صاحب اجلال عرفان قائد اعظم علی
رازدار کل خلقت خالقه محرم علی
خانه حقون ستونی حق مستحکم علی
روح علیدور جان علیدور کعبه دلها علی
ابروبادوماه و خورشید ذکر ایدوللر یا علی
یل اسنده سسلنور ای ناطق قرآن علی
نطق ایله هر نطقوه دنیا اولا قربان علی
تابع فرمانوم من ویر منه فرمان علی
سیر ایدوم دنیانی یکسر سسلنوم مولا علی
آگه اولسون کل عالم لافتی الا علی
ای ابر مرد رشادت شیر مرد روزگار
معنویت برجینون شخصیتی ای باوقار
خانه زاد کعبه سن، سن شوکت پروردگار
تیغوی حق اوسته چکدون حق اولوبدور پایدار
سس گلوب گویدن علی، لاسیف الا ذوالفقار
سن دلیل مطلق خلاق داورسن علی
بی کمک انسانلارا عالمده یاورسن علی
آند اولا اوز جانوه ، سن اصلِ باورسن علی
روح و ریحانِ زمانسان، قلبِ دنیایه طپش
درس آلور دنیا کلامونن سنون عالی مَنِش
کوفه ده بیر گون امیر اوصیا ، شخص علی
خلقه تفسیر ایلین موقع کلامِ مُنزَلی
ایستدی تفسیر اجمالی دیسون نور جلی
قلبیلر آئینه سینده جلوه لنسون نورِ حق
خلق اولا آگه بو خلقتدن ندور منظور حق
عرض ادیبدور کلّ قرآن سوره حمدینده دی
بعضی اسراری والضّالینینون مدّینده دی
آخرالامر سعادت اهدنا ردّینده دی
کیم خلوصیلن دیسه ایّاک نعبد آیه سین
باشینون اوسته گورر محشر گونونده سایه سین
حمد و تقدیس رحیم و قادرِ سبحانیدی
فتح باب علم بی اندازۀ قرآنیدی
مالک یوم جزایه بهترین برهانیدی
ابتدا و انتهای رحمتِ رحمانیدی
عالم عرفانی دوز گَزسون خودِ عرفانیدی
زندگی برنامه سینده بهترین تصویری وار
آیه آیه سورۀ حمدون گوزل تفسیری وار
نکته سنج اولساق اگر هر آیه نون تاثیری وار
نقد اولوبدور بیرزماندا بیر مکاندا خیروشر
سورهء حمدون که اسرارین بیلَنمز چوخ بشر
ثبت اولان سوز عینِ عنوانِ ولیّ اللهیدی
جایگاهی ظرف میزان و دلِ آگاهیدی
سورهء حمدون خودِ تفسیری بسم اللهیدی
واژه واژه کلّ قرآن شرحِ بسم اللهیدور
خطِ سیر زندگیده پُر سعادت راهیدور
باء بسم اللهیدور سر منشاء بود و نبود
خالقِ کلّ خلایق، صانع کلّ وجود
رازِ هستی ، رمز قرآن، قدرت حیّ ودود
رمز خلقت مصحف قرآنیده تحریر اولوب
کلّ قرآن باء بسم اللهیده تفسیر اولوب
باء بسم اللهی که شرح ایتدی تفسیرون قلم
نقطه پرگار هستی ، منشاء جود و کَرَم
حضرت حیدر بویورموش باء بسم اللَّه منم
عالمینه گوز منم من،محتوالی سوز منم
روز محشرده گوررسوز عالمینه گوز منم
ـــــــــــــــــــــ
مرتضانی انتخاب ایتدی خدایِ ذوالمنن
فاتحِ بدروحنین اولدی،یلِ خیبر شکن
عبدودلر قاننی جاری ایدوب اژدر فکن
جنگیلرده یکّه تاز عرصۀ پیکاریدی
منبر صحبتده نطقی تیغِ آتش باریدی
قلبی مالامال عطوفت،مهریدن سرشاریدی
رنجدیده مردمه هر عصریده دلداریدی
حامی مظلومیدی،ظالملره سر باریدی
حقِیلن پیچیده ایتدی عمرینون طومارینی
گورمیوب بیر کس علیده قورخونون آثارینی
تنگ ائدیبدور عرصۀ هیجانی حیدر مرحبه
دوشمدی خوف خطردن سینه سی تاب و تبه
آسمان دینیده اوخشاندی رخشان کوکبه
جنگیده هم سنگ حیدر چشم دوران گورمیوب
اوج قدرتده علی تک ساده سلطان گورمیوب
- دوشنبه
- 22
- بهمن
- 1397
- ساعت
- 20:20
- نوشته شده توسط
- ابوالفضل عابدی پور
- شاعر:
-
عیسی محرمی
ارسال دیدگاه