ای منیم بی مثل و همتا همسریم
دلبر شایان و رخ نیلوفریم
گل کیمی آفت یتیبدور سولموسان
محنتین چوخدور بولود تک دولموسان
گوزلرون قربانی دولدورما گوزون
فاش ایله وار دلده هر گزلین سوزون
ملکوی غصب ایلدی اهل شرر
حرمتین هتک اولدی ، اولدون دیده تر
آغلاماقه اولدولار مانع سنه
گیتدین آغلار چولده بیت الاحزنه
باخمادی ظلم اهلی سوز آهوه
وردولار اود ظلموله درگاهوه
اشقیادن صدمه گوردی شهپرین
سندی ظلمیله سنان بال و پرین
سینه وی مسمار در ایتدی یارا
سن هارا اوددا قزارمش میخ هارا
گل کیمی سولدون سارالدون دینمدون
هر بلانی جانه آلدون دینمدون
سن بلایه جانوی ایتدین سپر
مندن ایتدین جانیله دفع خطر
من سنین مدیونووام یوخدور سوزوم
باخ منه ، گریان گوزه قربان گوزوم
شمع تک تحلیله گیتدی پیکرین
گون به گون سولدون باتوبدور گوزلرین
سن بو ایوده چکمسن چوخ درد سر
ایتمیوبسن اعتراض ای حور فر
ایشله ماقدان اللرین تاول وروب
شمس عشقیم ایتمه بو نوعی غروب
گتمه ، قویما تک منی دشمن آرا
من نجه سنسیز قالیم ای با وفا
سن نه تک بو ایوده همسرسن منه
تک لیقندا یار و یاورسن منه
بستره سالدی سنی بو چرخ دون
چرخین اولسون تاج و تحتی سرنگون
دردیمی سندن سورا کیمدور بیله
قال بو سنمش زورقی چک ساحله
کسمه بو ایودن محبّت سایه سین
یوخدی سنسیز بیر کسی ، من بی کسین
سن ئوزون تک لیقدا لشگرسن منه
غم گونومده یار و یاورسن منه
چوخدی دردین ، محنتین تعدادی یوخ
وار بلالی باشوین آلامی چوخ
قلبوین دردین دی قوی یانسین علی
شعلهٔ دردندن اودلانسین علی
جان حیدر، فاطمه جانسان منه
خوش صفاسن بو صفالی گلشنه
باغلی دور بو قلب پر دردیم سنه
بسته دور گوگلوم بو حسن احسنه
من سنی گوردوقجا قلبیم شاد اولور
گیتمه ، گیتسن خوش گونوم بر باد اولور
فرقت پیغمبره یوخ طاقتین ؟
رحلت طاها سنه اولدی چتین
یوخدور امکانین دئیم کی گتمه قال
فاطمه ، ایله منه حقّون حلال
بو ایوی سندن سورا غم دولدورار
زینبین کیم زلفونه شانه وورار
آرزیلارین قالدی دلده سربسر
الحذر چرخ فلکدن الحذر
آرزیلاردین کی حسن داماد اولا
اوندا بلکه غملی قلبین شاد اولا
هی دیردین کی حسینم قدّ آتا
ایستگی حاصل اولا کامه چاتا
زینبین توی حجله سینده اگلشه
دشمنین قلبی گوروم درده دوشه
ام کلثومین نه چوخ فکرینده سن
هی سفارش ایلوسن ای خوش سخن
گور نجه پوزقوندی اوغلان قزلارین
ای گونوم افسرده دی اولدوزلارین
قلبمین روشن دیوم قوی احساسین
بیر گونوم دنیاده سنسیز اولماسین
شیطنت شوراسی سندردی منی
درده سالدی بستری ایتدی سنی
گل کیمی سولساندا همدم سن منه
مرگ دن دم وورما کی دم سن منه
همدمیم ، عشقیم ، حیاتیم ، گوهریم
قلبمین آرامی ، مظلوم همسریم
درده دوشسون قلبوی درده سالان
قالسین آغلار گوزلرون آغلار قویان
شمع عشقیم سونمه یاندرما منی
روشن ایله بو پریشان خانه نی
- دوشنبه
- 8
- بهمن
- 1397
- ساعت
- 11:46
- نوشته شده توسط
- ابوالفضل عابدی پور
- شاعر:
-
محمد هدایتی
ارسال دیدگاه