وئروب مساجده رونق بُکاسی زهرانون
ائدوبدی دشمنی رُسوا نواسی زهرانون
چراغ خانه ی وحیی خموش ائدنمزلر
جهانه جلوه وئروبدی ضیاسی زهرانون
دئمه دوباره نیه فاطمیّه باشلامسوز
قیامته کیمی واردی عزاسی زهرانون
قاپی دالیندا قالاندا نلر چکوبدی خانم
الاندا آغلوری مهدی بالاسی زهرانون
مجسم ایله علینون ائوینده اولدی نه لر
داغیلدی غاصب الیله سراسی زهرانون
خانم یخلدی یره محسنون قانی آخدی
اولوبدی گل کیمی پرپر بالاسی زهرانون
الی قابورقاسی اوسته قاچوبدی مسجده تک
گوره هایاندا قالوب مه لقاسی زهرانون
دفاع ائدوبدی علیدن امام برحقدن
رضا اولوب بو عملدن خداسی زهرانون
دییردی شیر خدانون قولونی باغلامیون
سالوبدی دشمنی خوفه نداسی زهرانون
اوتانموسوز نه خدادن نه ختم مرسلدن
غدیرده نه دئیوبدی باباسی زهرانون
علی ولیّ خدادی وصیّ مطلقدی
سالوبدی مسجده غوغا صداسی زهرانون
امام مفترض الطّاعه دن حمایت ائدوب
واریدی کفوینه دائم دعاسی زهرانون
دییردی قوی دولانوم باشیوه چو پروانه
اولوبدی ثبت جراید وفاسی زهرانون
نقدری چکدی مصیبت ولایت اوستونده
اریدی شمع مثالی قواسی زهرانون
چالشدی صبح و مسا راه حقّیده تنها
آز عمریده چوخ اولوب ابتلاسی زهرانون
فدک بهانه ایدی حقّ مرتضانی آلا
یوخیدی مُلکه او قدر اعتناسی زهرانون
همان خانمدی بو طوی خلعتین فقیره وئروب
همیشه سائله واردی عطاسی زهرانون
علی یولوندا فعالیت ائتدی ،حقی دیدی
واریدی غاصبی یخماق بناسی زهرانون
وگرنه اوچ گجه آج یاتدیلار خدایه گوره
سند کتابیده کی هل اتاسی زهرانون
هدف واریدی خانم آغلیوردی لیل و نهار
بیان حقّیدی آه و نواسی زهرانون
مبارزیدی یقیناً بناسی غاصبیلن
گچوردی آهیله صبح و مساسی زهرانون
نجه سکوت ائلییدی گوروردی وا اسفا
اولوبدی خانه نشین مقتداسی زهرانون
شهیده گئتدی خانم قبر ائوینه گیزلینجه
یتیم اولوب آنادان دورت بالاسی زهرانون
نقدری آغلاساخ آزدی جوان ئولن خانما
ئولنده توخداماموشدی یاراسی زهرانون
قرا گیوب خانما "ناطقی" عزادار اول
واریدی باشدا ئولنده قاراسی زهرانون
یارالی سینیه خاطر وراندا سینه دئنن
اولا بو سینه ده کی جان فداسی زهرانون
گجه اولاندا بقیع گوزلریمده جلوه لنر
گجه بقیعی گزردی هماسی زهرانون
قویاردی باشینی گیزلین مزاره آغلاردی
اولاردی اشکی علینون دواسی زهرانون
دوروب گلنده دییردی نجه گئدوم ائویمه
قالوبدی قتلگهینده دماسی زهرانون
یانان قاپی ، دم مسمار ، طاقتیمی آلور
گلور قولاقیمه صوت رساسی زهرانون
تمام خاطره سی تیر غمدی قلبیمه لیک
منی کباب ائلیوبدی حیاسی زهرانون
- یکشنبه
- 7
- بهمن
- 1397
- ساعت
- 10:30
- نوشته شده توسط
- ابوالفضل عابدی پور
- شاعر:
-
حاج مرتضی پاشایی
ارسال دیدگاه