ای گوزی قانینه غلطان ننه سس ویر سسیمه
گوگرن صورته قربان ننه سس ویر سسیمه
آند ویررم سنی حیدر بابامون غیرتینه
غم الیندن نچه گونده بوکولن قامتینه
حسنینون ئورگینده الم و محنتینه
ایلمه زینبی نالان ننه سس ویر سسیمه
نه گوروبسن حسنینون آنا جان بی لیگینی
نه گوروبسن قیزوون بخت ایوینه گیتمگینی
ویر حسینون گجه وقتی توخونان کوینگینی
قوی باسیم باغریما الان ننه سس ویر سسیمه
عالمون گوزلری تا محشره جک آغلیاجاق
زینبون قاره باشا قبره کیمین باغلیاجاق
غم الیندن قوجالان مادره یاس ساخلیاجاق
عمری آز دردی فراوان ننه سس ویر سسیمه
باجینین دردی اگر اولسا دییر قارداشینا
اولمادی قارداشون اما سالا قاره باشینا
باخمادی کینه لی دشمن حسنون گوزیاشینا
ای ایچن باده ی هجران ننه سس ویر سسیمه
ال توتان سائله طوی جامه سین احسان ایلین
فضه ی خادمه نی حافظ قرآن ایلین
ذکر تسبیحی بوتون عالمی حیران ایلین
ای آدون کوثر قرآن ننه سس ویر سسیمه
سن کی گوزدن قیزووی صبح و مسا آتمازیدون
یاتماسیدی گجه لر صبحه کیمین یاتمازیدون
زینبون بیر توکونی یدی گووه ساتمازیدون
نیه بس قالدی پریشان ننه سس ویر سسیمه
گیت ننه ختم نبی گوزلیور الان یولووی
آلاجاق حوری و غلمان و پری ساق صولووی
گورسه پیغمبر اگر ظلمیله سینمیش قولووی
ایلیر جنتی ویران ننه سس ویر سسیمه
سنده آتسون قیزووی بس منه کیم همدم اولار
باغبان ئولسه مسلمدی گلستانی سولار
زلفینی زینب کبری باشون اوستونده یولار
قدی خم دیده سی گریان ننه سس ویر سسیمه
ئولننجک توکرم گوزیاشی ای وای دییرم
بو آخان اشک لره جوشقون اولان چای دییرم
ترپدیب خردا بشیک اصغره لای لای دییرم
ای ایدن قلبیمی شان شان ننه سس ویر سسیمه
یبت الاحزان منه سن سیز ایله زنداندی ننه
غرقیدور آل نبی بحر ملال و محنه
سنی تاری بو گجه باخ بو سارالمیش چمنه
ای سولان گللره باغبان ننه سس ویر سسیمه
یا محمد قیزووی گورنه حالا سالدی فلک
آغلیور حالینه جن و بشر و حور و ملک
غصب اولوب ظلمیله یا ختم نبی باغ فدک
خاطر احمده بیر آن ننه سس ویر سسیمه
یاز #نوید شعرووی زهرا اوزی امضا ایده جک
دوز چاغیرسون ننمی رتبووی اعلا ایده جک
خود پسند اولسون اگر دهریده رسوا ایده جک
سنده من تک ده نواخوان ننه سس ویر سسیمه
- سه شنبه
- 16
- بهمن
- 1397
- ساعت
- 19:17
- نوشته شده توسط
- ابوالفضل عابدی پور
ارسال دیدگاه