• جمعه 10 فروردین 03


شعر ترکی غدیریه -(گینه سودالی باشدا وار غوغا)

611

گینه سودالی باشدا وار غوغا
نی کیمی باشلیوب گویولده نوا

سیندیروب روحیمین قوشی قفسی
ائده تا سیر عالم معنا

شوقیدن قصد ائدوبدی طایر جان
یول سالا قاف عشقه چون عنقا

یا ایچیردیبدی ساقی وحدت
اونا مینای عشقدن صهبا

اهل ناسوتیدن کسوب الفت
ملک لاهوتی ایلیوب مأوا

چیخیب الدن عنان توسن طبع
باش آلیب شوریله دوشوبدی یولا

مگر ایستیر یازا علی مدحین
کی اولوب مست و واله و شیدا

یوخ، کی ممکن دگول گله قلمه
مدح میر هدا ولیّ خدا

یاپراقی گر آغاجلارین کاغذ
سویی دریالرین مرکّب اولا

جنّ و انس و ملک اگر یازالار
تا قیام قیامت عظما

مرتضانین کتاب فضلیندن
یازا بیلمزله بیر ورق اصلا

ذرّه نین یوخ اؤ قدرتی هرگز
که اولا مهر وصفینه گویا

قطره دریانی وصف ائده بیلمز
بو سؤزی من دئمم دیور دنیا

قطره دن آزدی هرنه وار تعریف
مرتضانین فضیلتی دریا

مدح ائدن مرتضانی اللهدی
بو سوزه کیمسه ائتسه چون و چرا

اوخوسون آیه آیه قرآنی
تا بو مطلب اولا اونا افشا

اودی معنای با ٕ بسم الله
اودی اسرار حکمته دارا

اودی مصداق هل اتی سؤزسوز
اودی مفهوم علّم الاسما ٕ

اودی منظور حقْ خَلَقنادن
اودی معنای لفظ کرَّمنا

اودی مفهوم فوقَ ایدیهم
لفظ نصراللهه اودور معنا

قُل کفی اِنّمایه مصدر اودی
اودی حقّه ولیّ بی همتا

اودی وجه الله و لسان الله
اودی یکتایه مظهر یکتا

قدرت الله یداللهِ باسط
حقّه آئینه ی تمام نما

گر علی اولماسیدی اولمازدی
لافتی نَفیینه یقین الّا

مرتضانین ولایتی ائلیوب
دین اسلامی کامل و احیا

یاعلی ای که قهر و مهرون اولوب
نار نیران و جنّت المأوا

وار کیمین قدرتی بیان ائتسون
مدحتون ای امیر ملک ولا

عجز الواصفون عن صفتک
ما عرفناک حقّ معرفتک

مرتضادور امام اهل ولا
سرور کائنات و میر هدا

اونی خلّاق، ماسوایه ائدوب
واجب الطّاعه ،پیشوا ، مولا

مصطفی حجّة الوداعیندن
قییدیردی مدینیه گله تا

اؤ سفرده مهاجر و انصار
خدمتینده واریدی لایُحصی

تا یتیشدی غدیر خم چولونه
نازل اولدی امین وحی خدا

عرض ائدوب ای رسول عالمیان
امر ائدور کردگار جلّ علا

عمون اوغلی علی ولایتینی
آشکار ائت سزا دگول اخفا

خلقه سندن صورا اودور رهبر
اودور امر خلافته دارا

گر بو امری یتیرمه سون خلقه
اولا کامل رسالتون حاشا

ائتدی الله ذوالجلال بوگون
دینی تکمیل ای رسول خدا

خاتم الانبیانین امریله
خلق ایچینده منادی ائتدی ندا

یغیشون بیریره هاموز کی گرک
بیر مهم امر وار اولا اجرا


دالی قالمیش گلوب گئدن قییدیب
مجمع عام اولوب همان صحرا

امر اولوندی دوه جهازیندن
بیر اوجا منبر ائتدیلر برپا

آپاریبدور اؤ منبره تشریف
سرور کون ، حضرت طاها

بیر رسا خطبه ایلدی ایراد
ائتدی پروردگاره حمد و ثنا

اوز دوتوب جمع حاضرینه دئدی
دگولم نفسوزه مگر اولا؟

ائشیدیب بو سؤزی بوتون حضّار
هامی اقرار ایلدی کی ، بلیٰ

توتوب الده علی کمربندین
آپاروب عرش منبره اونی تا

هامی گوردی علیّ اعلانی
جای ابهام قالمادی ابدا

اوجا بیر صوتیله خطاب ائتدی
جمع حضّاره خسرو بطحا

هرکیمین نفسینه من اولایم
بو علیدور او کیمسیه مولا

دوستدار علیّ والانی
حق یانیندا اؤ سرور ائتدی دعا

مرتضا دشمنین ائدوب نفرین
ویروب اود وعده سی اونا به ملا

دئدی یارب محبّ اول او کسه
که محبّ علی اولا ، اما

دشمن مرتضانی دشمن دوت
ای خداوند قادر و یکتا

ناصر مرتضایه نصرت ائله
مُخذل و موهنین ائله رسوا

وئردی بیعت الین اؤ مولایه
هامی حضّار پیریله بُرنا

قدسیان سس سسه وئروب اؤ زمان
مدح مولاده اولدولار گویا:

عجز الواصفون عن صفتک
ما عرفناک حقّ معرفتک

مظهر ذات لم یزلدی علی
حضرت ذوالجلاله ، الدی علی

گرچه اللهه یوخ مثل اما
هر عملده اونا مثلدی علی

جانشین و وصیّ ختم رسل
هادی و رهبر مللدی علی

آدی مشتق اولوبدی اعلادن
هر گوزلدن اودور گوزلدی علی

عارفان ولا مذاقینده
اسماً اَحْلی مِنَ العَسلدی علی

مصطفی دن صورا جلالتده
صاحب مسند ازلدی علی

سیدالاوصیا شفیع جزا
شأن و عزتده بی بدلدی علی

ذات یکتایه یوخ محل ، اما
هامی اوصافینه محلدی علی

ماسوا فرض اولا شب دیجور
اوندا مصباح مُشتَعلدی علی

دشمن هر جفا و کینه و جور
مُبطل هر خط خطلدی علی

معنی اصل و فرع دین مبین
حشریده مدرک عملدی علی

برق تیغیله ظالمین جانینا
جنگیده مُنزِل اجلدی علی

یری واردور دئسم دگول اغراق
خلقته علّت العللدی علی

شأنه باخ گور مقام و منزلتین
حق ائوینده جهانه گلدی علی

ضعفا یاوری ابوالایتام
فاتح خیبر و جملدی علی

هر ستمدیدیه یانان اما
ظالمه بیر آغیر جَبَلدی علی

اؤزونه عرض ائله« #حزین»بو سؤزی
باشون اوسته اؤ دم که گلدی علی

عجز الواصفون عن صفتک
ما عرفناک حقّ معرفتک

  • سه شنبه
  • 23
  • بهمن
  • 1397
  • ساعت
  • 10:48
  • نوشته شده توسط
  • ابوالفضل عابدی پور

برای بارگذاری فایل در سایت اکانت مداحی بسازید



ارسال دیدگاه



ورود با حساب گوگل

ورود کاربران