من امّ بنینم صدف دُرّ کمالم
من امّ بنینم گُهر کَنز جلالم
من امّ بنینم هدف تیر ملالم
دورد اوغلوم ئولوب مین غم و مین درده دچارم
دقت ایلیون قبریمه مخروبه مزارم
من امّ بنینم چالشوب مقصده یتدیم
دورت پنجه قوی تازه جوان تربیت ائتدیم
زهرایه اولوب خادمه زهرا یولی گئتدیم
پروانه اولوب شمع جمال حسنینه
خدمت ائلدیم زینب و کلثوم و حسینه
من امّ بنینم حرم شیر خدایم
من جاریۀ خانۀ اُمُ النُّجَبایم
اهل وطنیمدن ولی چوخ واردی گلایم
حسرت، جمعه آخشامی چکور خسته روانیم
اولمور بیری اللهه گوره فاتحه خوانیم
افسرده دلم قلبیده سایسیز محنیم وار
داغ داشه موثردی او غُصّیکه منیم وار
اولماز گَلَنیم ایلده بش اون گون گلنیم وار
زحمتله گَلولَّر بیلورم قبریمه هاردان
آند اولسون ابوالفضله رضایم حاجیلاردان
زهرا او خانملار خانمی مام فداکار
اوغلانلارینون قبری هم ئوز قبری اولوب خوار
حُجّاج گئدندن صونرا گلمز بورا زوار
ای کاش علی شیعه سی هر یاندا اولیدی
ای کاش بیزیم قبریمیز ایراندا اولیدی
من امّ بنینم چکیلوب قلبیمه داغلار
سوندی ائویمون زینتی نورانی چراغلار
واضح دی بو سوز دشمنه دشمن چتین آغلار
اما منیم آخرده ایشیم بیر یره یئتدی
مروان کیمی ظالم ده منه آغلادی گئتدی
بو شهریده اوّلده جلالیم چوخ اوجالدی
فرّ و حشمیم هر خانمی حیرته سالدی
امّا صورادان امّ بنین بیر گونه قالدی
ئوز منزلیم اولدی ئوزومه گوشۀ محبس
قالدیم گوزی یولدا قاپومی آچمادی بیر کس
مهمانی اولان خانه اولوب خالی قوناقدان
حرمت منه ایلردی هر عورت که قاباقدان
گوردی گلورم کوچه ده تئز چکدی اوزاقدان
بیلدیم که اوغولسوز آنانون قدری گیدرمیش
عباسه گوره هامی منه حرمت ائدرمیش
عباس نه عباس گوزل شهرتی واردی
زین اوسته مقام ایلیوب هر وقت اوتوراردی
مردم یولی اوستونده تماشایه دوراردی
سویلردی هامی صانع ائدوب صنعتین ابراز
عالمده ابوالفضل کیمی بیر اوغول اولماز
بیر عمر گوزل قامتینه آغلامیشام من
اخلاقینه خوش عادتینه آغلامیشام من
عبدیتینه طاعتینه آغلامیشام من
تقدیسیده توحیدیده تکمیلیدی اوغلوم
دنیا بوئی شایستۀ تجلیلیدی اوغلوم
کیم یاد ائده عباسی منه منتی واردی
مظلوم ایلیوبلر بالامی خجلتی واردی
مظلومه کمک ایلمگون قیمتی واردی
خوشنود ایلیون امّ بنینی عملوزدن
السیز بالامی اوخشیون حق دوتسون الوزدن
یاد ایلیون عباسی ، علمدار گورنده
فریاده گلون شیری گرفتار گورنده
چوخ آه چکون قافله سالاری گورنده
گورسوز یخلوب سروین اولوب ریشه سی برباد
نوحه دیون عباسیمه اولسون ایووز آباد
هر کیمسه نی گورسوز اوخیور شوقیله قرآن
سجده اثری طاق جبینینده نمایان
محراب عبادتده اولور پیکری لرزان
قلبوز گوزی تئز کرب و بلا دشتینه باخسون
عباسه سلام ایلیون اشکوز یوزه آخسون
گورسوز بیری مأیوس اولوبدور ئوز ئوزوندن
یعنی ال اوزوبدور گیجه سیندن گونوزوندن
گورسوز بیری قولسوزدی دگوب یاره گوزوندن
اوضاع نیستانی ائدون دلده مجسَّم
ال گئتدی گوزی گئتدی بالام ساخلادی پرچم
ـــــــــــــــــــــ
- دوشنبه
- 22
- بهمن
- 1397
- ساعت
- 18:57
- نوشته شده توسط
- ابوالفضل عابدی پور
- شاعر:
-
مرحوم انور اردبیلی
ارسال دیدگاه