ای تاجدار خلقت ،شاه ولا عم اوغلی
سن تک امامه اولسون ،زهرا فدا عم اوغلی
گُل مقدمون فداسی قوی باشیم اوسته منّت
گَل بیر ایداخ بو بزمِ رازی عم اوغلی خلوت
ایستیر سنه که ایتسون زهرا بو گون وصیت
صبر و قرارون اولسون ایتمه نوا عم اوغلی
حقدور ئولوم بیلورسن یوخدور بو امره چاره
هر خلق اولان عم اوغلی بیر گون گیدر مزاره
زهراده دعوت اولموش ایندی حضور یاره
تغییر تاپسین اولماز امر قضا عم اوغلی
توکمه عذاره مولا بیر بیله اشک آلون
ایسلاتما گوز یاشیله بو گل صفت جمالون
مین لر بهشته وئرمز زهرا سنون وصالون
جبراً اولور بوگونده سندن جدا عم اوغلی
زهرا اولوب بو لطف و بو مِهروین اسیری
ای قلبیمون قراری عالملرون امیری
سن تک شهون عم اوغلی دنیاده یوخ نظیری
بو عشقه شکر اولدوم من مبتلا عم اوغلی
ساینده دالدالانّام ای سایه سار زهرا
ای عزّتیم وقاریم دار و ندار زهرا
بو دوقّوز ایلده گئچدی خوش روزگار زهرا
ائتدون منه هر آن سن لطف و عطا عم اوغلی
ای شیر با صلابت فتّاح درب خیبر
شأن و جلالون عالم سویلور سنون سراسر
بیلمور ، داریخما قدرون بیرعده قوم اَبتر
یوخسا گوزی الینده شاه و گدا عم اوغلی
حالون بو قدری پوزما رفع غم و ملال ایت
زهرا بو فانی دهره گلموبدی سن خیال ایت
مندن گر اینجیسن سن حقّون منه حلال ایت
آسوده خاطر اولام اولسان رضا عم اوغلی
غسلوم عم اوغلی ساخلا سن لیل تیره تاره
تا دَيمسون دوباره بو قلب پاکه یاره
زهرانی نصف شبده گیزلین آپار مزاره
تا آگه اولماسونلار اهل جفا عم اوغلی
جور و جفای اُمّت قلبون ائدیب شکسته
زهراده گرچه جسمون ایلر عم اوغلی خسته
دفن ایلدون بیر آزدا صبر ایله باشیم اوسته
ایت حی ذوالجلاله حمد و ثنا عم اوغلی
گر اولماسیدی مخفی قبر عزیز طاها
بو جمله نی یازاردون قبریم داشیندا مولا
ایتدی بونی شهیده جور و جفای اعدا
رسوا اولاردی اوندا قوم دغا عم اوغلی
گرچه اِئدیر #جوانمرد بیز اهل بیته خدمت
اما گُنه لریندن مولا چکور خجالت
لطف ایله توت الیندن ایله اونا عنایت
شرمنده اولماسین تا روز جزا عم اوغلی
ای شاه بی قرینه ای عالمینه سرور
بو رسیمدور تیکر گوز شاهه همیشه نوکر
شه ائتمسه توجه قلبی اولار مُکَدَر
اولما رضا شکسته قلبی اولا عم اوغلی
- جمعه
- 12
- بهمن
- 1397
- ساعت
- 15:46
- نوشته شده توسط
- ابوالفضل عابدی پور
- شاعر:
-
امین جوانمرد
ارسال دیدگاه