زهرا گیدوب الیمدن
غمخواریم ئولدی یارب
درمان دالنجا گَزدیم
بیماریم ئولدی یارب
مندن بیری سوروشمور گول تک ندن سارالدون
آیا سنه نه گَلدی اوچ دورت گونه قوجالدون
حکمت سنوندی الله باشیم بلایه سالدون
سن ویرمیشیدون آخِر، سنده الیمدن آلدون
دشمنلریم سویوندی چون یاریم ئولدی یارب
بیر دردیدور بو هجران الده دواسی یوخدی
بو غملی روزگارین حُسن و صفاسی یوخدی
وار دورت بالام ایویمده عشرت اساسی یوخدی
ناز اورگنوبدی زینب افسوس آناسی یوخدی
دل داغلیام بو غمده دلداریم ئولدی یارب
غسلین ویرنده لوح آمالی پاره گوردوم
تردیده دوشدوم اوّل باخدوم دوباره گوردوم
پوشیده ساخلاموشدی من آشکاره گوردوم
ایکاش گورمییدیم جسمینده یاره گوردوم
ای وای آشنای اسراریم ئولدی یارب
اولموشدی بسکه زهرا طاها غمینده مضطر
روح الامین گَلردی دیدارینه مکرّر
دای فاطمه ئولندن گَلمور او پیک داور
گَلسه گورر قالوبدی منزلده خالی بستر
دردانه ی رسول مختاریم ئولدی یارب
با اینکه قونشولار چوخ ووردی اونا کنایه
همسایه لردن امّا هیچ ایتمدی گلایه
دوزدی به جای نفرین آچدی دلین دعایه
سکناسی بیت الاحزان اولدی بدون سایه
جاندان دویوب انیس اذکاریم ئولدی یارب
یارب نولوردی زهرا اوچ آیدا ساق قالِیدی
راحت دوروب حسینین قول بوینونا سالِیدی
محسن صود ایستینده آغوشینه آلِیدی
گهواریه یالِیدی بیر لای لای چالِیدی
گول سولدی، باغبان گلزاریم ئولدی یارب
یاندی قاپوم او گونکه اود چخدی آسمانه
قولّاری مرتضانون باغلاندی ریسمانه
زهرا او حالدا ایتدی جانین سپر بو جانه
گول پیکرین گویتدی آثار تازیانه
گول سولدی پاسدار درباریم ئولدی یارب
سولدی گولیم، باغمدا دورت نازلی بلبل آغلار
بلبللره بقیعده مدفون اولان گول آغلار
گول عاشقی گولنمز هر نه دیسن گول، آغلار
بو غصّه دن کلامی باشه سَپر کول آغلار
شیرن زبان و شیرین گفتاریم ئولدی یارب
- یکشنبه
- 7
- بهمن
- 1397
- ساعت
- 10:32
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه