قویما منی آدامسیز گئتمه وفالی زهرا
قبره گجه زمانی سینه یارالی زهرا
یا فاطمه یا زهرا یا فاطمه یا زهرا
آلدی سنی الیمدن دشمنلرین جفاسی
سندنصورا جهانون یوخدور منه بهاسی
دوشدی ائویم صفادن ای بیتیمون صفاسی
گئیدیم قرا یاسیندا اولدوم عزالی زهرا
ای یاوریم دایان بیر گتمه آماندی گئتمه
ایله نظر ایوینده گورنه فغاندی گئتمه
آه و فغان و ناله عرشه دایاندی گئتمه
اولما بو شهر غمده مندن آرالی زهرا
بیر یولدا گل بیانه زهرا منی دانیشدیر
من گلمیشم فغانه زهرا منی دانیشدیر
لطف ایله عاشقانه زهرا منی دانیشدیر
اولدوم سنون غمونده نی تک نوالی زهرا
هیچ دویمادیم جهاندا شیرین شیرین سوزوندن
غسلون وئرنده گوردوم سیلی دگوب یوزوندن
الآندا گئتمیوبدی قان لکه سی گوزوندن
منده بلالی اولدوم سنده بلالی زهرا
زینب گلر نوایه آغلار دیر آنام وای
اشکین یوزه دمادم باغلار دیر آنام وای
درد و غمیده سینه داغلار دیر آنام وای
ساکت نئجه ائدوم من غرق ملالی زهرا
(سالک) گلر غموندن حسرتله آه و زاره
هرگون توکر دمادم گوز یاشینی عذاره
آغلار دیر همیشه لطف ائت بو بی‌قراره
قویما دوشه بلایه ای ابتلالی زهرا
- چهارشنبه
- 12
- خرداد
- 1400
- ساعت
- 22:31
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه