گتیر ساقی قدح کیم موسم عشرت مهیادیر،
گلیر نوروز سلطانی، بهار عالم آر ادیر
بلورین جامه تؤک ساقی شراب راحت افزانی،
زمستان زحمتی طی اولدو فصل راحت افزادیر
عیان اولدو حملدن آفتاب، ای ساقی مه!رو
کبابِ برّه ایله رندلر گؤر باده پیمادیر
شراب نابی تؤک جام بلوره موجلر وورسون،
دئسینلر کیم گؤروبلر کشتی ایچره قانلی دریادیر
خدا ائتمیش سنی اول کشتی اوزره ناخدا ساقی،
بو دریادن نه باکیم، یاوریم ربّ تعالادیر
غبار تیره دن گول باش چکر مانند آدمدور،
اونون صُنعونده یاش برگی تپیر گویا که حوّادیر
مگر خار جفا پیشه اولوب قابیلیله همدست،
تؤکوب هابیل گول قانین مغیر روی غبرادیر
آچار رخسارینی گلزار ایچینده شیث تک لاله،
اگر چه عاشق آسا قلبینین داغی هویدادیر
گول اول اسحاقه بنزر دامن سارای گلشنده،
شمیمی عالمی توتموش سانیرسان مشک سارادیر
هزار آوادیر ابراهیم اسماعیلدیر غنچه،
فضای گلسِتان غنچه قربانگاهِ زیبادیر
دریده دامنیله چیخدی گُل گُلزاردان گویا،
فضای باغ و بستان، خلوت خاص زلیخادیر
گلیر ملک سبادان مژدۀ بلقیسدیر هدهد
گیریب صرح قواریره، سلیمان مجلس آرادیر
گؤروب بلقیس گول تخت زمرّد فام گلزاری،
سانیر اؤز تختیدیر حیرتله سرگردان و شیدادیر
حصار چرخه سالمیشدیر نوالر بلبل شیدا،
سانیرسان ثانی لحن فرو آینده نکبادیر
عرب الفاظینه یونانیدن شرح ایلییر حکمت،
مگر کیم قمری خوش لهجۀ فسطا ابن لوقادیر
بوگون اول گوندو کیم آثار خلقت آشکار اولدو،
بوگون اول گوندو کیم تقدیر یزدان کارفرمادیر
اگر چه دوشدو اوچ آی قنشره نوروزدان ساقی،
گلیر بیر آی کی نوروندان منوّر جمله اشیادیر
نه آیدیر ماه گردوندور، دگیلدیر ساقیا باالله!
ولایت برجنون ماهِ منیرِ چرخ بطحادیر
حجاب ابرده قالدی اوچ آی گر ماه نور افشان،
بحمدالله چخیبدیر ایندی ظلمتدن هویدادیر
بحمداالله کی ظلمات ثلاثه دفع رفع اولدی،
اولوب نورانی عالم، زنگ ظلمتدن مصفّادیر
چخیب اول ماه کیم نورون آلیب شمس رسالتدن،
تجلّاسیندان عالم جلوه گاه طورِ سینادیر
او سلطان نبی طینت، او هارون خلافت کیم،
فضائل مکتبینده کمترین شاگردی موسادیر
کلام جامعِ اکرم، او روح االله اعظم کیم،
غلام کمتری چرخ چهارم اوزره عُلیادیر
هنوز آدم میان آب و گِلده تاپمامیش صورت،
اونون عالمده ظاهر اولدوغو نصّیله پیدادیر
اودور مخلوقِ اوّل، عقلِ اوّل، صادرِ اوّل،
او وجه الله باقیدیر اونیله عرش برپادیر
برائت سوره سین وئرمیشدی گر صدّیقه پیغمبر،
اونون عزلینه فرمان ایلیه ن کس ربّ اعلادیر
تولّا عروة الوثقایه بل اول کس کی عاقیلدیر،
تبرّا جبت و طاغوته ائدن اهل تولّادیر
اگر چه غیریه ائتمیش بو نامی اؤزگیه نسبت،
او مولا سبقت اسلامیده صدّیق کبرادیر
یئتیشدی حکم کیم صدّیقدن آل سورۀ پاکی،
قرائت چین اونا شایسته بیر ذات مصلّادیر
علی عالی اعلا، وصی سیدِ بطحا،
کی عالم لفظدور، ذات علی اُول لفظه معنادیر
آپارسین یکه و تنها، قرائت ائتسون اول مولا،
تمامی اهل موسم چونکی معناسی تبرّادیر
عنادید قریشون اکثرین مقتول ائتمیشکن،
اولاردان ائتمیه ن پروا، او سلطان صف آرادیر
شجاعتده بو سلطانه برابر اولماییب موسی،
اونون مقتولی قبطیدن اولان بیر شخص اولی دیر
ید بیضا عصای مو سویله ائیله دی پروا،
بو شیریم یا محمّد باک قیلماز شیر هیجادیر
آپاردی حکم خالقله قرائت قیلدی اول مولا،
شجاعتده کیم اول سلطان خیبرگیره همتادیر
علی گر اولماسایدی فاطمه قالمیشدی بی شوهر،
اونون هم کفوی عالمده امیر آل طاهادیر
کلام ضلّ احمد من علی ، سؤیلیه ن کسلر
ایکی عالمده اونلار موجب وحییله رسوادیر
شب هجرتده یانتدی مضجع احمدده اول مولا،
وفایه جانینی شاهه قیلان اول میر والادیر
حدیث لَحمک لَحمی کلام جسمک جسمی،
محمّد له علی بیر اولدوغو گون تک هویدادیر.
شب معراجده صوت علیله خالق داور،
حبیبیله تکلم ائتدیگی بیر سرّ عظمادیر.
نه غم اوندان ریاستده مقدّم دوشسه اوچ کیمسه،
اولار اوچ صفردیر اما الف چون رتبه بالادیر
هبوط کوکبی گئت سورۀ والنّجمدن اؤیرن،
غوایت اهلینی تهدید ائدن اول ربّ اسرادیر
مدارا قیلدی تا کیم اولماسین مخلوقلار مرتد،
مزاج عالمه عارف، رموزِ امره دانادیر
اگر چه حضرت یزدانه قیلدی چوخ تظلّم دور،
دگیلدی شکوه حاشا ظالمین ظلمینه ایمادیر
#فدک غصبینده گر ائتدی شکایت زهرۀ زهرا،
حکام دنیوی چون سانمه اول صدّیقه شیدادیر
اگر بیر قرص نانی سفره ده اولسیدی اول پاکین،
ائدردی سائله اعطا کی کان لطف دریادیر
قالان کس اوچ گون آج نیلریدی بو فدک ملکون،
اونون بو ادّعاسی غاصبین غصبینه مبدادیر
ذوی القربی حقوقون ایستییردی اولماسین پامال،
و الّا حُبّ دنیادن اونون قلبی مبرّادیر
او بیر سرّیدی کیم حقدن گلیردی رزق مقسومی،
ا یکی یحیایه مادردیر داها امّ دو عُلیادیر
صدفدور بطن پاکی اول صدفده یازده گوهر،
اونون ذرّیۀ اطهرلری لؤلؤِ لالادیر
عزیز مصطفادیر جدّۀ سادات عالمدیر
دُر بحر نبوّت، مظهر اسماء حُسنادیر
اگر چه ایسته دی دشمن چراغ مصطفی سؤنسون،
بلی اَن یُطفئوا قرآندا بیر رمز مطرّادیر
ولی شمع رسالت شعشعانی دوتدو آفاقی،
نظر هر یانه قیلسین سر به سر نور تجلّادیر
دوشوب بیر شلعه سی «شیروانه» اول نور تجلانین،
علی نورون علیده گؤرسون اول کسلر کی جویادیر
علی نام و علی علم و علی حلم و علی صولت،
عُلوّ رتبه ده اؤز نام پاکینه مسمّی دیر
اودور سبط شه مردان، یگانه فاضل شیروان،
نظیری گلمییب دنیایه دنیا تا کی بینادیر
شجاعتده، سخاوتده، فراستده، عدالتده،
تاپیلماز قافدان قافا عدیلی، مثل عنقادیر
دیلینه گلمییبدیر لا، مگر وقت تشهّد ده،
اگر چه نفی اوچوندور لا، اونون اثباتی الّادیر
محقّق دور، مدقّق دور، موفّق دور، مصدّق دور،
مکرّم دور، معظّم دور، مطهّردور، معلّادیر
معلّمدور مُعالمدور علوم دینه رهبردیر،
معزّزدیر، مطرّزدیر، مظفّردیر، مزکّی دیر
علوم اوّلین و آخرین صدرینده مضمردیر،
خبیر نکتۀ دین، واقف علم منایادیر
کلیسایه شعاعِ عارضی دوشسه، اولور کلبه،
نه مسجد کیم اونون ذکری اولونماز بیر کلیسادیر
نه یالقیز بیر منم «سیّد» اونون مرهون احسانی،
رهین همّتی اول فیض بخشین پیر و برنادیر
- سه شنبه
- 23
- بهمن
- 1397
- ساعت
- 11:47
- نوشته شده توسط
- ابوالفضل عابدی پور
- شاعر:
-
سید عظیم شیروانی
ارسال دیدگاه