غم حصاره سالدی من سکنا ایدن غمخانه نی
هالۀ محنت آلیب آغوشه بو کاشانه نی
هر طرفدن باشمه غم یاغدی غرق ایتدی منی
صرصر غم سولدوروب باغ و گل و ریحانه نی
آشنایه آشنا آغلار بونی عالم بولور
دردیم آغلاتدی منیم یولدان گئچن بیگانه نی
واریدی دورد اوغلوم امّا دوردی ده باتدی قانا
چرخ ایچرتدی زهریلن سرشار اولان پیمانه نی
شمع امّیدیم خموش اولدی ، گونوم اولدی قرا
ناگهانی شعله یاندردی پر پروانه نی
برق محنت ووردی پوزدی باغمی ، گلزاریمی
محنتیم یاندردی یاخدی عاقل و دیوانه نی
تار و پود قلبمی محنت شراری یاندیریب
یوخدور آباد ایلین ویران قالان ویرانه نی
روزگاریم گون به گون بد گلدی درد اولدی گران
درده سالدی غم لریم هر عارف و فرزانه نی
درّ عشقیم کربلاده سندی اولدی ریز ریز
پاره لنمش فرض ایله صد جوریله صد دانه نی
معرفت چرخی منیم دردانه مین گورمز تایین
حیف اولا چوخ گوردی چرخ دون منه دردانه می
(مه جبینیم کربلاده کامه چاتدی گلمه دی)
( سرفرازیم ویردی باشین باش اوجالتدی گلمه دی)
گچدی غمله روزگاریم همدم اولدی غم منه
مونسیم گوزیاشی اولدی ، اولدی تنگ عالم منه
گوزلریم نوری آزالدی ، قامتیم اولدی کمان
گیتدی تحلیله توان ضعف ئوز ویریب کم کم منه
همدم اولدی هر کسین ایستکلی سی ، دل پاره سی
محنت و آلام و غصّه اولدولار همدم منه
خون دل گوزیاشی اولدی آخدی سولموش صورته
قلبمین قانی سولان یوزده اولوب شبنم منه
نه یوزوم گولدی ، نه گوزیاشی امان وئردی گولم
برهم اولسون عالمی ، اولدی نجه برهم منه
جانه دویدوم دمبدم بو عالم پر غصّه دن
رنج و محنت وئردی یوز هر لحظه و هر دم منه
هر نفس چکدقجا غم چکدیم نفس دن اینجدیم
هم جهان نوباوه مه زندانه دوندی هم منه
قبرنین عکسین ئورک ده چکدیم عبّاس اوغلومون
خوش زیارتگاه اولوب عمروم بویی سینم منه
زمزمه ایتدقجا آدین قلبمین یاندی باشی
قلبمین جوشدی قانی وئردی نوا زمزم منه
قامت شمشادمی اگدی ابوالفضلین غمی
پاره بیر مشکی گلوب دور قانلی بیر پرچم منه
(گوشۀ غمده ایاقدان دوشموشم دلخستیم )
(غملی عمروم باشه یتدی ، جان چخور جان اوستیم )
بیر کسی جان اوسته یوخدور غم گونی من بیکسین
دورد اوغولدان یوخ بیری تابوت می حمل ایله سین
وای نجه بد گلدی بختیم روزگاریم اولدی تار
من کیمی بختی گوروم هئچ کیمسه نین بد گلمه سین
وار کیمیم بزم عزا ترتیب ایده من بیکسه
کیم دورار مهمان قاباقندا اوجالدار ناله سین
کیم دئیر ایوای آنام وای گوزیاشین گوزدن الر
کیم قوشار بزم عزادن آغلیانلاره سسین
دلخوشام عمروم قوتاردی دنجلر یورقون جانم
باتسا بو یورقون نفس ردّ ایلر هجران پرده سین
دلخوشام وصلت منه حاصلدی بو جان وئرمه دن
اوغلومون حسّ ایلورم جان اوسته قرآن نغمه سین
پر آچیب روحیم گلیب اوغلانلاریم دیداریمه
شوق دن پر آچماسین ام البنین بس نیله سین
نوره گلدی نوردن دوشموش بو آغلار گوزلریم
زایل ایتدی غملی قلبین دوره ده غم هاله سین
نوش دور جان اوسته قالماق همدمیم دور گل لریم
گر چه حسّ ایلور قولاقیم دوره دن غم نوحه سین
آتشین قلبه «هدایت» آب دور بیله ئولوم
ایلیر خاموش ئورک ده درد و محنت شعله سین
- دوشنبه
- 22
- بهمن
- 1397
- ساعت
- 18:56
- نوشته شده توسط
- ابوالفضل عابدی پور
- شاعر:
-
محمد هدایتی
ارسال دیدگاه