دریای کینه ایلدی طوفان سقیفه ده
ظلمه آچیلدی پرچم طغیان سقیفه ده
دفن اولمامیش پیمبر خاتم جنازه سی
گلدی بروزه کینه عدوان سقیفه ده
بدر و حنین ئولنلرینه انتقام ایچون
جمع اولدی بیر یره نچه نادان سقیفه ده
شیخین تیره دل یغوب اطرافه اونلاری
شورای شرّی قوردولا پنهان سقیفه ده
بعد از صلاح و مشورت و رای و گفتگو
گلدی وجوده دولت عصیان سقیفه ده
بوبکر، جانشین سئچیلدی پیمبره
امضای خلقه یتدی او فرمان سقیفه ده
ثانی مقرر اولدی ابوبکره جانشین
تنظیم اولوندی دفتر و دیوان سقیفه ده
دوشدی بو اتحادیده چوخ اتفاقلر
آز قالدی آسمان اولا لرزان سقیفه ده
اجباریلن مهاجر و انصاری چکدیلر
بیعت رضایتی اولا اعلان سقیفه ده
بعضی گلوردی دعوتیلن بعضی زوریلن
امضا ائدوب اولوردی پشیمان سقیفه ده
تثبیت اولوندی امر سقیفه بو نحویله
یغمایه گئتدی مذهب و ایمان سقیفه ده
باد فنایه وئردی عرب اوز حمیّتین
حقّی قویوب دانشدیلا بطلان سقیفه ده
دوندی صحابه ی نبوی قالدی دورت نفر
آختاردی چوخلاری تاپا رجحان سقیفه ده
ایمان راسخیله او مردان پاکباز
حقّه اولوبلا یاخشی نگهبان سقیفه ده
کیمدور او دورت قوی ائدوم آدلارین بیان
دوتمیشدی دوردیده ره عرفان سقیفه ده
عمّاریلن ابوذر و مقداد حق شناس
بنیاد حقّی ائتدیله بنیان سقیفه ده
دوردیمجی شخصه وار یری ایرانلی فخرائده
ایماندا آلدی رتبه ی شایان سقیفه ده
دوندی مهاجرین هاموسی حقّه لا دئدی
حقّی دانشدی دونمدی سلمان سقیفه ده
صد مرحبا او مظهر ایمان و غیرته
حقه گتوردی منطق و برهان سقیفه ده
حقدن حمایت ایتدی او وارسته حق شناس
ناحقّدن آپارمادی فرمان سقیفه ده
پیغمبرین بیان شریفی عبث دگول
سلمان ُمنّی اولدی نمایان سقیفه ده
سلمانی اهلبیته قوشوب ختم الانبیا
خطّین آیردی ملت ایران سقیفه ده
طومار ظلمی باغلادیلار غاصبان غرض
امضا ائدوبدی ذیلینی شیطان سقیفه ده
ظلمین بناسی تاپدی او مجلسده خاتمه
اولدی هامی جنایته پایان سقیفه ده
اجرای حکمه اولدی عمر انتخاب او گون
رفتاری قیلدی شیعه نی گریان سقیفه ده
عشق ریاست ایلدی پامال عقلینی
دنیایه ساتدی دینینی ارزان سقیفه ده
ائتمشدی گر غدیرده بیعت ازل اوزی
یاددان چیخارتدی بس نیه الآن سقیفه ده
بیلمم تفکّر ائتدی و یا اینکه ائتمدی
سیندردی بیعتین ائله آسان سقیفه ده
حکم خدانی امر غدیری ایاقلادی
ظلمونده قویمادی قالا نقصان سقیفه ده
بیر کیمسه اولمادی دیه ای تشنه ی مقام
دنیادن اوتری ایلمه طغیان سقیفه ده
قان اولدی غصّه دن اورگیم غملی سینه ده
بو ماجرایه اولموشام حیران سقیفه ده
نه ماجرا که شرح اولا احبابی یاندیرار
گوردی روا نئجه اونی انسان سقیفه ده
بیر ایش گوروبدی گورمز اونی صاحبان عقل
جاهلدن آلدی سبقت او نادان سقیفه ده
ثانی چکوب جماعتی باب رسالته
درگاه وحیی ایلدی سوزان سقیفه ده
ظلم آتشینده اوتلادی باب رسالتی
یاندی او ناره عالم امکان سقیفه ده
مسمار زخمی فاطمه نی سالدی زحمته
اولدی ستمله قانینه غلطان سقیفه ده
باغلاندی ظلم الیله یداللهین اللری
دوزدی جفایه اول شه مردان سقیفه ده
دو غراندی مجتبی اورگی زهر کینیه
نعشین ده اوپدی ناوک پیکان سقیفه ده
اخیام شاه کربلا که یانوب نار کینه ده
یانمازدی اولماسیدی او بحران سقیفه ده
"زعفر"،تمام شیعه لری بو جفا ایله
حشره کیمی قویوبدیلا گریان سقیفه ده
- یکشنبه
- 14
- بهمن
- 1397
- ساعت
- 11:14
- نوشته شده توسط
- ابوالفضل عابدی پور
- شاعر:
-
زعفر آزادمهر شیخ درآبادی
ارسال دیدگاه