مسکینه کرم خانه ی حقدن صِله گلدی
عشقون گل آچوب مزرعه سی حاصله گلدی
زینب دیل آچان شهریده طبعیم دیله گلدی
اون گون علی اکبر دولانان شهریده قالدیم
عطّار کیمی عطر بنی هاشمی آلدیم
شهر نبوی مرکز تبلیغ رسالت
برنامه سی قرآن هدفی بسط عدالت
آفاقه سالوب شعشعه ی نور هدایت
گهواره ی اصحاب نبی مولد انصار
ارباب صفا گورسه بیلر که نه صفا وار
بیر یاندا نُمایان اُحُدون غملی نماسی
دامانینی مدفن ائدوب حقّون شهداسی
قرآنون اَوَل اولدی همان عدّه فداسی
مردان خدا مقصد حقّه چاتوب اوردا
شیر نبوی حضرت حمزه یاتوب اوردا
دندان نبی تاپدی همان یرده شهادت
دوقسان یاریا دوزدی علی شاه ولایت
زهرایه اوگون فکر ائله یوز وئردی نه حالت
ترک ائتدی ائوین معرکهٔ جنگه یول آچدی
دیلده آتا آدی اُحدون سمتینه قاچدی
کیفیّت تاریخ اُحد اولدی معیّن
واردور دئدیگیم شهریده بیر مجلس احسن
گلدسته لری سر بفلک طاقی مزیّن
معمارلر اوردا ائلیوب صنعتین ابراز
مرمردی ستونلاری تراشی ولی ممتاز
واردور نچه زیبا قاپوسی قدّی مطوّل
اما بیرینون رتبه سی معناده مجلّل
جبریل امین اوردان ائدوب مسجده گئت گل
نزدیک ترین دردی او در بیت رسوله
حجّاج سزاوار بیلور اِذنِ دخوله
مسجدده پیمبر ائوی معلوم و مسلّم
دقّتله باخان وقته اولور قبری مجسّم
اولموش او ائوه شیر خدانون ائوی مُنضم
بیر سمتیده کی منبر میر قُرشی دور
بیر یاندا اذان گاه بلال حبشی دور
چوخدور نبوی مسجدینون جاه و جلالی
اشیا ٕ گران قیمته دارا متعالی
سوزدن کچورم وار قلمون آیری خیالی
یوخ چاره سالوب تنگه منی غصّه کمندی
اوضاع بقیعدن یازورام بو نچه بندی
چوخدور قاپوسی غم توزی وار هر قاپوسیندا
حجّاج تاپور عالم دیگر قاپوسیندا
باخدوقجا چکور آه مکرّر قاپوسیندا
هرکیم او محیطه اوجالور پلّه لریندن
رخسارینه گوزیاشی آخور چشم تریندن
زهرا آدی دیلده هامی فکر هدفینده
جان نقدلری تحفه دی اخلاص کفینده
مدفونیدی زهرا او یرون باش طرفینده
دورد اوغلونا مونسدی مجاوردی مزاری
مخروبه قالوب قبرلرون دوره حصاری
زهرا یانینا اوّل آلوبدور حسن اوغلون
هم زین العبا سلسله بوینون کسن اوغلون
هم باقر و هم صادق صاحب سخن اوغلون
حجّاج همان قبرلری دوره ویرولّار
مأیوس باخوب اللری قوینوندا دورولّار
گوزیاشلاری گوزلرده او مأوادن اننده
بیر گوشه ده اوچ قبر گورلّر قییدنده
تحریک اولور حجّاج او اوچ قبری گورنده
هر قبریده بیر بانوی ارزنده ی اسلام
هر تک تکی گویا ائدور ئوز دردینی اعلام
باش سمتیده کی قبریده خاتون مکرّم
مشهور خانم عاتکه دور عمه ی خاتم
منضم اونا بیر قبر مقابلده مجسّم
کیمدور او مزار ایچره دئدوم غرقیدی خوابه
پیر خرده یتدی کانّه بو خطابه
من امّ بنینم صدف در کمالم
من امّ بنینم گهر کنز جلالم
من امّ بنینم هدف تیر ملالم
دورد اوغلوم ئولوب مین غم و مین درده دچارم
دقّت ائلیون قبریمه مخروبه مزارم
من امّ بنینم چالیشوب مقصده یتدوم
دورت پنجه قوی تازه جوان تربیت ائتدوم
زهرایه اولوب خادمه زهرا یولی گئتدوم
پروانه اولوب شمع جمال حسنینه
خدمت ائلدوم زینب و کلثوم و حسینه
من امّ بنینم حرم شیر خدایم
من جاریه ی خانه ی امّ النّجبایم
اهل وطنیمدن ولی چوخ واردی گلایم
حسرت جمعه آخشامی چکور خسته روانیم
اولمور بیری اللهه گوره فاتحه خوانیم
افسرده دلم قلبیده سایسیز محنیم وار
داغ داشه مؤثردی او غصّیکه منیم وار
اولماز گلنیم ایلده بش اون گون گلنیم وار
زحمتله گلولّر بیلورم قبریمه هاردان
آند اولسون اباالفضله رضایم حاجیلاردان
زهرا او خانملار خانمی مام فداکار
اوغلانلارینون قبری هم ئوز قبری اولوب خوار
حجّاج گئدندن صورا گلمز بورا زوّار
ای کاش علی شیعه سی هر یاندا اولیدی
ای کاش بیزیم قبریمیز ایراندا اولیدی
من امّ بنینم چکیلوب قلبیمه داغلار
سؤندی ائویمون زینتی نورانی چراغلار
واضح دی بوسوزدشمنه دشمن چتین آغلار
اما منیم آخرده ایشیم بیر یره یتدی
مروان کیمی ظالم ده منه آغلادی گئتدی
بو شهریده اوّلده جلالیم چوخ اوجالدی
فرّ و حشمیم هر خانمی حیرته سالدی
اما صورادان امّ بنین بیر گونه قالدی
ئوز منزلیم اولدی ئوزومه گوشه ی محبس
قالدیم گوزی یولدا قاپومی آچمادی بیرکس
مهمانی اولان خانه اولوب خالی قوناقدان
حرمت منه ایلردی هر عورت که قاباقدان
گوردی گلورم کوچه ده تز چکدی اوزاقدان
بیلدیم که اوغولسوز آنانون قدری گئدیمیش
عباسه گوره هامی منه حرمت ائدیمیش
عباس نه عباس گوزل شهرتی واردی
زین اوسته مقام ایلیوب هروقت اوتوراردی
مردم یولی اوستونده تماشایه دوراردی
سویلردی هامی صانع ائدوب صنعتین ابراز
عالمده اباالفضل کیمی بیر اوغول اولماز
بیر عمر گوزل قامتینه آغلامیشام من
اخلاقینه خوش عادتینه آغلامیشام من
عبدیّتینه طاعتینه آغلامیشام من
تقدیسیده توحیدیده تکمیلیدی اوغلوم
دنیا بوئی شایسته ی تجلیلیدی اوغلوم
کیم یاد ائده عباسی منه منّتی واردی
مظلوم ائلیوبلر بالامی خجلتی واردی
مظلومه کمک ایلمگون قیمتی واردی
خشنود ائلیون امّ بنینی عملوزدن
السیز بالامی اوخشیون حق دوتسون الوزدن
یاد ایلیون عباسی علمدار گورنده
فریاده گلون شیری گرفتار گورنده
چوخ آه چکون قافله سالار گورنده
گورسوز یخیلوب سروین اولوب ریشه سی برباد
نوحه دیون عباسیمه اولسون ائووز آباد
هر کیمسه نی گورسوز اوخیور شوقیله قرآن
سجده اثری طاق جبینینده نمایان
محراب عبادتده اولور پیکری لرزان
قلبوز گوزی تز کرب و بلا دشتینه باخسون
عباسه سلام ایلیون اشگوز یوزه آخسون
گورسوز بیری مأیوس اولوبدور ئوز ئوزوندن
یعنی ال اوزوبدور گئجه سیندن گونوزوندن
گورسوز بیری قولسوزدی دگوب یاره گوزوندن
اوضاع نیستانی ائدون دلده مجسّم
ال گتدی گوزی گتدی بالام ساخلادی پرچم
- دوشنبه
- 22
- بهمن
- 1397
- ساعت
- 19:5
- نوشته شده توسط
- ابوالفضل عابدی پور
- شاعر:
-
مرحوم انور اردبیلی
ارسال دیدگاه