
مرتضی تشییعه دعوت ایلدی احبابیدن
گلدیلر یدی نفر محرم اولان احبابیدن
آلدیلار دل داغلی صرافین سینیق یاقوتینی
ائتدیلر خارج ائویندن فاطمه تابوتینی
دللری نه منظره قان ایلدی قالسون هله
ناقه صبر حسینی پیلدی قالسون هله
باخدی اول تابوته زینب نیلدی قالسون هله
مرتضانی گوردولر بیر حالیده قان اوتدولار
دیزلری اسدی یخیلدی قولتوقوندان دوتدولار
گور بقیع و طول راه روضه پیغمبری
آز مسافت واردی ای حرف حسابه مشتری
چوخ زمان چکدی یتیرسونلر بتول اطهری
چونکه تئز تئز اگلشوردی کوچه ده حیدر یره
یول گئدن وقته دگوردی فاتح خیبر یره
گتدیلر تابوت زهرانی بقیعه الغرض
جمله اصحابه بویوردی اول وجود بی عرض
زحمته دوزدوز گوروم الله عطا قیلسون عوض
قدردانم حق ئوزی وئرسون جزای خیروزی
مستدام ائتسون طریق معرفتده سیروزی
اهل بیتوز منتظردی بوردا آرتیق قالمیون
یول گوزتلوللر اولاردان صبر قلبی آلمیون
نصف شب دی گئتمگی تاخیره بیجا سالمیون
تئز دوشون الآن یولا مشعل لری خاموش ائدون
آیریلون هر تک تکوز بیر کوچه دن گیزلین گئدون
سیز گئدون بوندان بئله ، چوللرده سرگردان منم
سیز گئدون راحت یاتون بیدار ، قبرستان منم
سیز گئدون آباد ائوز واردی ، ائوی ویران منم
صحن قبرستاندان ئوزگه جای راحت یوخ منه
دهردیده زهرا سیز ائو یوخ استراحت یوخ منه
عاقبت اصحاب منظور امامه یئتدیلر
اوپدولر آغلار گوزوندن تسلیت عرض ائتدیلر
تک قویوب مولانی قبرستاندا بیر بیر گئتدیلر
لیل یلدایه دولاندی شام هجرین اولی
بیر فقط او چولده زهرا قالدی بیر مظلوم علی
دلده طوفان ائتدی دردی ، یاغدیروب گوز ابرینی
قبر زهرانی قازاندا غم آزالتدی صبرینی
حیدر ئولمشدی قازوردی گوئیا ئوز قبرینی
غیبی امداد اولدی ، سانکه عالم لاهوتیدن
پیکر زهرانی خارج ایلدی تابوتیدن
باغرینا باسدی بتولی باشه ویردی آغلادی
هی کفن گئیمش نگاره باخدی قلبین داغلادی
یدی دفعه خلعتین باش بندین آچدی باغلادی
هی گویرمیش صورتی گیزتدی قلبی قویمادی
هر نقدری باخدی زهرانون یوزوندن دویمادی
سسلدی گل سینمه ای مصطفانون سوسنی
باری محروم ائلمه فیض وداعوندن منی
گوزلرم دیسگینمه آغوشه یاواش آللام سنی
باغبانم رسم عشقین جرگه سیندن چیخمارام
پیکرون زهرا اووولمش گول دی ، آرتیق سیخمارام
عالمین دردین فلک قویدی یانان قلبیمده پای
غسل ائدن وقته نهادیمدن اوجالدی عرشه های
سینوون گیزلین یاراسی اوسته نورین سالدی آی
حالینی آلدیم نظرده زینب بیچاره وون
ال آتوب ئوز کوینگینلن اوستون اورتدوم یاره وون
هانسی گل سن تک ئورکده گیزلدوب خارین یئرین
اسدی قلبیم گورجگین نیش دل آزارین یئرین
ایستدی گویلوم اوپم سینونده مسمارین یئرین
نیلیم اما آتش حسرتده یاندیم ئوپمدیم
زینبون گوردوم گوزی منده اوتاندیم ئوپمدیم
ایستورم گیزلینده قالمیش یاروی الآن ئوپم
تا واریمدی فرصتیم خلوتدی قبرستان ئوپم
ایندیده آشفته قلبیم وئرمیور امکان ئوپم
یاروی ائوده اوتاندیم من ئوپم زینب باخا
بوردا دا قورخوم بودی ئوپسم دوباره قان آخا
گورسنر لرزان سودا عکس مه خوشرو سینیق
سو توکوب گوردوم سنی سنیه یارا پهلو سینیق
صورتون نیلی گوزونده لخته قان بازو سینیق
قالمیشام آواره زهرا یوخدی چارم نیلیوم
بیر کفن پرپر گلی آیا نجه دفن ایلیوم
- یکشنبه
- 7
- بهمن
- 1397
- ساعت
- 9:18
- نوشته شده توسط
- ابوالفضل عابدی پور
- شاعر:
-
مهدی قلندری اردبیلی
ارسال دیدگاه