مدینه اهلی گلون اوخشیاق جوان ننه می
قاپی دالیندا تهاجم گونی قالان ننه می
گورون فلک منِ زاری نه تیز یتیم ایلدی
نقدر آختارورام تاپمورام جوان ننه می
جنازه سین گجه وقتی بابام مزاره قویوب
بقیع چولی آلوب آغوشه مهربان ننه می
اگرچه یدّی نفر ظاهراً ایدوب تشییع
آپاردی گوگلره باطنده قدسیان ننه می
بقیعده یاتسادا روحی ملائکیله گزور
یقین زیارت ایدور اهل آسمان ننه می
یرینی بوش گوروب ای بی وفالر آغلورسوز
گورنمه سوز داخی اول قبر بی نشان ننه می
ریایی آغلاماقوز روحیمه شکنجه ویرور
که غصّه مرگ ایلدوز قامتی کمان ننه می
نواسی قویمازیدی استراحت ایلیه سوز
اودور که زحمته سالدوز او جان فشان ننه می
بس اعتراض ایلدوز گیتدی بیت الاحزانه
بابا داغی دیمه دوز یاندیرور یانان ننه می
او قدری یاندی بیاباندا شمع تک اریدی
جوانلیقیندا قوجاتدی غم گران ننه می
داخی یانان قاپینون حیف اولا محافظی یوخ
سالوب ایاقدان او هنگامه قهرمان ننه می
حکومت اولماسا مانع مدینه دن گیده روق
بو شهریده هانی بیر یادینه سالان ننه می
باتاندا میخ درسینه سینه هایاندیدوز
که فضه داده گلینجه آپاردی قان ننه می
نه بیر عیادته گلدوز نه حالینی بولدوز
قویون اوزوم دانیشیم دؤیدولر هاچان ننه می
او غملی کوچه ده فریادینه گیدیدوز کاش
که ثانی ظلمیله قورخوتدی خسته جان ننه می
او کوچه ده نلر اولموشدی منده بولموردوم
که بیر گونی دیله دوتدوم دانشمیان ننه می
دیدیم ننه نیه مندن یوزووی گیزلدیسن
سئوالیم ایتدی پریشان شیرین زبان ننه می
بویوردی گوزله بابان بولمسین یوزوم گوؤَروب
بو سوزده باغریما باسدیم گوزی دولان ننه می
دیدی قوجاقلاما پهلولریمده صدمه گوروب
دوروب دعا ایلدیم گل کیمی صولان ننه می
- پنج شنبه
- 11
- بهمن
- 1397
- ساعت
- 12:38
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه