بولمرم یا رب نه غمدی غم توتوب دنیا بوگون
ایلیوب رحلت مگر صدیقه کبری بوگون
ناله فریادیلن دولموش تمام ماسوا
گوش هوش اولسا گلور هر سمتدن آه نوا
ساکنان عرش اعظم نالیه گلمیش و یا
زینب کبری چکر فریاد وا اُمّا بوگون
بیر طرف ده باش آچوبدور مجتبی ایلر نوا
بیر طرف مظلوم دشت نینوا ایلر نوا
بیر طرف ده زینب بختی قرا ایلر نوا
بیر طرف ده مرتضی ايتمیش عزا برپا بوگون
صاحب اَیّام عاشورا اوزی فریاد ایدور
حضرت زینب گلور داده اونا امداد ایدور
گاهی وا اُمّا دیور گه وا اخا گه داد ایدور
کربلا دشتین مجسم ایلیوب گویا بوگون
بیر کمک یوخدور او صحرا ده گوروب قارداشینه
گلدی میدانه اجازه ويردی گوزدن یاشینه
این سعده عجز ایدوب گویدی الینی باشینه
سویلیوب اولدورمیون نیلوب حسین آيا بوگون
رحمه گلدی اول ستمگر امر قیلدی لشگره
یول ورون باجی گئده قارداشینی بیرده گوره
ایلیون سوندان نشانه پیکرین خنجرلره
سوکیمی هر سویه اولسون قانی جاری تا بوگون
گلدی قارداش باشی اوسته زینب زار و حزین
بیر دمی دمساز اولا کشف ایلیه درد دیلین
آچدی قانلی گوزلرین فرمایش ائتدی شاه دین
باجی زینب دشمنه عجز ایتمه یالوارما بوگون
آچما باشون يولما زلفون اولما دلگیر آغلاما
اولمیوب اولماز باجی تقدیره تدبیر آغلاما
قلبیمی یاندورما وار آهون ده تاثیر آغلاما
خیمه لر سمتینه گئت صبر ایله یا اُختا بوگون
روز محشردن (شهاب) ایتمه بو قدری واهمه
شافع یوم قیامتدور جناب فاطمه
مصطفی اول قرب و شأنیله دیر با اینهمه
هیچ کسون یوخدور نجاتی گلمسه زهرا بوگون
- یکشنبه
- 11
- مهر
- 1400
- ساعت
- 19:34
- نوشته شده توسط
- یوسف اکبری
ارسال دیدگاه