بقیعه عادت ائدوب شاه لافتی گجه لر
گونوز گلنمور ائدور ناله و نوا گجه لر
خجالتیله باتور گون ائشیتمسون سسینی
آیندا عشقی یوخ حتی اولا نما گجه لر
گجه اولاندا گئدر قوشلار آشیانه سینه
بقیعده دولانور غصّه لی هما گجه لر
هامی یاتور ئوز ائوینده خیال راحتلن
آلور قوجاقه بالاسین یاتور آنا گجه لر
ولی یاتانمور علی ، چون ئولوبدی زهراسی
یرینی بوش گوروری ایلوری بکا گجه لر
نه زحمتلین علی یوخلادور بالالارینی
گلور بقیعه تاپا دردینه دوا گجه لر
یواش آتور قدمین دورماسین حسین یوخودان
یاتانموری آناسیز چون او مه لقا گجه لر
ولیک بعضی گجه تا دورور حسین یوخودان
دیور بابام گئدوری ای خدا هارا گجه لر
صاقا صولا باخوری دشمن ائتمسون تعقیب
قالوب نه حاله خدا شاه اولیا گجه لر
ملک لر آغلور علی اوخشیاندا فاطمه نی
ائوینی ترک ائدوری شاه لافتی گجه لر
خطاب ائدور یانا یانه یارالی زهرانی
سن ئولدون اولدی علی درده مبتلا گجه لر
گونوز قورانموری ئوز منزلینده بزم عزا
قوروبدی مجلس ترحیم مرتضی گجه لر
گونوز قوجاخلورام ئوز منزلیمده دیزلریمی
مزارون اوسته واریم دلده آه و وا گجه لر
دعا ایله منی الله سنه ائده ملحق
که بلکه خاتمه تاپسون بو غمفزا گجه لر
نقدری سسلور حبیبی ولیک سس گلمور
دوباره سویگلوسون سسلنور آقا گجه لر
اوگونکه منزله دشمن توکولدی وحشتیلن
بیر اولدی گوزلریمه گوندوزوم و یا گجه لر
ملک ئوپن قاپوموز مقتل اولدی محسنیمه
ائویمده یوخدی گونوز رونق و صفا گجه لر
مزارون اوسته علی دلده غم گوزونده سرشگ
حسین و زینبنه ایلوری دعا گجه لر
چوخ آرزو ائدوری قهرمانِ بدر و حُنین
علینون ئولماقنا حق اولا رضا گجه لر
یارالیدور ئورگیم وئر جواب مرهم قوی
مریض الموشام هجرونده قیل شفا گجه لر
توکولسون آز قالوری تپراق اوسته اولدوزلار
توکنده گوزیاشینی شاه کربلا گجه لر
یری وار عرض اولا ای شهریار کون و مکان
عنان صبرون الوندن اولوب رها گجه لر
خانمون آیریلقی حالیوی پوزوبدی سنون
که ایستوسن ئولوم اللهیدن اولا گجه لر
قولوندا واردی توان ذوالفقار الونده هله
هامی باشندادی جز خیره النسا گجه لر
گونوز ،گلور ائوه مقداد و بوذر و سلمان
سنه تسلّی وئرن یوخ فقط شها ، گجه لر
صلاح دینه گوره ذوالفقاری چکمورسن
اسور گلنده سسون قوم اشقیا گجه لر
خرابه ده نجه اما دوزوب قیزون زینب
ائدردی صبحه کیمی خالقه ثنا گجه لر
سنون گئدوبدی الوندن وفالی بیر خانمون
بقیّه اهل حرم واردی جابجا گجه لر
سنیله سس سسه ائوده وئروللر آغلوللار
حسین و زینب و کلثوم و مجتبی گجه لر
ولیک زینبون ئولمیشدی یار و انصاری
یوخیا گئتمزیدی صبح اولا دُجا گجه لر
دیردی یاتسام حسینون بالالاری قورخار
خرابه قورخولودی سقفی یوخدی وا گجه لر
نماز شب قاپسیز سقفسیز مکاندا عجب
وئرردی زینبه لذّت ائدور دعا گجه لر
ولیک حضرت سجّاد نقل ائدور گوردوم
نشسته قیلدی نمازین او باوفا گجه لر
دئدیم نچه گجه دور شاهدم نمازیوه من
عبادتون وئروری روحیمه جَلا گجه لر
نمازیوی بو گجه سن نشسته قیلدون عجب
دئدی توانیم علی یوخدی برملا گجه لر
یزید سهم غذا گوندرور اسیرلره
کفایت ایلموری قزلارا غذا گجه لر
اودور که دیزلریمون طاقتی گئدوبدی علی
دورانمورام ایاقا نیلیوم بالا ؟ گجه لر
بقیع منظره سیندن پوزولدی " عینی فرد "
الهی بیرده گورر اوردا با صفا گجه لر ؟
- شنبه
- 13
- بهمن
- 1397
- ساعت
- 20:30
- نوشته شده توسط
- ابوالفضل عابدی پور
ارسال دیدگاه