مست ولای حیدرم حیدری من چوخ ایسترم
تشنه ی جام کوثرم حیدری من چوخ ایسترم
حیدریانه نوکرم حیدری من چوخ ایسترم
ال اتگیندن اوزمرم حیدری من چوخ ایسترم
قبره گئدینجه سسلرم حیدری من چوخ ایسترم
حاجی حرم یولوندادی شیعه کرم یولوندادی
چوخلاری شادلیق آختارور غصه لی غم یولوندادی
آل یزید ایندیده ظلم و ستم یولوندادی
شیر ئورگی اولان جوان میر امم یولوندادی
دلده دییر دلاورم حیدری من چوخ ایسترم
سن که ائلون ولایته بنده دی سسله یاعلی
عشقیله قلبی شیعه نین سنده دی سسله یاعلی
کینه لی دشمنین گوزی سنده دی سسله یاعلی
گوهر معرفت دئنن منده دی سسله یاعلی
چونکه گدای بو درم حیدری من چوخ ایسترم
نام علینی ذکر ائدن فاطمه مکتبین تانور
روحی مدینه نی گزوب زمزمه ی شبین تانور
قرب الهی آختاران یار مقرّبین تانور
غیرت حسینی اولسا گر عفّت زینبین تانور
روحی دییر مطهّرم حیدری من چوخ ایسترم
فاطمه یعنی معرفت فاطمه یعنی منزلت
فاطمه یعنی رهبر سلسله ی مقاومت
فاطمه یعنی سنگر حقده ائدن مجاهدت
سس وئره کیم شعارینه قورتولار اوتدان عاقبت
یازدی شهید سنگرم حیدری من چوخ ایسترم
کلّ جهاندا شکر اولا تُرکلرین امتیازی وار
چونکه بو یرده پرچم عترتین اهتزازی وار
فاطمه و علی آدین ذکر ائله سوز و سازی وار
عرض نیاز ائله، اونا روحیمیزین نیازی وار
سویله اسیر دلبرم حیدری من چوخ ایسترم
بو قره لر که نصب اولور ایلده مسیر ملّته
فکر ائلمه سکوت ائدوب سوز دانیشور جماعته
فاطمه پرچمی دیور باشیوی اگمه ذلّته
مادر شاه کربلا قربان اولوب ولایته
حقّه بویوردی مظهرم حیدری من چوخ ایسترم
لاله دییر علی علی ژاله دییر علی علی
ماهیله دوره سینده کی هاله دییر علی علی
مسجد و منبر ایلیوب ناله دییر علی علی
مهدی یوزونده کیم باخار خاله دییر علی علی
سسله دل ائتمه سین ورم حیدری من چوخ ایسترم
نشر پیام ائدم گرک یوخسا قلم جری اولار
حق سؤزی یازماسام اورک عاطفه دن بری اولار
حیدری کیم چوخ ایستسه هر ایشی حیدری اولار
حیدری اولسا هر جوان غیرته مشتری اولار
دلده یازار هنرورم حیدری من چوخ ایسترم
فاطمه نشر ائدور بلی عالمه بو دیار آدین
کشوریمیزده قؤزیوب شوریله عشق فریادین
وئرمه فنایه یوردیوین ارزش دین و بنیادین
کیم بو حماسه قدرینی بیلمسه بیلمز هئچ زادین
سسله ولایی جوهرم حیدری من چوخ ایسترم
بو هیئات علملری هامیسی بیردی فرقی یوخ
یاده سالور حرملری هامیسی بیردی فرقی یوخ
گرمیدی حقله دملری هامیسی بیردی فرقی یوخ
راسخ ائله قدملری هامیسی بیردی فرقی یوخ
نوکر هیئتی لرم حیدری من چوخ ایسترم
عرض ائله یار عترتم مدرک عشقیم الده دی
هامی اسیر مهدیدی گوزلری بیر گوزلده دی
یازدیر آدون بو دفتره نکته اقل وَ دَلده دی
نام و نشان ئولر گئدر واللهی ایش عملده دی
هی دئمه خلقه سرورم حیدری من چوخ ایسترم
کیم دئسه من ولاییم سنده بیر امتحان ائله
چیخماسا امتحانیدن تئز تانی آز زیان ائله
سیلی ولایته گوره ورسالا نوش جان ائله
اولما یالانچی پهلوان شیعه لیگون عیان ائله
سویله سفیر صفدرم حیدری من چوخ ایسترم
اهل یقین دییر علی حامی دین دییر علی
مرشد اولوب ملکلره روح الامین دییر علی
قمچی لر آلتدا فاطمه قلبی غمین دییر علی
ایندیده گوئیا اولوب نقش زمین دییر علی
سسلور امامه یاورم حیدری من چوخ ایسترم
ای بیزه مشرک آد قویان اُفّ اولا اعتقادوزه
حیدرین اسم اعظمین فاطمه ئورگدوب بیزه
یوز دوتوب امتحان گونی اوچ یوز اؤ معرفتسیزه
سویلدی قانیم آخسادا حیدری وئرمرم سیزه
تابع امر رهبرم حیدری من چوخ ایسترم
ای قاپیما آلو ووران خانه ی وحیی یاندیران
هئچ بیلوسن عم اوغلوما کیمدی بوگون کمک دوران
فاطمیم یارالیام قانیمی یوخ دایاندیران
عیبی یوخ ئولدورون منی کیمدی سیزه سؤز آندیران
اون بیر امامه مادرم حیدری من چوخ ایسترم
ای گوزی یاشلی شیعه لر قلبوز انیس آهیدی
دوشسه یولوز مدینیه حق سیزه دادخواهیدی
وارد اولاندا مسجده خوردا قاپوم گواهیدی
حاجی لره دیون بورا فاطمه قتلگاهیدی
یاس کبود و پرپرم حیدری من چوخ ایسترم
فاطمیم که درد و غم گلدی منی سراغلادی
پشت دره گلنده من حالیمه عالم آغلادی
هئچ دئمورم قولوم سینوب قلبینی فضّه داغلادی
گلدی حرامزاده لر دورت بالامی ایاغلادی
بیلدیله شکوه ائتمرم حیدری من چوخ ایسترم
- دوشنبه
- 22
- بهمن
- 1397
- ساعت
- 20:6
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه