آغلاما سرشک چشمون
توکمه گلعذاره زهرا
سوز آهیویله وورما
قلبیمه شراره زهرا
نیلیوم وفاسیز امّت ایتدیلر منی خجالت
اوز آتان یانندا سالما دردون آشکاره زهرا
ای پیمبرین بو ایوده بیر عزیز یادگاری
آیریلیق غمی اورکدن سلب ایدوبدی اختیاری
دور اوتور بو صون نفسده دردیوی منه دی باری
دردیوی آپارما قبره سویله بو فگاره زهرا
وار باشوندا اشتیاق محضر حبیب داور
گیت بو غصّه دن خلاص اول ای حبیبه ی پیمبر
سالدیلار سنی ایاقدان حیف اولا بو بی وفالر
چکمه غم، گیدورسن ایمدی محضر نگاره زهرا
عرض ایله بابا امان بو امّتین شقاوتیندن
صورتیم اولوبدی نیلی دشمنین جسارتیندن
ایمدیده قالور یوزیمده سیلینون علامیتندن
باب حق یاناندا دوشدی حال احتضاره زهرا
شاد اولار جهاندا هر کیم قربت وصاله یتسه
حقّی وار فراق الیندن هر قدر شکایت ایتسه
دسته گُل دوتار الینده محضر نگاره گیتسه
محسنی آپار الونده سنده بزم یاره زهرا
یوخ یانوندا قوم و خویشون باش آچِیدی شیونیله
سس سسه ویروب اولاردا آغلیِیدیلر منیله
انس دوتموشوخ بو ایوده سن منیله من سنیله
گَلدی آیریلیق زمانی یوخ بو درده چاره زهرا
جان ویرن زمان پیمبر ایتدی امّته وصیّت
فاطمه منیم بالامدور ایتمیون اونا وصیّت
حقّون آلدیلار الوندن، ووردولار سنی بو امّت
بو ایشیق گونوز گوزونده دوندی لیل تاره زهرا
یرده قویدولار پیمبر نعشینی بو قوم عدوان
قوردولار ثقیقه بزمی حکمینی آلوبلار اوردان
سیلی ووردولار، یوزوندن تازیانه قولّاروندان
ضرب سیلیدن آچیلدی دوشدی گوشواره زهرا
آزدی گر اُلونجه ایتسم بو مصیبتونده شیون
من اوتوردوم ایوده امّا حقّیوی آپاردی دشمن
اوز آتان یانندا هرگز ایلمه گلایه مندن
قدرت اولمادی الیمده اُف بو روزگاره زهرا
دوقّوز ایل منیم ایویمده هر مصیبته دایاندون
دلدن آه سرد چکدون، آهون آتشیله یاندون
گه فدک دالنجا دوشدون ایولری گزوب دولاندون
گه ووروبلا دل یاراسی قلب داغداره زهرا
بُلمورم قالور نه حاله بیر نفر حیالی عورت
اولمیه یانندا بیر کس دشمنی ایده جسارت
شل اولِیدی بارالها قنفذین الی او ساعت
گورمیِیدیم ایمدی واردور قولّاروندا یاره زهرا
ای پیمبرین عزیزی باغ جنّتین غزالی
هانسی گُل خزان اولاندا سن کیمی سولار سارالی
قبره گیتدی هانسی عورت سینه سی قولی یارالی
بُلمورم نجه بو جسمون تاپشورام مزاره زهرا
مونسون بو یالقوز ایوده اولدی اشک دیده گیتدون
غصّه دن آغاردی زلفون قامتی خمیده گیتدون
وای منه منیم ایویمدن عاقبت شهیده گیتدون
حالیوی گورنده دوشدی قلبیمه شراره زهرا
گُل یتیشمه سه آغاجدا گل درنه شاخ اگیلمز
دوشمیه فشاره هرگز غنچه بو ته دن دریلمز
صدمه دگمه سه بوداغه گُل لری یره سَریلمز
محسنون اولاندا خندان دوشموسن فشاره زهرا
ای ویرن مجبّتیله جانیوی فدا بو دینه
آچ گوزون توجّه ایله باشون اوسته شور و شینه
آغلارام گهی بو حاله گه حسن گهی حسینه
قلبیم اود دوتور ایدنده زینبه نظاره زهرا
یادیمه سالور بو ساعت ماجرای کربلانی
قتلگاه کربلاده اوغلومون دوشن زمانی
سنده دلغمین گَلرسن، چوخ سویر آنا بالانی
صبر ایله گوزون دوشنده جسم زخمداره زهرا
بُلمورم بالام حسینه یوز ویرر او گون نه ساعت
اتلی الینده خنجر اوغلوما ایدر جسارت
عهد ایل منیله سنده دادینه گیداخ او ساعت
یاره دن دوننده جسمی گلشن بهاره زهرا
ای «رجائی» سنده آغلا فاطمه مصیبتینده
ال گوتورمه دامنیندن وار گوزون شفاعتینده
عرض ایله آنا، بالاوا داده گَل او ساعتینده
قویما قالسون اوتدا یانسون چک اونی کناره زهرا
- یکشنبه
- 14
- بهمن
- 1397
- ساعت
- 11:6
- نوشته شده توسط
- ابوالفضل عابدی پور
ارسال دیدگاه